ບໍລິສັດ ລາວໂທລະຄົມມະນາຄົມ ມະຫາຊົນ ສະໜັບສະໜູນການຈັດງານ ສັບປະດາດິຈິຕ໋ອນ (LAO DIGITAL WEEK) ປະຈໍາປີ 2022 ຈໍານວນ 300,000,000 ກີບ

ໃນຕອນເຊົ້າວັນທີ: 13 ທັນວາ 2022 ຜ່ານມາ ທີ່ກະຊວງເຕັກໂນໂລຊີ ແລະ ການສື່ສານ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ພ້ອມດ້ວຍຄະນະ ໄດ້ມອບເງິນຈໍານວນ 300,000,000 ກີບ ສະໜັບສະໜູນການຈັດງານສັບປະດາດິຈິຕ໋ອນ (LAO DIGITAL WEEK) ປະຈໍາປີ 2022 ໃຫ້ກຽດຮັບໂດຍ ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ. ງານວາງສະແດງ ສັບປະດາດິຈິຕ໋ອນ (LAO DIGITAL WEEK) ປະຈຳປີ 2022 ຈະໄດ້ຈັດຂື້ນໃນລະຫວ່າງ ວັນທີ 21-25 ທັນວາ 2022. ທີ່ ຫໍປະຊຸມແຫ່ງຊາດ (ຫຼັກ 6). ນະຄອນຫຼວງວຽງຈັນ ຈັດງານໂດຍ ກະຊວງເຕັກໂນໂລຊີ ແລະ ການສື່ສານ. ຈຸດປະສົງຂອງການຈັດງານດັ່ງກ່າວແມ່ນເພື່ອເຜີຍແຜ່ຜົນສຳເລັດທາງດ້ານວຽກງານການຄົ້ນຄ້ວາ, ທັງເປັນການປະກອບສ່ວນເຂົ້າໃນວຽກງານຊຸກຍູ້ສົ່ງເສີມເສດຖະກິດ-ສັງຄົມ, ການກຽມຄວາມພ້ອມການຫັນເປັນ ອຸດສາຫະກຳ 4.0 ຕາມແຜນ ວິໄສທັດການພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 20 ປີ (2021-2040) ຍຸດທະສາດພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາ ເສດຖະກິດດິຈິຕ໋ອນ ແຫ່ງຊາດ ໄລຍະ 5 ປີ (2021-2025). ໃນງານຄັ້ງນີ້ ບໍລີສັດ ລາວໂທລະຄົມມະນາຄົມ ມະຫາຊົນ ຍັງໄດ້ເຂົ້າຮ່ວມອອກຮ້ານວາງສະເເດງ ແລະ ໄດ້ເຊີນບໍລິສັດໃນເຄືອ ເເລະ ຄູ່ຮ່ວມທຸລະກິດຈາກປະເທດເພື່ອນບ້ານ ເຂົ້າມາຮ່ວມວາງສະເເດງໃນ Booth ຂອງ ລາວໂທລະຄົມ ເຊັ່ນ: ບໍລິສັດ AIS, ບໍລິສັດ Thaicom, ມະຫາວິທະຍາໄລຂອນເເກ່ນ ແລະ ອື່ນໆ, ນອກຈາກນັ້ນຍັງໄດ້ເຊີນນັກວິທະຍາກອນຊ່ຽວຊານຮ່ວມສຳມະນາຖ່າຍຖອດບົດຮຽນໃນບາງຫົວຂໍ້ອີກຕື່ມເຊັ່ນ: ການບໍລິຫານຄື້ນຄວາມຖີ່ໃນການນຳໃຊ້ 5G used case; Cyber Security (CSOC) ແລະ ການນໍາໃຊ້ Satellite solution: Orbital Insight ກັບ AI Computerization ເເລະ Space Economy ໃນການດຳເນີນທຸລະກິດ. ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ກ່າວສະແດງຄວາມຂອບໃຈຍ້ອງຍໍຊົມເຊີຍ ແລະ ຕີລາຄາສູງ ຕໍ່ການປະກອບສ່ວນສະໜັບສະໜູນຂອງ ບໍລິສັດ ລາວ ໂທລະຄົມມະນາຄົມ ມະຫາຊົນ ໃນການຈັດງານຄັ້ງນີ້. ລາວໂທລະຄົມ ໂທລະຄົມຂອງຄົນລາວ ເພື່ອສັງຄົມລາວ

img
img

View: 2000 | 12/16/2022 9:57:24 AM | ກ່ຽວກັບ ລາວ ໂທລະຄົມ

ຍ້ອນກັບ

ຮູບພາບທີ່ກ່ຽວຂ້ອງ



Copyright © 2023 , All Rights Reserved | Version : 2.0