ບໍລິສັດ ລາວ ໂທລະຄົມມະນາຄົມ ມະຫາຊົນ ປິດຝຶກອົບຮົມ ທິດສະດີການເມືອງ- ການປົກຄອງ 45 ວັນ ຊຸດທີ lll

ໃນຕອນເຊົ້າຂອງວັນທີ 1 ພະຈິກ 2022 ທີ່ຫ້ອງປະຊຸມ ສໍານັກງານ​ໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ມີພິທີປິດ​ຝຶກອົບຮົມ ທິດສະດີການເມືອງ-ການປົກຄອງ ໄລຍະສັ້ນ 45 ວັນ ຊຸດທີ III ,ໃຫ້ກຽດເຂົ້າຮ່ວມເປັນປະທານໂດຍ ສະຫາຍ ປອ ສັນຕິສຸກ ສິມມາລາວົງ ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ນອກນັ້ນຍັງມີ ສະຫາຍ ປອ ດາວສະຫວັນ ເຄືອມີໄຊ ກໍາມະການຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ສະຫາຍ ສຸພົນ ຈັນທະວີໄຊ ກໍາມະການຄະນະບໍລິຫານງານພັກກະຊວງ ຕສ, ເລຂາຄະນະພັກຮາກຖານ, ຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ, ສະຫາຍ ປອ ນາງ ໄກສອນ ຈັນສີນາ ກໍາມະການຄະນະບໍລິຫານງານພັກ, ຫົວໜ້າກົມຄຸ້ມຄອງການຮຽນ-ການສອນ ສະຖາບັນການເມືອງ ແລະ ການປົກຄອງແຫ່ງຊາດ ພ້ອມດ້ວຍຄະນະພັກຮາກຖານ ລາວ ໂທລະຄົມ , ຄະນະໜ່ວຍພັກ ແລະ ນັກຝຶກອົບຮົມລວມທັງໝົດຈຳນວນ 90 ສະຫາຍ, ຍິງ 28 ສະຫາຍ.

ໃນພິທີ ສະຫາຍ ຄໍາໃບ ພົມຮັກສາ ຄະນະພັກຮາກຖານ, ຫົວໜ້າຝ່າຍຈັດຕັ້ງ-ບໍລິຫານ ທັງເປັນຫົວໜ້າພະແນກຈັດຕັ້ງ ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ຂື້ນຜ່ານບົດສະຫຼຸບຜົນການຈັດຕັ້ງປະຕິບັດການຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຊຸດທີ III ທີ່ໄດ້ຈັດຕັ້ງດໍາເນີນມາຕັ້ງແຕ່ວັນທີ 29 ສິງຫາ 2022 ມີສະມາຊິກພັກ, ພະນັກງານຫຼັກແຫຼ່ງ ບໍລິສັດ ລາວ ໂທລະຄົມມະນາຄົມ ມະຫາຊົນ ເຂົ້າຮ່ວມຝຶກອົບຮົມທັງໝົດຈໍານວນ 55 ສະຫາຍ, ຍິງ 23 ສະຫາຍ. ສະຫາຍໄດ້ລາຍງານສະພາບຈຸດພິເສດ ແລະ ລະດັບຄາດໝາຍ ພ້ອມທັງຕີລາຄາຜົນສໍາເລັດການຈັດຕັ້ງປະຕິບັດຫຼັກສູດ ໃນຊຸດຝຶກອົບຮົມຄັ້ງນີ້ ຕໍ່ຄະນະປະທານ ແລະ ທີ່ປະຊຸມ ໄດ້ຮັບຊາບ ພ້ອມທັງສະຫຼຸບ ແລະ ຕີລາຄາຄວາມຮັບຮູ້ຂອງຜູ້ເຂົ້າຝຶກອົບຮົມຄັ້ງນີ້ ໂດຍລວມແມ່ນຢູ່ໃນລະດັບດີຫຼາຍກວມເອົາ 75%, ຮັບຮູ້ໃນລະດັບດີ ກວມເອົາ 25 %. ຫຼັງຈາກນັ້ນ ສະຫາຍ ປອ ດາວສະຫວັນ ເຄືອມີໄຊ ກໍາມະການຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ຕາງໜ້າຄະນະປະທານໃຫ້ກຽດຂື້ນມອບໃບຢັ້ງຢືນໃຫ້ແກ່ນັກຝຶກອົບຮົມ.

ໃນຕອນທ້າຍຂອງພິທີ ສະຫາຍ ປອ ສັນຕິສຸກ ສິມມາລາວົງ ປະທານກອງປະຊຸມ ໄດ້ໃຫ້ກຽດໂອ້ລົມ ເຊິ່ງ ສະຫາຍໄດ້ສະແດງຄວາມຍ້ອງຍໍຊົມເຊີຍ ຄະນະພັກຮາກຖານ ບໍລິສັດ ລາວ ໂທລະຄົມມະນາຄົມ ມະຫາຊົນ ທີ່ໄດ້ເອົາໃຈໃສ່ວຽກງານຝຶກອົບຮົມທິດສະດີການເມືອງ ແລະ ການປົກຄອງ ໃຫ້ສະມາຊິກພັກ, ພະນັກງານຫຼັກແຫຼ່ງຂອງຕົນ ຢ່າງສະໜໍ່າສະເໝີ ເພື່ອສາມາດກໍາໄດ້ ທິດສະດີ ມາກ-ເລນິນ, ແນວຄິດໄກສອນ ພົມວິຫານ, ແນວທາງນະໂຍບາຍຂອງ ພັກ-ລັດ ໃຫ້ເລິກເຊິ່ງ ສາມາດນໍາໄປໝູນໃຊ້ເຂົ້າໃນວຽກງານວິຊາສະເພາະຕົວຈິງຂອງຕົນໃຫ້ໄດ້ຮັບໝາກຜົນສູງສຸດ, ສະຫາຍຍັງໄດ້ສະແດງຄວາມຂອບໃຈ ຄະນະນໍາ ແລະ ບັນດາຄູອາຈານຈາກ ສະຖາບັນການເມືອງ ແລະ ການປົກຄອງແຫ່ງຊາດ ທີ່ໄດ້ໃຫ້ການຊຸກຍູ້ຊ່ວຍເຫຼືອ ດ້ານວຽກງານຝຶກອົບຮົມດ້ານທິດສະດີການເມືອງ ແລະ ການປົກຄອງ ໃຫ້ກັບ ກະຊວງ ເຕັກໂນໂລຊີ ແລະ ການສື່ສານ ເວົ້າລວມ, ເວົ້າສະເພາະກໍຄື ບໍລິສັດ ລາວ ໂທລະຄົມມະນາຄົມ ມະຫາຊົນ ມາໂດຍຕະຫຼອດ.

img
img

View: 1060 | 11/2/2022 8:23:16 AM | ກ່ຽວກັບ ລາວ ໂທລະຄົມ

ຍ້ອນກັບ

ຮູບພາບທີ່ກ່ຽວຂ້ອງ



Copyright © 2022 , All Rights Reserved | Version : 2.0