ກອງປະຊຸມການສ້າງແຜນກຳນົດພະນັກງານນຳພາ-ຄຸ້ມຄອງ ຂອງ ບໍລິສັດ ລາວໂທລະຄົມມະນາຄົມ ມະຫາຊົນ.

ໃນຕອນບ່າຍ ວັນທີ 23 ກັນຍາ 2022 ຢູ່ທີ່ຫ້ອງປະຊຸມໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ໄດ້ເປີດກອງປະຊຸມການສ້າງແຜນພະນັກງານນຳພາ-ຄຸ້ມຄອງ, ໃຫ້ກຽດເປັນປະທານໂດຍ ສະຫາຍ ຄຳພູ ດວງຖະໜອມ ຄະນະປະຈຳພັກ, ເລຂາໜ່ວຍພັກ, ຫົວໜ້າກົມຈັດຕັ້ງ ແລະ ພະນັກງານ ກະຊວງ ເຕັກໂນໂລຊີ ແລະ ການສື່ສານ, ສະຫາຍ ສຸພົນ ຈັນທະວີໄຊ ກຳມະການຄະນະບໍລິຫານງານພັກກະຊວງ ເຕັກໂນໂລຊີ ແລະ ການສື່ສານ, ເລຂາຄະນະພັກຮາກຖານ, ຜູ້ອຳນວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ, ສະຫາຍ ນ. ສຸພາລັກ ສີລາເພັດ ຫົວໜ້າຫ້ອງການອົງຄະນະພັກ ແລະ ອົງການຈັດຕັ້ງມະຫາຊົນ ກະຊວງ ເຕັກໂນໂລຊີ ແລະ ການສື່ສານ, ນອກນັ້ນຍັງມີ ບັນດາສະຫາຍຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກສົມບູນ ເຂົ້າຮ່ວມທັງໝົດ 201 ສະຫາຍ, ຍິງ 71 ສະຫາຍ.

ຈຸດປະສົງກອງປະຊູມໃນຄັ້ງນີ້ ແມ່ນເພື່ອທາບທາມເອົາເປົ້າໝາຍພະນັກງານຫຼັກແຫຼ່ງນຳພາ-ຄຸ້ມຄອງໃຫ້ໄປຕາມທິດຊີ້ນຳ ແລະ ເພື່ອຮັບປະກັນໃຫ້ໄດ້ພະນັກງານນຳພາ-ຄຸ້ມຄອງຫຼັກແຫຼ່ງທີ່ດີ, ເກັ່ງ, ມີຄວາມພຽບພ້ອມໄປດ້ວຍຄຸນທາດການເມືອງໝັກແໝ້ນ, ຄຸນສົມບັດສິນທຳປະຕິວັດ ເພື່ອຂັບເຄື່ອນວຽກງານຮອບດ້ານຂອງ ບໍລິສັດ ລາວໂທລະຄົມມະນາຄົມ ມະຫາຊົນ ໄປເຖິງຈຸດໝາຍ ທີ່ ພັກ-ລັດ ເຮົາໄດ້ກຳນົດໄວ້.

ໃນກອງປະຊຸມ ສະຫາຍ ຄຳພູ ດວງຖະໜອມ ປະທານກອງປະຊຸມ ໄດ້ເຜີຍແຜ່ບັນດາມະຕິຂອງກົມການເມືອງສູນກາງພັກ ສະບັບເລກທີ 030,031,032/ກມສພ ລົງວັນທີ 03 ມັງກອນ 2018 ວ່າດ້ວຍການສ້າງແຜນກໍານົດພະນັກງານນໍາພາ-ຄຸ້ມຄອງ ແລະ ເນັ້ນໜັກຕໍ່ການທາບທາມ. ສະຫາຍ ນ. ສຸພາລັກ ສີລາເພັດ ໄດ້ເຜີຍແຜ່ເອກະສານຄຳແນະນຳຂອງຄະນະຈັດຕັ້ງສູນກາງພັກ ສະບັບເລກທີ 292/ຄຈສພ, ລົງວັນທີ 26 ເມສາ 2018 ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ແລະ ສະຫາຍ ອາລຸນນະເດດ ບານຈິດ ຄະນະປະຈຳພັກຮາກຖານ ລລທ ຜ່ານມາດຖານເງື່ອນໄຂພະນັກງານນຳພາ-ຄຸ້ມຄອງ ຂອງ ລລທ.

ໃນພິທີ ສະຫາຍ ສຸພົນ ຈັນທະວີໄຊ ໄດ້ຍ້ອງຍໍຊົມເຊີຍຄະນະຮັບຜິດຊອບທີ່ໄດ້ກະກຽມຄວາມພ້ອມໃນທຸກດ້ານ ເຮັດໃຫ້ກອງປະຊຸມໃນຄັ້ງນີ້ ເປີດຂຶ້ນໄດ້ທັນຕາມກໍານົດເວລາ ທີ່ວາງໄວ້ ແລະ ສະຫາຍຍັງມີຄໍາເຫັນຊີ້ນຳຕໍ່ກອງປະຊຸມ ໃຫ້ບັນດາສະຫາຍທີ່ເຂົ້າຮ່ວມກອງປະຊຸມຈົ່ງເອົາໃຈໃສ່ຕິດຕາມຮັບຟັງການເຜີຍແຜ່ບັນດາມະຕິ ແລະ ຄໍາແນະນຳຕ່າງໆ ເພື່ອເປັນບ່ອນອີງໃນການຈັດຕັ້ງປະຕິບັດ, ຂໍໃຫ້ບັນດາສະຫາຍຈົ່ງປະຕິບັດຕາມລະບຽບ ທີ່ທາງຄະ ນະຮັບຜິດຊອບຈະໄດ້ແນະນຳ ຢ່າງເຂັ້ມງວດ, ໃຫ້ບັນດາສະຫາຍເລືອກເອົາເປົ້າໝາຍພະນັກງານນຳພາ-ຄຸ້ມຄອງ ໃຫ້ຄົບຕາມມາດຖານເງື່ອນໄຂ ທີ່ວາງອອກ, ຮັບປະກັນໄດ້ທັງຄົນເກັ່ງ ແລະ ຄົນດີ ຮູ້ວິທີບໍລິຫານ ເພື່ອນຳພາການດຳເນີນທຸລະກິດຂອງບໍລິສັດໃຫ້ເຂັ້ມແຂງ.

ໃນຕອນທ້າຍ ກອງປະຊຸມ ສະຫາຍເລຂາຄະນະພັກຮາກຖານ ລລທ ຍັງໄດ້ຮຽກຮ້ອງມາຍັງບັນດາສະຫາຍຈົ່ງພ້ອມກັນເຊີດຊູຄວາມຮັບຜິດຊອບ, ສຸມສະຕິປັນຍາເຂົ້າໃນການຄັດເລືອກພະນັກງານນຳພາ-ຄຸ້ມຄອງ ແລະ ປະ ກອບຄຳຄິດເຫັນຢ່າງພາວະວິໄສເຂົ້າໃນແບບຟອມ, ເພື່ອເຮັດໃຫ້ການດຳເນີນກອງປະຊຸມຄັ້ງນີ້ໃຫ້ເຕັມໄປດ້ວຍບັນ ຍາກາດທີ່ຟົດຟື້ນ, ມີເນື້ອໃນເລິກເຊິ່ງ, ມີຄວາມຮັບຜິດຊອບສູງ ແລະ ບັນລຸຕາມລະດັບຄາດໝາຍກຳນົດໄວ້.

img
img

View: 2984 | 9/27/2022 8:56:11 AM | ກ່ຽວກັບ ລາວ ໂທລະຄົມ

ຍ້ອນກັບ

ຮູບພາບທີ່ກ່ຽວຂ້ອງ



Copyright © 2022 , All Rights Reserved | Version : 2.0