ບໍລິສັດ ລາວ ໂທລະຄົມມະນາຄົມ ມະຫາຊົນ ເປີດຝຶກອົບຮົມທິດສະດີການເມືອງ- ການປົກຄອງ 45 ວັນ ຊຸດທີ III

ໃນຕອນເຊົ້າວັນທີ 29 ສິງຫາ 2022 ທີ່ຫ້ອງປະຊຸມ ສໍານັກງານ​ໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ເປີດ​ຝຶກອົບຮົມ ທິດສະດີການເມືອງ-ການປົກຄອງ 45 ວັນ ຊຸດທີ III ຂື້ນ,ໃຫ້ກຽດເປັນປະທານ ກ່າວເປີດພິທີຄັ້ງນີ້ໂດຍ ສະຫາຍ ສັນຕິສຸກ ສິມມາລາວົງ ຮອງເລຂາຄະນະພັກ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໃຫ້ກຽດເຂົ້າຮ່ວມໂດຍ ສະຫາຍ ນ. ບຸນມີ ຈຸນລະຈັກ ສະມາຊິກສະພາແຫ່ງຊາດ ຊຸດທີ 9, ຮອງເລຂາຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫງຊາດ, ສະຫາຍ ຄໍາພູ ດວງຖະໜອມ ຄະນະປະຈໍາພັກກະຊວງ, ເລຂາໜ່ວຍພັກ, ຫົວໜ້າ ກົມຈັດຕັ້ງ ແລະ ພະນັກງານ ກະຊວງ ເຕັກໂນໂລຊີ ແລະ ການສື່ສານ, ສະຫາຍ ສຸພົນ ຈັນທະວີໄຊ ກໍາມະການຄະນະບໍລິຫານງານພັກກະຊວງ ຕສ, ເລຂາຄະນະພັກຮາກຖານຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ພ້ອມດ້ວຍຄະນະພັກຮາກຖານ ລລທ, ຄະນະໜ່ວຍ ແລະ ນັກສຳມະນາກອນລວມທັງໝົດຈຳນວນ 100 ສະຫາຍ, ຍິງ 35 ສະຫາຍ ເຂົ້າຮ່ວມ.

ໃນວາລະພິທີ ສະຫາຍ ອາລຸນນະເດດ ບານຈິດ ຄະນະປະຈຳພັກຮາກຖານ ລລທ ໄດ້ຂື້ນອ່ານຂໍ້ຕົກລົງວ່າດ້ວຍການອະນຸມັດເປີດຝຶກອົບຮົມ ຂອງ ສມປຊ, ມະຕິຕົກລົງຂອງຄະນະພັກກະຊວງ ຕສ ແລະ ແຜນການ ເຄື່ອນໄຫວການຝຶກອົບຮົມຂອງ ສມປຊ ຕໍ່ທີ່ປະຊຸມ ເຊິ່ງການຝຶກອົບຮົມໃນຊຸດນີ້ແມ່ນຄວາມຕັດສິນໃຈສູງຂອງຄະນະພັກ-ຄະນະອໍານວຍການ ບໍລິສັດ ລາວ ໂທລະຄົມມະນາຄົມ ມະຫາຊົນ ພາຍໃຕ້ການນໍາພາ-ຊີ້ນໍາຈາກ ຄະນະພັກ-ຄະນະນໍາກະຊວງ ເຕັກໂນໂລຊີ ແລະ ການສື່ສານ ໂດຍມີຈຸດປະສົງຄື:

1. ເພື່ອປະກອບຄວາມຮູ້ພື້ນຖານທາງດ້ານທິດສະດີການເມືອງ, ເປັນຕົ້ນແມ່ນຫຼັກມູນພື້ນຖານຂອງທິດສະດີ ມາກ-ເລນິນ ແນວທາງນະໂຍບາຍຂອງພັກ (ມະຕິ X, XI ຂອງພັກ). 2. ເພື່ອຍົກລະດັບທາງດ້ານທິດສະດີການເມືອງ, ຫຼັກໝັ້ນ ແລະ ທັດສະນະຊົນຊັ້ນກໍາມະກອນ, ຮູ້ຈໍາແນກມິດ-ສັດຕູ, ເຊື່ອໝັ້ນຕໍ່ການນໍາພາຂອງພັກກໍ່ຄືຈຸດໝາຍການປະຕິວັດຂອງປະເທດເຮົາ. 3. ເພື່ອຝຶກຝົນຫຼໍ່ຫຼອມຄຸນສົມບັດ, ຄຸນທາດປະຕິວັດ, ສ້າງແບບແຜນການດໍາລົງຊີວິດທີ່ປອດໃສຂາວສະອາດ, ຍົກສູງສະຕິລະວັງຕົວຕໍ່ທຸກເລ້ລ່ຽມກົນອຸບາຍຍຸດທະສາດຫັນປ່ຽນໂດຍສັນຕິຂອງສັດຕູ, ກຽມພ້ອມຮັບໃຊ້ຊາດ, ຮັບໃຊ້ປະຊາຊົນ ແລະ ປະຕິບັດສອງໜ້າທີ່ຍຸດທະສາດໃຫ້ສໍາເລັດຜົນ. 4. ເພື່ອເຊື່ອມຊຶມ ແລະ ກໍາແໜ້ນແນວທາງ, ແຜນນະໂຍບາຍຂອງພັກ, ເປັນຕົ້ນແມ່ນແນວທາງການປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ພ້ອມກັນນັ້ນກໍຍັງເປັນການສ້າງຄວາມເປັນເອກະພາບກັບແນວທາງ, ແຜນນະໂຍບາຍຂອງພັກ ເພື່ອນໍາໄປຜັນຂະຫຍາຍ ແລະ ຈັດຕັ້ງປະຕິບັດໃນຂົງເຂດວຽກງານຕົວຈິງໃຫ້ເກີດດອກອອກຜົນ, ທັງເປັນການຕ້ານທັດສະນະຜິດເຂວອອກຈາກແນວທາງ, ແຜນນະໂຍບາຍຂອງພັກເຊັ່ນ: ແນວຄິດຄອງເດີມ, ກົນຈັກລອກແບບ, ຈຸ້ມເຈື້ອ, ເຊື້ອສາຍ, ຫຼາຍພັກຫຼາຍເຄົ້າການເມືອງ ແລະ ອື່ນໆ.

ການຝຶກອົບຮົມທິດສະດີການເມືອງ-ການປົກຄອງ ຊຸດທີ III ນີ້ຈະໄດ້ດໍາເນີນໄປເປັນເວລາ 45 ວັນ (ເລີ່ມວັນທີ 29 ສິງຫາ - 28 ຕຸລາ 2022) ມີນັກສໍາມະນາກອນເຂົ້າຮ່ວມທັງໝົດ 55 ສະຫາຍ, ຍິງ 23 ສະຫາຍ. ເຊິ່ງບັນດານັກສໍາມະນາກອນເຂົ້າຮຽນຊຸດນີ້ແມ່ນຜ່ານການຄັດເລືອກຂອງຄະນະພັກ-ຄະນະອໍານວຍການຂອງ ລລທ ເຊິ່ງເລືອກເອົາພະນັກງານ ທີ່ເປັນຫົວຈັກຫຼັກແຫຼ່ງ, ເປັນແກ່ນສານໃນການນໍາພາ-ຄຸ້ມຄອງ ເພື່ອຮັບປະກັນດ້ານຄຸນທາດການເມືອງໃຫ້ມີຄວາມໜັກແໜ້ນ, ເພີ່ມຄວາມຮູ້ທາງດ້ານ ທິດສະດີ ມາກ-ເລນິນ, ແນວຄິດໄກສອນ ພົມວິຫານ, ແນວທາງນະໂຍບາຍຂອງ ພັກ-ລັດ ໃຫ້ເລິກເຊິ່ງສາມາດວາງແຜນການ,ຈັດຕັ້ງນໍາພາການປະຕິບັດແຜນການທີ່ແຕ່ລະໝ່ວຍງານວາງອອກໃຫ້ເປັນຮູບປະທໍາທັງມີປະສິດທິຜົນ ແລະ ປະສິດທິພາບສູງ, ເພື່ອປະຕິບັດໃຫ້ໄດ້ຕາມແຜນພັດທະນາບຸກຄະລາກອນ ແລະ ແຜນກໍ່ສ້າງພະນັກງານສືບທອດປ່ຽນແທນຂອງບໍລິສັດເປັນແຕ່ລະໄລຍະ.

img
img

View: 3853 | 8/31/2022 9:34:25 AM | ກ່ຽວກັບ ລາວ ໂທລະຄົມ

ຍ້ອນກັບ

ຮູບພາບທີ່ກ່ຽວຂ້ອງ



Copyright © 2022 , All Rights Reserved | Version : 2.0