ບໍລິສັດ ລາວ ໂທລະຄົມມະນາຄົມ ມະຫາຊົນ ອຸປະຖຳ Internet Leased Line ຄວາມໄວສູງ ຮັບໃຊ້ການຖ່າຍທອດສົດ ການແຂ່ງຂັນ ກິລາປິງປ໋ອງຊີງແຊ້ມເຍົາວະຊົນອາຊີ ຄັ້ງທີ 26 ປີ 2022.

ໃນຕອນບ່າຍຂອງ ວັນທີ 16 ສິງຫາ 2022 ຢູ່ທີ່ໂຮງແຮມແລນມາກ ນະຄອນຫຼວງວຽງຈັນ, ລາວ ໂທລະຄົມ ໄດ້ເຂົ້າຮ່ວມ ພິທີຖະແຫຼ່ງຂ່າວການແຂ່ງຂັນກິລາປິງປ໋ອງຊີງແຊ້ມເຍົາວະຊົນອາຊີ ຄັ້ງທີ 26 ປີ 2022 ຈັດໂດຍ ສະຫະພັນກິລາປິງປ໋ອງແຫ່ງຊາດລາວ, ໂດຍໃຫ້ກຽດເຂົ້າຮ່ວມ ຂອງ ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານ ນາງ ແສງເດືອນ ຫຼ້າຈັນທະບູນ ປະທານສະຫະພັນກິລາປິ່ງປ່ອງແຫ່ງຊາດລາວ, ພ້ອມດ້ວຍຄະນະບໍລິຫານງານ-ພະນັກງານທີ່ກ່ຽວຂ້ອງ ລວມທັງ ຜູ້ທີ່ໃຫ້ການສະໜັບສະໜູນ ແລະ ສື່ມວນຊົນຢ່າງພ້ອມພຽງ.

ໃນໂອກາດນີ້, ລາວ ໂທລະຄົມ ກໍໄດ້ມີສ່ວນຮ່ວມໃນການປະກອບສ່ວນ ອຸປະຖຳ Internet Leased Line ຄວາມໄວສູງ ລວມມູນຄ່າທັງໝົດ 63,828,000 ກີບ ເພື່ອຮັບໃຊ້ການຖ່າຍທອດສົດ ໃນລະຫວ່າງການແຂ່ງຂັນກິລາປິງປ໋ອງຊີງແຊ້ມເຍົາວະຊົນອາຊີ ຄັ້ງທີ 26 ທີ່ ສປປ ລາວ ຮັບກຽດເປັນເຈົ້າພາບ ເຊິ່ງໃຫ້ກຽດຂຶ້ນມອບໂດຍ ທ່ານ ອາລຸນນະເດດ ບານຈິດ ຮອງຜູ້ອໍານວຍການໃຫຍ່ ລາວ ໂທລະຄົມ ແລະ ຮັບໂດຍ ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ. ການແຂ່ງຂັນຈະໄດ້ຈັດຂຶ້ນ ໃນລະຫວ່າງວັນທີ 1-6 ກັນຍາ 2022 ນີ້ ທີ່ສູນການຄ້າໄອເຕັກມໍ ຊັ້ນ 7 ນະຄອນຫຼວງວຽງຈັນ. ສຳລັບການແຂ່ງຂັນກິລາປິງປ໋ອງຊີງແຊ້ມເຍົາວະຊົນອາຊີ ຄັ້ງນີ້ ມີນັກກິລາ 200 ກວ່າຄົນ ຈາກ 20 ປະເທດເຂົ້າຮ່ວມ ຊີງໄຊທັງໝົດ 11 ລາຍການ ເຊັ່ນ: ຮຸ່ນອາຍຸບໍ່ເກີນ 15 ປີ (U15) 4 ລາຍການ: ປະເພດຍິງດ່ຽວ-ຊາຍດ່ຽວ, ທີມຍິງ-ທີມຊາຍ ແລະ ຮຸ່ນອາຍຸບໍ່ເກີນ 19 ປີ (U19) 7 ລາຍການ: ປະເພດຍິງດ່ຽວ-ຊາຍດ່ຽວ, ຄູ່ຍິງ-ຄູ່ຊາຍ, ຄູ່ປະສົມ ແລະ ທີມຍິງ-ທີມຊາຍ.

ການແຂ່ງຂັນກິລາປິງປ໋ອງຊີງແຊ້ມເຍົາວະຊົນອາຊີ ຄັ້ງທີ 26 ນີ້ ຖືເປັນຄັ້ງທຳອິດທີ່ ສປປ ລາວ ໄດ້ຮັບກຽດເປັນເຈົ້າພາບ ແລະ ຈະກາຍເປັນບົດບາດອັນໃໝ່ຂອງ ສປປ ລາວ ກໍຄືສະຫະພັນປິງປ໋ອງແຫ່ງຊາດລາວ, ລາວ ໂທລະຄົມ ຮູ້ສຶກພາກພູມໃຈ ທີ່ໄດ້ມີສ່ວນຮ່ວມໃນການຍົກລະດັບບຸກຄະລາກອນດ້ານກິລາປິງປ໋ອງລາວ, ສ້າງໂອກາດໃຫ້ນັກກິລາປິງປ໋ອງລາວ ໄດ້ເຄື່ອນໄຫວທົດສອບຄວາມສາມາດ, ແລກປ່ຽນບົດຮຽນປະສົບການ ໃນເວທີລະດັບທະວີບ ແລະ ສົ່ງເສີມການທ່ອງທ່ຽວຂອງລາວເຮົາອີກດ້ວຍ.

img
img

View: 4190 | 8/23/2022 1:39:48 PM | ກ່ຽວກັບ ລາວ ໂທລະຄົມ

ຍ້ອນກັບ

ຮູບພາບທີ່ກ່ຽວຂ້ອງ



Copyright © 2022 , All Rights Reserved | Version : 2.0