ສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ ເຂົ້າຮ່ວມບໍລິຈາກເລືອດຊ່ວຍເຫຼືອສັງຄົມ ຂອງສູນກາງສະຫະພັນແມ່ຍິງລາວ ເນື່ອງໃນໂອກາດສະເຫຼີມສະຫຼອງ ວັນສ້າງຕັ້ງສະຫະພັນແມ່ຍິງລາວ ຄົບຮອບ 67ປີ.

ໃນວັນທີ 15 ກໍລະກົດ 2022, ອີງຕາມການມອບໝາຍຂອງ ປະທານສະຫະພັນແມ່ຍິງ ກະຊວງ ເຕັກໂນໂລຊີ ແລະ ການສື່ສານ ມອບໝາຍ ຕໍ່ຄະນະຂະບວນການສະຫະພັນແມ່ຍິງ ນຳພາໂດຍ ທ່ານ ປອ ນາງ ໃຈມາລີ ພະກະຊຸມ, ທ່ານ ນາງ ມະນີສອນ ທອງມະນີ ແລະ ທ່ານ ນາງ ວິໄລວັນ ຍົດໄຊວິບູນ, ຫົວໜ້າ ພ້ອມຄະນະຂະບວນການ, ຕ່າງໜ້າຄະນະບໍລິຫານງານສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ ໄດ້ນຳພາເອື້ອຍນ້ອງຍິງ ຕ່າງໜ້າບັນດາໜ່ວຍ ແລະ ໜ່ວຍຮາກຖານ ສະຫະພັນແມ່ຍິງ ທີ່ຂຶ້ນກັບ ກະຊວງ ເຕັກໂນໂລຊີ ແລະ ການສື່ສານ ເຂົ້າຮ່ວມບໍລິຈາກເລືອດຊ່ວຍເຫຼືອສັງຄົມ ຂອງສູນກາງສະຫະພັນແມ່ຍິງລາວ ເປັນເຈົ້າພາບຈັດ ເນື່ອງໃນໂອກາດສະເຫລີມສະຫລອງ ວັນສ້າງຕັ້ງສະຫະພັນແມ່ຍິງລາວ ຄົບຮອບ 67 ປີ (20 ກໍລະກົດ 1955 ເຖິງ 20 ກໍລະກົດ 2022) ພາຍໃຕ້ຄຳຂວັນທີ່ວ່າ: ”67 ປີມີໄຊ ຜູ້ຮັບດີໃຈ ຜູ້ໃຫ້ມີຄວາມສຸກ”, ຖືກຈັດຂຶ້ນທີ່ ສູນການຄ້າລາວ ໄອເຕັກມໍ, ຊັ້ນ 4 ຕຶກໃໝ່.

ຊື່ງ, ມີຈຳນວນເອື້ອຍນ້ອງທີ່ເຂົ້າປະກອບສ່ວນບໍລິຈາກເລືອດໃນຄັ້ງນີ້ ຫລາຍກວ່າ 20 ສະຫາຍ, ປະກອບມີອ້າຍເອື້ອຍອ້າຍນ້ອງ ທັງເພດຍິງ ແລະ ເພດຊາຍ, ຂັ້ນກົມ, ຂັ້ນພະແນກ ແລະ ຂັ້ນວິຊາການ ຂອງກະຊວງເຕັກໂນໂລຊີ ແລະ ການສື່ສານ, ບັນດາຜູ້ບໍລິຫານ ແລະ ພະນັກງານຂອງ ບໍລິສັດ ລາວໂທລະຄົມມະນາຄົມ, ບໍລິສັດໄປສະນີ ລາວ ເຂົ້າຮ່ວມ.

ຄວາມສໍາຄັນຂອງການບໍລິຈາກເລືອດ ແມ່ນເລືຶອດບໍ່ມີໂຮງງານຜະລີດທົດແທນໄດ້. ສະນັ້ນ, ຈໍາເປັນຕ້ອງໄດ້ຮັບຈາກມະນຸດສົ່ງຕໍ່ມະນຸດ ໂດຍສະເພາະໄລຍະໄຂ້ຍຸງລະບາດໜັກ ການນໍາໃຊ້ເລືອດແມ່ນຂາດແຄນ ແລະ ຈໍາເປັນທີ່ສຸດໃນການຊ່ວຍເຫຼືອຊີວິດຄົນເຈັບໃຫ້ທັນເວລາ. ການປະກອບສ່ວນໃນຄັ້ງນີ້ ສາມາດກັບເອົາປະເພດກຸບເລືອດ: A, B, AB, ແລະ O ເປັນຈຳນວນລວມ ປະມານ 8000 ml ເປັນປະລິມານທີ່ຍັງບໍ່ທັນພຽງພໍຕໍ່ຄວາມຕ້ອງການ ແຕ່ກໍ່ສາມາດຊ່ວຍເຫຼືອສັງຄົມບໍ່ໜ້ອຍ ແລະ ຂໍເຊີນຊວນບັນດາເຂົ້າຮ່ວມຂະບວນການດັ່ງກ່າວຕື່ມດ້ວຍ ບໍ່ວ່າຈະໃນງານສໍາຄັນລະດັບຊາດ ກໍ່ຄືເຂົ້າໄປບໍລິຈາກໃນສູນອົງການກາແດງໂດຍກົງ. ແຜນໃນຕໍ່ໜ້າ ຄະນະບໍລິຫານງານ ສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ ຍັງຈະສຶບຕໍ່ຊ່ວຍເຫຼືອສັງຄົມ ໃນຫຼາຍຮູບການ ຢ່າງເປັນປະຈໍາ ແລະ ລຽນຕິດ.

img
img
img
img
img

View: 2663 | 7/18/2022 11:20:48 AM | ຊ່ວຍເຫຼືອສັງຄົມ

ຍ້ອນກັບ

ຮູບພາບທີ່ກ່ຽວຂ້ອງ



Copyright © 2022 , All Rights Reserved | Version : 2.0