ລາວ ໂທລະຄົມ ເຂົ້າຮ່ວມ ພິທີເປີດນຳໃຊ້ບໍລິການ Vaccine ID/Vaccine Passport ແລະ ລະບົບການປິ່ນປົວຕົວເອງຢູ່ບ້ານ Home Isolation

ໃນຕອນບ່າຍ ວັນທີ 08 ມິຖຸນາ 2022 ທີ່ສຳນັກງານປົກຄອງ ນະຄອນຫຼວງວຽງຈັນ ໄດ້ມີພິທີເປີດນໍາໃຊ້ ບໍລິການຢັ້ງຢືນການສັກວັກຊີນປ້ອງກັນພະຍາດໂຄວິດ-19 ແບບດິຈິຕອນ (Vaccine ID / Vaccine Passport) ແລະ ລະບົບປິ່ນປົວຢູ່ບ້ານ Home Isolation ຢູ່ນະຄອນຫລວງວຽງຈັນ, ໂດຍການເປັນປະທານຮ່ວມຂອງ ທ່ານ ປອ. ອາດສະພັງທອງ ສີພັນດອນ, ເຈົ້າຄອງນະຄອນຫລວງວຽງຈັນ, ທ່ານ ດຣ. ໄພວັນ ແກ້ວປະເສີດ, ຮອງລັດຖະມົນຕີ ກະຊວງສາທາລະນະສຸກ ແລະ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລ ແລະ ການສື່ສານ, ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ຮັບກຽດເຂົ້າຮ່ວມໂດຍ ທ່ານ ລັດຖະປັນຍາ ຂຽວວົງພະຈັນ, ຮອງຜູ້ອຳນວຍການໃຫຍ່, ມີແຂກເຂົ້າຮ່ວມຈາກບັນດາກະຊວງ, ພາກສ່ວນກ່ຽວຂ້ອງ ແລະ ຄະນະສະເພາະກິດແຫ່ງຊາດ ເຂົ້າຮ່ວມຫຼາຍກວ່າ 120 ທ່ານ.

ຈຸດປະສົງໃນການເປີດນຳໃຊ້ ບໍລິການ Vaccin ID / Vaccine Passport ແລະ ລະບົບ Home Isolation ເພື່ອໃຫ້ບໍລິການປະຊາຊົນລາວທົ່ວປະເທດ ແບບບໍ່ເສຍຄ່າ, ປະກອບສ່ວນ ເຂົ້າໃນການຕ້ານ ແລະ ສະກັດກັ້ນການລະບາດຂອງພະຍາດໂຄວິດ-19 ແລະ ທັງເປັນການກະກຽມຄວາມພ້ອມ ໃຫ້ແກ່ການເປີດປະເທດ ໃຫ້ມີຄວາມປອດໄພ, ໂດຍໃນໄລຍະທຳອິດແມ່ນເລັ່ງນຳໃຊ້ຢູ່ບັນດາເມືອງ ໃນນະຄອນຫຼວງວຽງຈັນກ່ອນ ແລ້ວຈື່ງຂະຫຍາຍໄປຫາບັນດາແຂວງໃນທົ່ວປະເທດ.

1. ລະບົບ Vaccin ID / Vaccine Passport ເປັນການໜູນໃຊ້ເຕັກໂນໂລຊີທີ່ທັນສະໄໝເຂົ້າມາຊ່ວຍໃນການຢັ້ງຢືນການສັກວັກຊີນ ແລະ ອຳນວຍຄວາມສະດວກໃຫ້ແກ່ຄະນະແພດໝໍ ໃນການຕິດຕາມການເດີນທາງ ຫຼື ການເຄື່ອນໄຫວຂອງຜູ້ຕິດເຊື້ອ ແລະ ຜູ້ມີຄວາມສ່ຽງໄດ້ຢ່າງຖືກຕ້ອງ ແລະ ຊັດເຈນ.

2. ລະບົບປິ່ນປົວຢູ່ບ້ານ Home isolation ເປັນລະບົບທີ່ຊ່ວຍໃຫ້ປະຊາຊົນ ສາມາດລົງທະບຽນປິ່ນປົວພະຍາດໂຄວິດ-19 ດ້ວຍຕົນເອງ ໂດຍຜູ້ຕິດເຊື້ອສາມາດກັກໂຕ ປິ່ນປົວຕົນເອງຢູ່ບ້ານ, ແລະ ແພດໝໍ ສາມາດຄັດເລືອກຄົນເຈັບທີ່ມີອາການໜັກ ເຂົ້າມາປິ່ນປົວຢູ່ໂຮງໝໍໄດ້ທັນເວລາ ແລະ ໃຫ້ຄຳແນະນຳໃນການປິ່ນປົວ ແກ່ຄົນເຈັບທີ່ກັກໂຕປິ່ນປົວຢູ່ບ້ານ ໂດຍກົງຜ່ານລະບົບອອນລາຍ.

ໃນພິທີສໍາຄັນຄັ້ງນີ້ ບໍລິສັດ ລາວ ໂທລະຄົມມະນາຄົມ ມະຫາຊົນ, ກໍ່ໄດ້ຮ່ວມວາງສະແດງຜະລິດຕະພັນ ໃຫ້ບັນດາແຂກທີ່ເຂົ້່າຮ່ວມງານໄດ້ຮັບຊົມອີກດ້ວຍ.

img
img
img
img
img

View: 781 | 6/10/2022 4:36:25 PM | ກ່ຽວກັບ ລາວ ໂທລະຄົມ

ຍ້ອນກັບ

ຮູບພາບທີ່ກ່ຽວຂ້ອງ



Copyright © 2022 , All Rights Reserved | Version : 2.0