img

ກອງປະຊຸມ ເຊື່ອມຊຶມເອກະສານ, ທົບທວນການຊີ້ນໍາ-ນໍາພາ ຂອງຄະນະພັກຮາກຖານ ແລະ ການນໍາສະເໜີຜົນປະກອບການດໍາເນີນທຸລະກິດ ລລທ ຂອງ ປີ 2020.

ໃນຕອນເຊົ້າຂອງວັນທີ 7 ມັງກອນ 2021 ທີ່ສໍານັກງານໃຫ່ຍ ບໍລິສັດ ລາວ ໂທລະຄົມະນາຄົມ ມະຫາຊົນ ໄດ້ເປີດກອງປະຊຸມຂຶ້ນ ໂດຍການເປັນປະທານ ຂອງ ສະຫາຍ ສຸພົນ ຈັນທະວີໄຊ ເລຂາຄະນະພັກຮາກຖານ, ຜູ້ອໍານວຍການໃຫ່ຍ ບໍລິສັດ ລາວ ໂທລະຄົມມະນາຄົມ ມະຫາຊົນ, ນອກນັ້ນຍັງມີບັນດາສະຫາຍຄະນະປະຈໍາພັກ, ຄະນະພັກຮາກຖານ, ຄະນະໜ່ວຍພັກ, ສະມາຊິກພັກສົມບູນ ແລະ ສໍາຮອງ ກໍ່ໃຫ້ກຽດເຂົ້າຮ່ວມຢ່າງພ້ອມພຽງ.|ຈຸດປະສົງ ຂອງ ການເປີດກອງປະຊຸມໃນຄັ້ງນີ້ ແມ່ນ ເພື່ອຮັບຟັງການເຊື່ອມຊຶມເອກະສານຄະນະບໍລິຫານງານສູນກາງພັກ ສະ ໄໝທີ X ຂອງ ກອງປະຊຸມຜູ້ແທນທົ່ວປະເທດຄັ້ງທີ XI ຂອງ ພັກປະຊາຊົນປະຕິວັດລາວ, ທົບທວນການຊີ້ນໍາ-ນໍາພາ ຂອງ ຄະນະພັກຮາກຖານ ແລະ ການນໍາສະເໜີຜົນປະກອບການດໍາເນີນທຸລະກິດ ລລທ ຂອງປີ 2020.|ໃນກອງປະຊຸມ ສະຫາຍເລຂາ ໄດ້ຍົກໃຫ້ເຫັນຂໍ້ສະດວກ ແລະ ຂໍ້ຫຍຸ້ງຍາກການດໍາເນີນທຸລະກິດໃນຊຸມປີຜ່ານມາ ແລະ ໄດ້ເຜີຍແຜ່ບາງນະໂຍບາຍ ຂອງ ຄະນະພັກ, ຄະນະຜູ້ອໍານວຍການໃຫ່ຍ ເພື່ອເຮັດໃຫ້ຊີວິດການເປັນຢູ່ ຂອງ ພະນັກງານນັບມື້ນັບດີຂຶ້ນເທື່ອລະກ້າວ. ກອງປະຊຸມໄດ້ຮັບຟັງການປະກອບຄໍາຄິດຄໍາເຫັນ, ການແລກປ່ຽນບົດຮຽນ ແລະ ຂໍ້ສະເໜີອື່ນໆ ຂອງ ບັນດາສະຫາຍເລຂາໜ່ວຍພັກ ແລະ ລາຍງານການເຄື່ອນໄຫວວຽກງານອັນພົ້ນເດັ່ນ ຈາກຄະນະ 3 ອົງການຈັດຕັ້ງມະຫາຊົນ ຕໍ່ກອງປະຊຸມ.| ຈາກນັ້ນ ບັນດາສະຫາຍຄະນະປະຈໍາພັກຍັງໄດ້ຍົກໃຫ້ເຫັນເຖິງຄວາມສໍາຄັນໃນການຍົກສູງບົດບາດນໍາພາ-ຄຸ້ມຄອງ ຂອງ ສະມາຊິກພັກລະດັບຜູ້ບໍລິຫານໃນຂົງເຂດວຽກງານເຕັກນິກ ແລະ ການນໍາສະເໜີແລກປ່ຽນບົດຮຽນຄວາມຈໍາເປັນພາວະວິໄສການປັບປຸງກົງຈັກການຈັດຕັ້ງ ລລທ ໃນປີ 2020 ພາຍໄຕ້ການຊີ້ນໍາຂອງຄະນະພັກກະຊວງ ປທສ ແລະ ທິດທາງໃນຕໍ່ໜ້າ ເພື່ອເຮັດໃຫ້ບັນດາສະຫາຍສະມາຊິກພັກທີ່ເຂົ້າຮ່ວມກອງປະຊຸມໃນຄັ້ງນີ້ໄດ້ເຂົ້າໃຈຕໍ່ແນວທາງຂອງຄະນະພັກ-ຄະນະນໍາ ຂັ້ນເທິງ.| ຕອນທ້າຍກອງປະຊຸມຍັງໄດ້ຮຽກຮ້ອງມາຍັງບັນດາສະຫາຍສະມາຊິກພັກ ຈົ່ງນໍາເອົາເນື້ອໃນຈິດໃຈ ຂອງ ກອງປະຊຸມ ໄປຜັນຂະຫຍາຍ, ໝູນໃຊ້ເຂົ້າໃນວຽກງານວິຊາສະເພາະຕົວຈິງປະຈໍາວັນ ແລະ ນໍາໄປເຜີຍແຜ່ໃຫ້ສະມາຊິກທີ່ຢູ່ໃນຄວາມຮັບຜິດຊອບຂອງຕົນໃຫ້ເຂົ້າໃຈ, ກໍາໄດ້ ກ່ຽວກັບນະໂຍບາຍຂອງຄະນະພັກ-ຄະນະຜູ້ອໍານວຍການໃຫ່ຍ ບໍ່ວ່າຈະເປັນວຽກພັກ ກໍ່ຄືວຽກລັດ ໃຫ້ເກີດດອກອອກຜົນ ແລະ ປະກົດຜົນເປັນຈິງ.

View: 32 | 1/8/2021 5:06:36 PM | ກ່ຽວກັບ ລາວ ໂທລະຄົມ

ຍ້ອນກັບ




Copyright © 2021 , All Rights Reserved | Version : 2.0