2/14/2020 4:26:32 PM | ອື່ນໆ...

ຄະນະຜູ້ອໍານວຍການໃຫຍ່ ລລທ ເຂົ້າຮ່ວມກອງປະຊຸມວຽກງານ ປທສ

ໃນຕອນບ່າຍ ວັນທີ 13 ກຸມພາ 2020 ຜ່ານມາ ຄະນະຜູ້ອໍານວຍການ ໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ນໍາໂດຍ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່, ໄດ້ເຂົ້າຮ່ວມ ກອງປະຊຸມວຽກງານ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ເຊິ່ງຈັດໂດຍ ກະຊວງ ປທສ, ທີ່ສູນການຮ່ວມ ມືລາວ-ຢີ່ປຸນ (ຫຼັກ 5), ນະຄອນຫຼວງ ວຽງຈັນ ພາຍໃຕ້ການເປັນປະທານຂອງ ທ່ານ ສົມດີ ດວງດີ ກໍາມະການ ສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງການເງິນ, ມີບັນດາທ່ານລັດຖະມົນຕີ, ຮອງລັດຖະມົນຕີ,ຄະນະ ນໍາກະຊວງ, ຫົວໜ້າກົມ, ຮອງກົມ/ທຽບເທົ່າ, ຫົວໜ້າພະແນກ/ຮອງພະ ແນກ ປທສ ແຂວງ/ນະຄອນຫຼວງ, ຄະນະອໍານວຍການລັດວິສາຫະກິດ, ຕາງໜ້າບັນດາກະຊວງ/ອົງການທຽບເທົ່າ ອ້ອມຂ້າງສູນກາງ ພ້ອມ ດ້ວຍພະນັກງານ ຫຼັກແຫຼ່ງອ້ອມຂ້າງກະຊວງເຂົ້າຮ່ວມ. ກອງປະຊຸມຄັ້ງນີ້ຈັດຂື້ນພາຍໃຕ້ຄໍາຂວັນ “ຊຸກຍູ້ ສົ່ງເສີມ ການຫັນເປັນທັນສະໄໝລະບົບການບໍລິການຂອງລັດດ້ວຍດີຈີຕອນ” ເຊິ່ງມີຄວາມໝາຍຄວາມສໍາຄັນ, ຈໍາເປັນ ແລະ ກ່ຽວຂ້ອງກັບວຽກງານ ຕົວຈິງຂອງ ລາວ ໂທລະຄົມ. ເຊິ່ງຄະນະຜູ້ອໍານວຍການໃຫຍ່ໄດ້ຍົກສູງ ຕໍ່ທິດທາງແຜນການລວມທີ່ ກະຊວງ ປທສ ວາງໄວ້ ແລະ ພ້ອມທີ່ຈະນໍາ ເອົາມາຜັນຂະຫຍາຍ ແລະ ຈັດຕັ້ງປະຕິບັດ ໃນຂົງເຂດວຽກງານຂອງ ຕົນດ້ວຍຄວາມຮັບຜິດຊອບສູງ.