1/20/2020 10:22:17 AM | ອື່ນໆ...

ລາວ ໂທລະຄົມ ເຂົ້າອວຍພອນ ກອງທັບປະຊາຊົນລາວ.

ໃນຕອນເຊົ້າ ວັນທີ 18 ມັງກອນ 2020 ນີ້ ທີ່ຫ້ອງຮັບແຂກສະໂມສອນກະຊວງປ້ອງກັນປະເທດ ຄະນະອໍານວຍການໃຫຍ່ ພ້ອມດວ້ຍຕາງໜ້າຈາກ 3 ອົງການຈັດຕັ້ງມະຫາຊົນ ບໍລິສັດ ລາວ ໂທລະຄົມມະນາຄົມ ມະຫາຊົນ ນໍາໂດຍ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ ໄດ້ເຂົ້າອວຍພອນ ການນໍາກະຊວງປ້ອງກັນປະເທດ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ, ໂດຍໄດ້ຮັບກຽດຕ້ອນຮັບຂອງ ທ່ານ ພົນໂທ ດຣ ທອງລອຍ ສິລິວົງ ກໍາມະການສູນກາງພັກ, ຮອງລັດຖະມົນຕີ, ຫົວໜ້າກົມໃຫຍ່ການເມືອງກອງທັບ ກະຊວງປ້ອງກັນປະເທດ ພ້ອມດ້ວຍຄະນະນໍາ.

ຈຸດປະສົງເພື່ອເປັນການສະແດງຄວາມຮູ້ບຸນຄຸນຕໍ່ພະນັກງານນັກຮົບຜູ້ເສຍສະຫຼະເລືອດເນື້ອໃນພາລະກິດປົດປ່ອຍປະເທດຊາດໃນເມື່ອກ່ອນ, ສະແດງຄວາມເຄົາລົບນັບຖືມາຍັງ ການນໍາ, ນາຍ-ພົນທະຫານ, ພະນັກງານເສຍອົງຄະ, ອາວຸໂສ-ບໍານານ ທົ່ວກໍາລັງປ້ອງກັນຊາດ, ໃນໂອກາດສຸດທີ່ມີຄວາມໝາຍຄວາມສໍາຄັນນີ້ ໃນນາມຄະນະພັກ, ຄະນະອໍານວຍການ ພ້ອມດ້ວຍພະນັກງານ ລາວ ໂທລະຄົມ ທັງໝົດຂໍຝາກຄວາມຢ້ຽມຢາມຖາມຂ່າວ ພ້ອມຄໍາອວຍພອນໄຊອັນອົບອຸ່ນ, ກໍາລັງໃຈ ແດ່ພະນັກງານນັກຮົບທຸກທ່ານໃນທົ່ວຖັນແຖວກໍາລັງປ້ອງກັນຊາດ ຈົ່ງມີສຸຂະພາບພະລະນາໄມທີ່ແຂງແຮງ ສືບຕໍ່ພາລະກິດອັນສູງສົ່ງທີ່ ພັກ-ລັດ ແລະ ປະເທດຊາດ ມອບໝາຍໃຫ້ດ້ວຍຜົນສໍາເລັດອັນໃໝ່ ທີ່ໃຫຍ່ຫຼວງກວ່າເກົ່າ. ລາວ ໂທລະຄົມ ຈະສືບຕໍ່ຕັ້ງໜ້າເຝຶກຝົນຫຼໍ່ຫຼອມອ້າຍນ້ອງພະນັກງານໃຫ້ກາຍເປັນຖັນແຖວໜຶ່ງທີ່ເປັນກໍາລັງແຮງຫຼັກເພື່ອເຂົ້າຮ່ວມແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ. “ ນໍ້າໃຈວັນທີ 20 ມັງກອນ ໝັ້ນຍືນ! ”