11/1/2019 5:10:19 PM | ອື່ນໆ...

ກອງປະຊຸມໃຫຍ່ ຄັ້ງທີ II ຂອງສະຫະພັນແມ່ຍິງ ກະຊວງ ປທສ

ໃນຕອນເຊົ້າ ຂອງ ວັນທີ 29 ຕຸລາ 2019 ສະຫະພັນແມ່ຍິງ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ໄດ້ເປີດກອງປະຊຸມໃຫຍ່ ຄັ້ງທີ II ຂອງຕົນຂຶ້ນ ທີ່ຫ້ອງປະຊຸມໃຫຍ່ ສໍານັກງານບໍລິສັດ ລາວໂທລະຄົມມະນາຄົມ ມະຫາຊົນ, ໂດຍການເປັນປະທານຂອງ ທ່ານ ນາງເກສອນ ສຸລິວົງ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານ ສະຫະພັນແມ່ຍິງ ກະຊວງ ປທສ. ແຂກກິດຕິມະສັກເຂົ້າຮ່ວມກອງປະຊຸມຄັ້ງນີ້ປະກອບມີ: ທ່ານ ດຣ. ນ. ອິນລາວັນ ແກ້ວບຸນພັນ ກໍາມະການສູນກາງພັກ, ປະທານສູນກາງສະຫະພັນແມ່ຍິງລາວ ພ້ອມດ້ວຍຄະນະ, ທ່ານ ບຸນສະເຫຼີມໄຊ ເຄນນາວົງ ຄະນະປະຈໍາພັກ, ຮອງລັດຖະມົນຕີ ກະຊວງ ໄປສະນີ ໂທລະຄົມມມະນາຄົມ ແລະ ການສື່ສານ, ທ່ານຄໍາພູ ດວງຖະໜອມ ຄະນະພັກ, ຫົວໜ້າກົມຈັດຕັ້ງ-ພະນັກງານ ກະຊວງ ປທສ, ອົງການຈັດຕັ້ງຊາວໜຸ່ມ ແລະ ກໍາມະບານ. ນອກນັ້ນ ຍັງມີແຂກຈາກໜ່ວຍພັກບັນດາກົມ, ຮາກຖານບໍລິສັດ, ອາດີດຄະນະສະຫະພັນແມ່ຍິງ, ສະມາຊິກແມ່ຍິງຈາກບັນດາກົມ, ສູນ, ສະຖາບັນ ແລະ ບໍລິສັດ ອ້ອມຂ້າງກະຊວງ ປທສ. ເຊິ່ງມີໜ້າເຂົ້າຮ່ວມທັງໝົດ 218 ທ່ານ.

ທ່ານ ນາງ ເກສອນ ສຸລິວົງ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງ ປທສ ໄດ້ຂຶ້ນຜ່ານບົດລາຍງານການເມືອງ,ໄດ້ສະຫຼຸບຕີລາຄາຜົນການຈັດຕັ້ງປະຕິບັດວຽກງານໃນໄລຍະ 5 ປີ (2014-2019) ແລະ ທິດທາງແຜນການທີ່ຈະຕ້ອງສຸມໃສ່ຈັດຕັ້ງປະຕິບັດໃນ 5 ປີຕໍ່ໜ້າ (2019-2024). ຊຶ່ງໃນໄລຍະຜ່ານມາ ສາມາດຍາດໄດ້ຜົນສໍາເລັດໃນຫຼາຍດ້ານເຊັ່ນ: ການປັບປຸງ ແລະ ຂະຫຍາຍການຈັດຕັ້ງສະຫະພັນແມ່ຍິງລາວ, ການກໍ່ສ້າງພະນັກງານເພດຍິງ ຊຶ່ງໄດ້ເອົາໃຈໃສ່ປະສານສົມທົບກັບພາກສ່ວນກ່ຽວຂ້ອງ ເພື່ອກໍ່ສ້າງ -ບຳລຸງສະມາຊິກສະຫະພັນແມ່ຍິງ ໂດຍອີງຕາມແຜນການກໍ່ສ້າງພະນັກງານ 3 ປະເພດ ( ພະນັກງານນໍາພາ, ພະນັກງານຄຸ້ມຄອງ ແລະ ພະນັກງານວິຊາການ ) ຂອງ ກະຊວງ ປທສ ວາງອອກ, ວຽກງານປົກປ້ອງສິດຜົນປະໂຫຍດຂອງແມ່ຍິງ-ເດັກນ້ອຍ, ການສົ່ງເສີມຄວາມກ້າວໜ້າຂອງແມ່ຍິງ, ແມ່ - ເດັກ ແລະ ການສົ່ງເສີມຄວາມສະເໝີພາບຍິງ-ຊາຍ, ວຽກງານພັດທະນາຊີວິດການເປັນຢູ່ແກ້ໄຂຄວາມທຸກຍາກໃຫ້ແກ່ແມ່ຍິງ ແລະ ຄອບຄົວ. ໂດຍປະຕິບັດຕາມນະໂຍບາຍຂອງພັກ ໃນການຍົກສູງນ້ຳໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ, ຄະນະສະຫະພັນແມ່ຍິງກະຊວງ ປທສ ໄດ້ເອົາໃຈໃສ່ຢ່າງຕັ້ງໜ້າໃນການສຶກສາອົບຮົມແນວຄິດໃຫ້ແກ່ເອື້ອຍນ້ອງແມ່ຍິງ ໃຫ້ມີຄວາມປະຢັດມັດທະຍັດ ບໍ່ໃຊ້ຈ່າຍຟູມເຟືອຍ, ໂດຍການແນະນຳໃຫ້ສ້າງປື້ມຕິດຕາມລາຍຮັບ-ລາຍຈ່າຍໃນຄົວເຮືອນ ສ້າງເງື່ອນໄຂໃຫ້ໜ່ວຍສະຫະພັນແມ່ຍິງແຕ່ລະຮາກຖານ ໄດ້ຊອກຊ່ອງທາງເພື່ອໃຫ້ມີລາຍຮັບເຂົ້າຄັງ. ພ້ອມນີ້ ຄະນະສະຫະພັນແມ່ຍິງ ໄດ້ປຸກລະດົມ ຊຸກຍູ້ພະນັກງານເພດຍິງໃຫ້ມີຄວາມພະຍາຍາມບຸກບືນສູ້ຊົນ ຍົກລະດັບເພື່ອພັດທະນາຕົນເອງຢ່າງຮອບດ້ານເຊີ່ງເຮັດໃຫ້ພະນັກງານເພດຍິງໄດ້ກາຍເປັນພະນັກງານນໍາພາ ວຽກງານຂອງພັກ, ວຽກງານຂອງລັດໃນແຕ່ລະຂັ້ນນັບມື້ນັບຫຼາຍຂຶ້ນ.

ກອງປະຊຸມໄດ້ດໍາເນີນການລົງຄະແນນສຽງເລືອກຕັ້ງເອົາຄະນະບໍລິຫານງານສະຫະພັນແມ່ຍິງ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ຊຸດໃໝ່ ຕາມກົດລະບຽບຂອງສະຫະພັນແມ່ຍິງລາວວາງອອກ, ຊຶ່ງໄດ້ຮັບຮອງຈາກກອງປະຊຸມຄັ້ງປະຖົມມະລຶກ ຈໍານວນ 13 ທ່ານ ເພື່ອເປັນຕົວແທນໃນການຊີ້ນໍາ-ນໍາພາຢູ່ແຕ່ລະຂົງເຂດວຽກງານ.ກອງປະຊຸມຄັ້ງນີ້ໄດ້ເປັນເອກະພາບກັນ ແລະ ຮັບຮອງເອົາ: 1. ທ່ານ ນາງ ເກສອນ ສຸລິວົງ ເປັນປະທານ, 2. ທ່ານ ນາງ ຍອດ ໄຊທົງເດດ ເປັນຮອງປະທານ, ທັງເປັນປະທານກວດກາ, 3. ທ່ານ ນາງ ສີວິໄລ ວົງໄຊຍາ ເປັນຮອງປະທານ.

ໃນຕອນທ້າຍ ທ່ານ ນ. ດຣ ອິນລາວັນ ແກ້ວບຸນພັນ ໄດ້ໃຫ້ກຽດໂອ້ລົມຕໍ່ກອງປະຊຸມ ຊຶ່ງກ່ອນອື່ນໝົດທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດການເຄື່ອນໄຫວວຽກງານ ຂອງສະຫະພັນແມ່ຍິງ ກະຊວງ ປທສ ຕະຫຼອດໄລຍະ 5 ປີ ຜ່ານມາ. ໃນໂອກາດດຽວກັນ, ທ່ານຍັງໃຫ້ທິດຊີ້ນໍາໃນການຈັດຕັ້ງປະຕິບັດວຽກງານໃນຕໍ່ໜ້າ ໂດຍທ່ານໄດ້ເນັ້ນໜັກໃຫ້ຄະນະສະຫະພັນແມ່ຍິງຊຸດໃໝ່ ຈະຕ້ອງໄດ້ສູ້ຊົນ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ II ໃຫ້ເປັນໂຄງການ, ແຜນງານ ເຂົ້າໃນໜ້າທີ່ວຽກງານຕົວຈິງໃນແຕ່ລະຂົງເຂດທີ່ຕົນຮັບຜິດຊອບ. ສຸມສະຕິປັນຍາ, ກໍາລັງວັງຊາ, ຄວາມສາມັກຄີ ເປັນຈິດໜຶ່ງໃຈດຽວ ເພື່ອແບກຫາບພາລະກິດອັນສູງສົ່ງ ແລະ ໜັກໜ່ວງທີ່ກອງປະຊຸມໃຫຍ່ຄັ້ງນີ້ໄດ້ມອບໝາຍໃຫ້ປະສົບຜົນສໍາເລັດຢ່າງຈົບງາມ.