12/21/2016 12:00:00 AM | ກ່ຽວກັບ ລາວ ໂທລະຄົມ

ລາວ ໂທລະຄົມ ໄດ້ຮັບການແຕ່ງຕັ້ງ ຮອງຜູ້ອໍານວຍການໃຫຍ່ຄົນໃໝ່

ອິງໃສ່ຄວາມຮຽກຮ້ອງຕ້ອງການ ທາງດ້ານວຽກງານ ໃນປະຈຸບັນ ແລະ ຕໍ່ໜ້າ, ການປັບປຸງການຈັດຕັ້ງ ແຕ່ຂັ້ນລຸ່ມຈົນຮອດຂັ້ນສຸງ ພາຍໃນອົງກອນຖືໄດ້ວ່າເປັນອີກວຽກງານໜຶ່ງ ທີ່ ລາວ ໂທລະຄົມ ໄດ້ໃຫ້ຄວາມສໍາຄັນ ແລະ ເອົາໃຈໃສ່ປະຕິບັດຕະຫຼອດມາໃນອົງກອນຂອງຕົນ. ດັ່ງນັ້ນໃນຕອນເຊົ້າຂອງ ວັນທີ 6 ມັງກອນ 2017 ຢູ່ທີ່ ຫ້ອງປະຊຸມໃຫຍ່ ຂອງ ລາວ ໂທລະຄົມ ໄດ້ມີພິທີປະກາດ ການແຕ່ງຕັ້ງຮອງຜູ້ອໍານວຍການໃຫຍ່ ລາວ ໂທລະຄົມ ຂື້ນ ເຊິ່ງເປັນກຽດເຂົ້າຮ່ວມເປັນປະທານ ໃນພິທີຄັ້ງນີ້ມີ ທ່ານ ບຸນສະເຫລີມໄຊ ເຄນນາວົງ ຮອງລັດຖະມົນຕີ ກະຊວງໄປສະນີ ໂທລະຄົມມະນາຄົມ -ການສື່ສານ ແລະ ເປັນກຽດເຂົ້າຮ່ວມ ມີ ທ່ານ ຖາວອນ ສົມສະກຸນ ຜູ້ອໍານວຍການໃຫຍ່ ລາວ ໂທລະຄົມ ພ້ອມດ້ວຍຄະນະ ແລະ ຜູ້ບໍລິຫານອ້ອມຂ້າງ ລລທ ສູນກາງ ກໍ່ໄດ້ເຂົ້າຮ່ວມຮັບຟັງຢ່າງພ້ອມພຽງກັນ. ອິງໃສ່ຂໍ້ຕົກລົງ ຂອງ ທ່ານ ນາຍົກລັດຖະມົນຕີ ກະຊວງການເງິນສະບັບເລກທີ 3167/ ປທສ ລົງວັນທີ 8/11/2016 ໄດ້ແຕ່ງຕັ້ງ ທ່ານ ສຸພົນ ຈັນທະວີໄຊ ອະດິດເປັນຫົວໜ້າຝ່າຍ ປະຕິບັດການ ແລະ ພັດທະນາເຄືອຂ່າຍ ຂື້ນເປັນຮອງຜູ້ອໍານວຍການໃຫຍ່ ບໍລິສັດ ລັດວິສາຫະກິດ ລາວ ໂທລະຄົມມະນາຄົມ ຢ່າງເປັນທາງການ . ພາຍຫຼັງທີ່ໄດ້ມີການອ່ານຂໍ້ຕົກລົງແລ້ວ ໃນພິທີຍັງໄດ້ຮັບຟັງບົດໂອ້ລົມ ເພີ່ມຕື່ມ ຈາກ ທ່ານ ບຸນສະເຫລີມໄຊ ເຄນນາວົງ ຮອງລັດຖະມົນຕີ ກະຊວງໄປສະນີ ໂທລະຄົມມະນາ ຄົມ -ການສື່ສານ ທ່ານໄດ້ກ່າວ ຄໍາຍ້ອງຍໍ ຊົມເຊີຍຜົນງານ ທີ່ ລາວ ໂທລະຄົມ ຍາດມາໄດ້ໃນໄລຍະຜ່ານມາ ແລະ ໃຫ້ທິດຊີ້ນໍາໃນການປະຕິບັດວຽກງານໃນຕໍ່ໜ້າອີກດ້ວຍ ແລະ ໃນຕອນທ້າຍຂອງພິທີ ທ່ານ ສຸພົນ ຈັນທະວີໄຊ ຮອງຜູູ້ອໍານວຍການໃຫຍ່ ລາວ ໂທລະຄົມ ໄດ້ຂື້ນກ່າວຮັບຄໍາໂອວາດ ຈາກ ທ່ານ ຮອງລັດຖະມົນຕີກະຊວງ ປທສ ເພື່ອນໍາໄປປະຕິບັດໃຫ້ເກີດຜົນ, ແລະ ຍາດໄດ້ຜົນງານອັນ ໃໝ່ຍິ່ງໃຫຍ່ກວ່າເກົ່າ.