2/20/2018 10:10:12 AM | ກ່ຽວກັບ ລາວ ໂທລະຄົມ

ບໍລິສັດລັດ ວິສາຫະກິດ ລາວ ໂທລະຄົມມະນາຄົມ ດຳເນີນກອງປະຊຸມສະຫລຸບຜົນງານການເຄື່ອນໄຫວວຽກງານ ປະຈໍາປີ 2017

ໃນຕອນບ່າຍຂອງວັນທີ 14 ກຸມພາ 2018 ຢູ່ທີ່່ສຳນັກງານໃຫຍ່ ບໍລິສັດລັດ ວິສາຫະກິດ ລາວໂທລະຄົມມະນາຄົມ, ນະຄອນຫລວງວຽງຈັນ ໄດ້ຈັດກອງປະຊຸມປະຈຳປີ 2017 ຂື້ນຢ່າງເປັນທາງການ, ພາຍໃຕ້ການເປັນປະທານຂອງ ທ່ານ ຖາວອນ ສົມສະກຸນ ຜູ້ອຳນວຍການໃຫຍ່ ບໍລິສັດລັດວິສາ ຫະກິດ ລາວ ໂທລະຄົມມະນາຄົມ, ໃຫ້ກຽດເຂົ້າຮ່ວມມີ ທ່ານ ປະລິນຍາເອກ ທັນສະໄໝ ກົມມະສິດ ລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ, ມີກໍາມະການສະພາຂາຮຸ້ນ, ພ້ອມດ້ວຍແຂກທີ່ຖືກເຊີນ ແລະ ຜູ້ແທນກອງປະຊຸມຈາກ ລລທ ສູນກາງ ແລະ ສາຂາແຂວງທົ່ວປະເທດເຂົ້າຮ່ວມທັງໝົດ 347 ທ່ານ.

ໃນພິທີດັ່ງກ່າວ ທ່ານ ຖາວອນ ສົມສະກຸນ ຜູ້ອຳນວຍການໃຫຍ່ ລາວ ໂທລະຄົມ ໄດ້ຂຶ້ນຜ່ານບົດສະຫລຸບຜົນງານການເຄື່່ອນໄຫວວຽກງານດຳເນີນທຸລະກິດໃນປີ 2017 ແລະ ທິດທາງແຜນການໃນປີ 2018 ຕໍ່ກອງປະຊຸມເຊິ່ງທ່ານໄດ້ຍົກໃຫ້ເຫັນຜົນງານທີ່ພົ້ນເດັ່ນຫລາຍດ້ານທີ່ ລາວ ໂທລະຄົມສາມາດຍາດແຍ່ງມາໄດ້ໃນໜຶ່ງປີຜ່ານມາເປັນຕົ້ນແມ່ນ: ໄດ້ລົງທຶນຂະຫຍາຍຕາໜ່າງລະບົບໂທລະຄົມມະນາຄົມໃນມູນຄ່າທັງໝົດ 82,8 ລ້ານໂດລາສະຫະລັດ;ປະຈຸບັນ ລາວ ໂທລະຄົມ ມີສະຖານີມືຖື 2G, 3G , 4G ແລະ 4.5G ທັງໝົດ 5.711 ສະຖານີ, ມີສັນຍານໂທລະສັບມືຖືຄວບຄຸມໄດ້ 18 ແຂວງ, 148 ເມືອງ 8.500 ກວ່າບ້ານ ໃນນີ້ 2G ກວມ 59%, 3G ກວມ 38% ແລະ 4G ກວມ 10% ຂອງຈຳນວນໝູ່ບ້ານທັງໝົດ ແລະ 4,5 ກວມເອົາ 5% ຂອງຕົວເມືອງໃຫຍ່.

ທັງໝົດເຫຼົ່ານັ້ນມັນໄດ້ກາຍເປັນປັດໃຈຫຼັກທີ່ພັກດັນໃຫ້ ລາວ ໂທລະຄົມ ສາມາດຂະຫຍາຍລູກຄ້າໃໝ່ ແລະ ຮັກສາຈຳນວນລູກຄ້າເກົ່າໄວ້ໄດ້, ມາຮອດປະຈຸບັນມີລູກຄ້າໃຊ້ໂທລະສັບມືຖືໃນລະບົບຈໍານວນ 1.6 ລ້ານເລກໝາຍ, ໂທລະສັບຕັ້ງໂຕະ 40 ພັນເລກໝາຍ, ໂທລະສັບວິນໂຟນ 430 ພັນເລກໝາຍ ແລະ ອິນເຕີເນັດ 1.5 ລ້ານລູກຄ້າ; ໃນປີ 2017 ຜ່ານມາສາມາດສ້າງລາຍຮັບໄດ້ທັງໝົດ 1.843,5 ຕື້ກີບ(ລວມອາກອນ), ເພີ້ມຂື້ນຈາກປີ 2016 ເທົ່າກັບ 1,8%, ໃນນັ້ນມີກໍາໄລສຸດທິ 381 ຕື້ກີບ; ສາມາດປະຕິບັດພັນທະໃຫ້ລັດຖະບານໄດ້ທັງໝົດຈຳນວນ 535,2 ຕື້ກີບ ເຊິ່ງກວມເອົາອັດຕາສ່ວນ 34,7 % ຂອງລາຍຮັບທີ່ ລາວ ໂທລະຄົມ ປະຕິບັດໄດ້ໃນປີ 2017 ນອກຈາກນັ້ນຍັງໄດ້ປັບປຸງລະບຽບ, ນະໂຍບາຍສະຫວັດດີການສັງຄົມຕ່າງໆ ເພື່ອຍົກສູງລະດັບຊີວິດການເປັນຢູ່ໃຫ້ພະນັກງານໃຫ້ດີຂຶ້ນເລື້ອຍໆ ໄປຄຽງຄູ່ກັບການດໍາເນີນທຸລະກິດ ຍັງໄດ້ປະກອບສ່ວນຊ່ວຍເຫລືອ ແລະ ໃຫ້ການອຸປະຖຳຕໍ່ອົງການຈັດຕັ້ງພັກ-ລັດ ແລະ ສັງຄົມເປັນມູນຄ່າ 1,2 ຕື້ກ່ວາກີບ.

ສຳລັບແຜນການປີ 2018 ນີ້, ລາວ ໂທລະຄົມ ຈະສູ້ຊົນສ້າງຖານລູກຄ້າໃຫ້ໄດ້ 3,4 ລ້ານເລກໝາຍ ແລະ ສ້າງລາຍຮັບໃຫ້ໄດ້ທັງໝົດ 1.985,5 ຕື້ກີບ ທຽບໃສ່ປີ 2017 ເພີ່ມຂຶ້ນ 7,7% ຄາດຄະເນກໍາໄລສຸດທິໃຫ້ໄດ້ 409,7 ຕື້ກີບ ເພີ່ມຂຶ້ນ 7,5% ແລະ ຄາດຄະເນວ່າຈະສາມາດມອບພັນທະໃຫ້ລັດຖະບານ

ຈຳນວນ 568 ຕື້ກີບກວມເອົາອັດຕາສ່ວນບໍ່ຫລຸດ 30% ຂອງລາຍຮັບປີ 2018 ນອກຈາກນັ້ນຍັງຈະໄດ້ລົງທຶນໃນເບື້ອງຕົ້ນເຊີ່ງມີມູນຄ່າທັງຫມົດ: 50 ລ້ານໂດລາສະຫະລັດ ເພື່ຶອສືບຕໍ່ປັບປຸງ ແລະ ຂະຫຍາຍຕາໜ່າງລະບົບໂທລະຄົມມະນາຄົມໂດຍສະເພາະແມ່ນອິນເຕີເນັດ Mobile Broadband and Fixed Broadband ໃຫ້ຮັບປະກັນທາງດ້ານປະລິມານ ແລະ ຄຸນນະພາບ, ຂໍ້ມູນມີຄວາມປອດໄພ ແລະ ເປັນລະບົບທັນສະໄໝເພື່ອຮັບປະກັນໃຫ້ແກ່ການບໍລິການສັງຄົມ, ລາວ ໂທລະຄົມ ຈະຂະຫຍາຍສະຖານີມືຖືໃຫ້ໄດ້ 6 ພັນກວ່າສະຖານີໃນຂອບເຂດທົ່ວປະເທດໃນນີ້: ມີສະຖານີ 4,5G ຈຳນນວນ 125 ສະຖານີ ທັງໝົດເຫລົ່ານີ້ກໍເພື່ອໃຫ້ບັນລຸຕາມແຜນຍຸດທະສາດ ແລະ ວິໃສທັດກ້າວໄປສູ່ຍຸກ Lao Digital Life ໃນອີກ 3 ປີຂ້າງໜ້າ ແລະ ສູ້ຊົນນຳເອົາບໍລິສັດ ໃຫ້ກາຍເປັນບໍລິສັດມະຫາຊົນ (IPO) ໃຫ້ສຳເລັດໃນປີ 2018.