3/16/2020 11:16:33 AM | ກ່ຽວກັບ ລາວ ໂທລະຄົມ

ພິທີຖະແຫຼງຂ່າວ ການຮ່ວມມືທາງທຸລະກິດດ້ານການຕະຫຼາດ ລະຫວ່າງບໍລິສັດ ລາວ ໂທລະຄົມມະນາຄົມ ມະຫາຊົນ(ລລທ) ແລະ ບໍລິສັດ ຟໍເຕ ໂຕໂກ ປະກັນໄພວັນທີ 10 ມີນາ 2020 ທີ່ສູນຮຽນຮູ້ ສໍານັກງານໃຫຍ່ ລລທ (ຊັ້ນ 9)

ໃນຕອນບ່າຍວັນທີ: 10 ມີນາ 2020 ຢູ່ທີ່ສູນຮຽນຮູ້ ສໍານັກງານໃຫ່ຍ ລາວ ໂທລະຄົມ ໄດ້ມີພິທີຖະແຫຼງຂ່າວ ການຮ່ວມມືທາງທຸລະກິດດ້ານການຕະຫຼາດ ລະ ຫວ່າງ ບໍລິສັດ ລາວ ໂທລະຄົມມະນາຄົມ ມະຫາຊົນ(ລລທ) ແລະ ບໍລິສັດ ຟໍເຕໂຕໂກ ປະກັນໄພ ຂື້ນ. ໂດຍການເຂົ້າຮ່ວມຂອງແຂກຮັບເຊີນຈາກກະຊວງການເງິນ, ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ(ປທສ) ພ້ອມດ້ວຍຜູ້ບໍລິຫານ ແລະ ພະນັກງານວິຊາການ ທີ່ກ່ຽວຂ້ອງຂອງທັງ 2 ບໍລິສັດ ພ້ອມດ້ວຍສື່ມວນຊົນ. ຝ່າຍ ລາວ ໂທລະຄົມ ໃຫ້ກຽດຖະແຫຼງຂ່າວ ໂດຍ ທ່ານ ທັນສະໄໝ ຊາມຸນຕີ ຫົວໜ້າຄະນະພັດທະນາຄຸນນະພາບການບໍລິການ ບໍລິສັດ ລາວ ໂທລະຄົມມະນາ ຄົມ ມະຫາຊົນ  ແລະ ຝ່າຍ ບໍລິສັດ ຟໍເຕ ໂຕໂກ ຖະແຫຼງຂ່າວໂດຍ Mr. Charles Cheo CEO Group ທ່ານ ທັນສະໄໝ ຊາມຸນຕີ ກ່າວວ່າ ດ້ວຍຄວາມກ້າວໜ້າ ແລະ ທັນສະໄໝຂອງເຕັກໂນໂລຊີສະໄໝໃໝ່ ໄດ້ສ້າງກາລະໂອກາດ ແລະ ເອື້ອອໍານວຍຄວາມສະດວກໃຫ້ທຸລະກິດຫຼາຍຂະແໜງການມີການຂະຫຍາຍໂຕຢ່າງວ່ອງໄວ ແລະ ກ້າວກະໂດດ, ຄຽງຄູ່ກັນນັ້ນ ກໍ່ໄດ້ສ້າງຄວາມ ສະດວກສະບາຍ ແລະ ເພີ້ມທາງເລືອກໃໝ່ໃຫ້ກັບຜູ້ບໍລິໂພກຫຼາຍຂື້ນ,ໃນເມື່ອບັນດາຂະແໜງການທຸລະກິດ ມີການຮ່ວມມື ກັນມັນຍິ່ງ ເຮັດໃຫ້ສາມາດ ຕອບໂຈດ Life style ຂອງຜູ້ຊົມໃຊ້ໄດ້ດີຍິ່ງຂື້ນເຊັ່ນກັນ. ຄືດັ່ງຜະລິດ ຕະພັນ"ສະບາຍໃຈ ໄປໃສໄປກັນ” ແມ່ນຜົນຈາກການຮ່ວມມືກັນລະຫວ່າງ ບໍລິສັດ ລາວ ໂທລະຄົມມະນາຄົມ ມະຫາ ຊົນ ເຊິ່ງເປັນບໍລິສັດຊັ້ນນໍາທາງດ້ານ ການສື່ສານ ໂທລະຄົມມະນາຄົມ ຂອງປະເທດລາວ ມາຍາວນານກວ່າ 23 ປີ ແລະ ບໍລິສັດ ຟໍເຕ ໂຕໂກ ປະກັນໄພ ຜູ້ມີປະສົບການດ້ານທຸລະກິດປະກັນໄພ ຈາກປະເທດ ກໍາປູເຈຍ ຫຼາຍກວ່າ 10 ປີ. Mr. Charles Cheo ໄດ້ກ່າວວ່າ 90% ຂອງປະຊາກອນລາວແມ່ນສາມາດເຂົ້າເຖີງການສື່ສານຜ່ານໂທລະສັບມືຖືໄດ້, ແຕ່ການເຂົ້າເຖີງການປະກັນໄພພັດບໍ່ຮອດ 1% ສະນັ້ນ,ຜະລິດຕະພັນ "ສະບາຍໃຈ ໄປໃສໄປກັນ” ຈຶ່ງຖືກອອກແບບມາສໍາລັບລູກຄ້າຜູ້ໃຊ້ບໍລິການໂທລະສັບມືຖືຂອງ ລາວ ໂທລະຄົມ ໂດຍສະເພາະ ທຸກເທື່ອທີ່ລູກຄ້າສະໝັກ Internet Package ຂອງ ລາວ ໂທລະຄົມ ສາມາດເລືອກເອົາແພັກເກັດທີ່ຄວບຄູ່ກັບປະກັນໄພຂອງ ບໍລິສັດ ຟໍເຕ ໂຕໂກ ປະກັນໄພ ໄດ້ຢ່າງສະດວກສະບາຍເພື່ອຮັບສິດທິພິເສດໃນການຄຸ້ມກັນ ແລະ ລຸດຜ່ອນການການສູນເສຍຈາກອຸປະຕິເຫດເຊັ່ນ: ຄ່າໃຊ້ຈ່າຍໃນຮັກສາປິ່ນປົວເວລານອນໂຮງໝໍ 110,000 ກີບ/ຄືນ, ໄດ້ຮັບຄ່າຊົດເຊີຍສູງສຸດເຖີງ 19,000,000 ລ້ານກີບ ກໍລະນີອຸບັດຕິເຫດສ່ວນບຸກຄົນ, ພິການຖາວອນ ຫຼື ເສຍຊີວິດ ສໍາລັບເງື່ອນໄຂຜູ້ທີ່ໃຊ້ບໍລິການນີ້ແມ່ນເປັນລູກຄ້າຜູ້ທີ່ໃຊ້ໂທລະສັບມືຖື ເບີຕື່ມເງິນ ແລະ ເບີ ເນັດຊີມ ຂອງ ລາວ ໂທລະຄົມ ທົ່ວປະເທດ, ມີອາຍຸລະຫວ່າງ 16-69 ປີ ເປັນຄົນລາວ ຫຼື ຄົນຕ່າງປະເທດທີ່ອາໃສຢູ່ໃນປະເທດລາວ, ຕ້ອງສະໝັກແພັກເກັດຄົບຕາມເກນທີ່ກໍານົດສາມາດເລືອກໄດ້ແຕ່ຕໍ່າຫາສູງ ວິທີການສະໝັກນໍາໃຊ້ກໍບໍ່ໄດ້ຫຍຸ້ງຍາກ ສໍາລັບຜູ້ໃຊ້ບໍລິການເບີ Net Sim: ກົດ *599*ລະຫັດ Package ທີ່ຕ້ອງການ# ໂທອອກ, ສໍາລັບເບີຕື່ມເງິນ: ກົດ *588*ລະຫັດ Package ທີ່ຕ້ອງການ# ໂທອອກ. ລູກຄ້າສະໝັກໃຊ້ບໍລິການເມື່ອໃດຈະໄດ້ຮັບສິດທິການຄຸ້ມກັນທາງປະກັນໄພໃນເດືອນຖັດໄປ. Mr. Charles Cheo ຍັງໄດ້ກ່າວອີກວ່າ ລູກຄ້າໝັ້ນໃຈໄດ້ເພາະພວກເຮົາມີທີມງານຄອຍໃຫ້ຂໍ້ມູນ ແລະ ໃຫ້ຄໍາປຶກສາດ້ານນີ້ໂດຍສະເພາະເຊັ່ນ: ການລົງ ທະບຽນຜ່ານຊ່ອງທາງການກົດໃນໂທລະສັບມືຖື *565# ກົດໂທອອກ, ໂທໄປທີ່ເບີ call center 021 818 888 ຫຼື ຊ່ອງທາງ M-Service ຂອງ ລາວ ໂທລະຄົມ ກໍໄດ້ ສໍາລັບຂັ້ນຕອນການຮຽກຮ້ອງເອົາສິນທົດແທນກໍ່ບໍ່ໄດ້ຫຍຸ້ງ ຍາກ ລູກຄ້າສາມາດໂທໄປທີ່ເບີ call center 021 818888 ເພື່ອຂໍຄວາມຊ່ວຍ ເຫຼືອຈາກເຈົ້າໜ້າທີ່ປະກັນໄພ “ສະບາຍໃຈ” ເພື່ອຮຽກຮ້ອງເອົາສິນທົດແທນ ຫຼື ສາມາດສົ່ງເອກະສານຜ່ານທາງ whatsapp , facebook massenger ເຊິ່ງລູກຄ້າຈະໄດ້ຮັບສິນທົດແທນພາຍໃນ 3 ວັນລັດຖະການ ຫຼັງຈາກໄດ້ຍື່ນເອກະສານຄົບຖ້ວນ ແລະ ຖືກຕ້ອງ. ບໍລິສັດ ຟໍເຕ ໂຕໂກ ປະກັນໄພ ຈໍາກັດ ໄດ້ເລີ້ມດຳເນີນທຸລະກິດໃນເດືອນພຶດສະພາ ປີ 2007 ເປັນບໍລິສັດປະກັນໄພ ຊັ້ນນຳຂອງປະເທດ ກຳປູ ເຈຍ Forte Insurance (Cambodia) Plc ໄດ້ເຂົ້າມາຖືຫຸ້ນໃຫ່ຍໃນປີ 2018. ປັດຈຸບັນນີ້ໃຫ້ບໍລິການປະກັນໄພລົດ, ປະກັນທີ່ຢູ່ອາໄສ, ປະກັນສຸຂະ ພາບກຸ່ມ ແລະ ປະກັນໄພອຸປະຕິເຫດສ່ວນບຸກຄົນ. ຟໍເຕ-ໂຕໂກ ປະກັນໄພ ມີສາຂາໃນແຂວງຫຼວງພະບາງ, ແຂວງຈຳປາສັກ ແລະ ແຂວງສະຫວັນນະເຂດ ແລະ ເຄືອຂ່າຍຕົວແທນໃນ 17 ແຂວງ ທົ່ວປະເທດ. ບໍລິສັດ ລາວ ໂທລະຄົມມະນາຄົມ ມະຫາຊົນ ເປັນບໍລິສັດທໍາອິດທີ່ດໍາເນີນທຸລະ ກິດໃຫ້ບໍລິການທາງດ້ານສື່ສານໂທລະຄົມມະນາຄົມແບບຄົບວົງຈອນໃນ ສປປ ລາວ ນັບແຕ່ ປີ 1996 ເປັນຕົ້ນມາໂດຍການຮ່ວມລົງທຶນລະຫວ່າງ ລັດຖະ ບານ ສປປ ລາວ ແລະ ຂາຮຸ້ນຝ່າຍຕ່າງປະເທດ (Shenington Inve st me nts) ເຖີງປະຈຸບັນເປັນວາລາຍາວນານກວ່າ 23 ປີ, ຕະຫຼອດໄລຍະເວລາທີ່ຜ່ານມາ ລາວ ໂທລະຄົມ ຍາມໃດກໍໄດ້ຍຶດໝັ້ນໃນວິໄສທັດຂອງຕົນຢ່າງໜັກແໜ້ນຄື: ຢຶດໝັ້ນໃນແນວທາງຄວາມຮັບຜິດຊອບສູງຕໍ່ສັງຄົມ ເປັນແນວທາງຫລັກໃນການນຳໃຊ້ເທັກໂນໂລຢີທີ່ເຫມາະສົມ ເພື່ອພັດທະນາການໃຫ້ບໍລິການທີ່ມີຄຸນນະພາບ ເພື່ອຄວາມປະທັບໃຈຂອງຜູ້ໃຊ້ບໍລິການ ເປັນອັນດັບ 1. ແລະ ເຄື່ອນໄຫວພາຍໃຕ້ພາລະບົດບາດຂອງຕົນຢ່າງຕັ້ງໜ້າຄື: ເປັນຜູ້ໃຫ້ບໍລິການໂທລະຄົມມະນາຄົມ ທີ່ມີມາດຕະຖານທຽບເທົ່າກັບສາກົນ ໂດຍໄດ້ມີການພັດທະນາການໃຫ້ບໍລິການຮອບດ້ານ ແລະ ໃຫ້ຄວາມສໍາຄັນຢ່າງສູງຕໍ່ປະເທດຊາດ ແລະ ສັງຄົມ.