1/20/2020 10:41:57 AM | ກ່ຽວກັບ ລາວ ໂທລະຄົມ

ກອງປະຊຸມຈັດຕັ້ງເຊື່ອມຊຶມເອກະສານການກໍ່ສ້າງ ແລະ ປັບປຸງພັກ ໃນຂົງເຂດວິສາຫະກິດຂອງລັດ, ເຜີຍແຜ່ບາງເນື້ອໃນເອກະສານ ມະຕິ 8 ສະໄໝທີ X ຂອງພັກປະຊາຊົນປະຕິວັດລາວ ແລະ ຮັບຟັງການໂອ້ລົມຂອງ ສະຫາຍເລຂາ ຄະນະພັກຮາກຖານ ບໍລິສັດ ລາວ ໂທລະຄົມມະນາຄົມ ມະຫາຊົນ

ໃນຕອນເຊົ້າຂອງວັນທີ 16 ມັງກອນ 2020 ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ເປີດກອງປະຊຸມຈັດຕັ້ງເຊື່ອມຊຶມເອກະສານການກໍ່ສ້າງ ແລະ ປັບປຸງພັກ ໃນຂົງເຂດວິສາຫະກິດຂອງລັດ, ເຜີຍແຜ່ບາງເນື້ອໃນເອກະສານ ມະຕິ 8 ສະໄໝທີ X ຂອງພັກປະຊາຊົນປະຕິວັດລາວ ໂດຍໃຫ້ກຽດເປັນປະທານ ແລະ ເຜີຍແຜ່ເອກະສານ ຂອງ ສະຫາຍ ສຸພົນ ຈັນທະວີໄຊ ເລຂາຄະນະພັກຮາກຖານ, ຜູ້ອໍານວຍການໃຫຍ່ ລລທ, ນອກນັ້ນຍັງມີຄະນະປະຈໍາພັກ, ຄະນະພັກຮາກຖານ, ຄະນະໜ່ວຍພັກ, ສະມາຊິກພັກສົມບູນ ແລະ ສໍາຮອງ ເຂົ້າຮ່ວມທັງໝົດຈໍານວນ 259 ສະຫາຍ, ຍິງ 84 ສະຫາຍ.

ສະຫາຍໄດ້ຍົກໃຫ້ເຫັນຕົວເລກຜົນປະກອບການດໍາເນີນທຸລະກິດປີ 2019, ເຊື່ອມຊຶມເອກະສານການກໍ່ສ້າງ ແລະ ປັບປຸງພັກ ໃນຂົງເຂດວິສາຫະກິດຂອງລັດ ແລະ ເຜີຍແຜ່ບາງເນື້ອໃນເອກະສານ ມະຕິ 8 ສະໄໝທີ X ຂອງພັກປະ ຊາຊົນປະຕິວັດລາວ, ເມື່ອເຊື່ອມຊື່ມເອກະສານສໍາເລັດສະຫາຍໄດ້ເປີດໂອກາດໃຫ້ສະມາຊິກພັກ ທີ່ເຂົ້າຮ່ວມກອງປະ ຊຸມໄດ້ສອບຖາມຂໍ້ຂ້ອງໃຈກ່ຽວກັບເນືື້ອໃນເອກະສານດັ່ງກ່າວທີ່ພົວພັນກັບນະໂຍບາຍພາຍໃນ ລລທ, ຫລັງຈາກນັ້ນສະຫາຍໄດ້ຕອບຂໍ້ຂ້ອງໃຈ, ໃຫ້ຄໍາໂອ້ລົມ ແລະ ຍ້ອງຍໍຊົມເຊີຍຕໍ່ຜົນສໍາເລັດທີ່ສະມາຊິກພັກທຸກສະຫາຍສູ້ຊົນຍາດມາໄດ້, ສະຫາຍຍັງໄດ້ຮຽກຮ້ອງມາຍັງສະມາຊິກພັກ ຈົ່ງກໍາແໜ້ນເນື້ອໃນຈິດໃຈຂອງເອກະສານ, ພ້ອມກັນນັ້ນໃຫ້ນໍາເອົາເນື້ອໃນເອກະສານໄປສຶກສາອົບຮົມການເມືອງແນວຄິດ ໃຫ້ແກ່ພະນັກງານໃນຂົງເຂດທີ່ຕົນຮັບຜິດຊອບເຂົ້າໃຈ ແລະ ຮັບຮູ້ຢ່າງທົ່ວເຖີງຕາມທິດຊີ້ນໍາເປັນຕົ້ນເຊັ່ນ: ແຜນການປັບປຸງກົງຈັກການຈັດຕັ້ງ, ການຄຸ້ມຄອງຄົນ, ການບໍລິຫານແຜນງົບປະມານລາຍຈ່າຍ, ວິທີການປະຢັດຄ່າໃຊ້ຈ່າຍ, ການເຄື່ອນໄຫວວຽກງານ ໃຫ້ພະນັກງານມີຄວາມເຊື້ອໝັ້ນຕໍ່ທິດຊີ້ນໍາຂອງຄະນະພັກ, ຄະນະນໍາຂັ້ນເທິງ ແລະ ພ້ອມກັນປະຕິບັດແຜນດໍາເນີນທຸລະກິດໃນປີ 2020 ໃຫ້ໄດ້ຕານ KPI ກໍານົດໄວ້ .