12/12/2019 5:21:55 PM | ກ່ຽວກັບ ລາວ ໂທລະຄົມ

ພິທີກອງປະຊຸມ ປະກາດການຈັດຕັ້ງ ແລະ ມອບ-ຮັບ ໜ້າທີ່ຂອງ ບໍລິສັດ ລາວ ໂທລະຄົມມະນາຄົມ ມະຫາຊົນ

ໃນຕອນເຊົ້າຂອງວັນທີ 9 ທັນວາ 2019 ທີ່ຫ້ອງປະຊຸມໃຫຍ່ສໍານັກງານບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ມີພິທີ ປະກາດການຈັດຕັ້ງ ແລະ ມອບ-ຮັບໜ້າທີ່ ລະຫວ່າງ ທ່ານ ຖາວອນ ສົມສະກຸນ ຜູ້ອໍານວຍການໃຫຍ່ ລລທ ( ຜູ້ເກົ່າ ) ແລະ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ ລລທ ( ຜູ້ໃໝ່ ), ໂດຍມີ ທ່ານ ປອ ທັນສະໄໝ ກົມມະສິດ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງໄປສະນີ, ໂທລະຄົມມະນາ ຄົມ ແລະ ການສື່ສານ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີ່ພິຍານ, ໂດຍອີງຕາມຂໍ້ຕົກລົງແຕ່ງຕັ້ງ ຂອງລັດຖະມົນຕີ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ວ່າດ້ວຍການແຕ່ງຕັ້ງຜູ້ຊ່ວຍ ຜູ້ອໍານວຍການໃຫຍ່ ແລະ ຂໍ້ຕົກລົງຂອງລັດຖະມົນຕີກະຊວງການເງິນ ວ່າດ້ວຍການແຕ່ງຕັ້ງຄະນະຜູ້ອໍານວຍການບໍລິສັດ ລາວ ໂທລະຄົມມະນາຄົມ ມະຫາຊົນ ຊຸດໃໝ່.

ໃນຕອນທ້າຍຂອງກອງປະຊຸມ ສະຫາຍ ປອ ທັນສະໄໝ ກົມມະສິດ ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ໄດ້ໂອ້ລົມຕັກເຕືອນ ແລະ ໃຫ້ທິດຊີ້ນໍາແກ່ ບັນດາສະຫາຍຜູ້ແທນກອງປະຊຸມ, ກໍ່ຄືຜູ້ທີ່ໄດ້ຮັບໜ້າທີ່ໃໝ່ໃຫ້ສືບຕໍ່ ນໍາພາ-ຊີ້ນໍາ, ສຶກສາອົບຮົມແນວຄິດຂອງສະມາຊິກພັກ, ພະນັກງານໃຫ້ເຂົ້າໃຈ ແລະ ຮັບຮູ້ຢ່າງທົ່ວເຖີງຕໍ່ການສັບປ່ຽນໜ້າທີ່ດັ່ງກ່າວ, ແນ່ໃສ່ເພື່ອບໍ່ໃຫ້ມີການສວຍໂອກາດ, ທັບຖົມໂຈມຕີກັນໃນທາງທີ່ບໍ່ດີ, ອັນໃດທີ່ເປັນຜົນສໍາເລັດທີ່ໄດ້ນໍາພາ ແລະ ຈັດຕັ້ງປະຕິບັດຜ່ານມາໃຫ້ພ້ອມກັນປົກປັກຮັກສາ ແລະ ເສີມຂະຫຍາຍໃຫ້ດີຂື້ນເລື້ອຍໆ, ສ່ວນອັນໃດທີ່ຍັງອ່ອນ ແລະ ຄົງຄ້າງກໍ່ໃຫ້ເລັ່ງປັບປຸງແກ້ໄຂ ພ້ອມກັນນັັ້ນເພື່ອເປັນການຮອງຮັບຕໍ່ການປັບປຸງໃນທົ່ວບໍລິສັດຢ່າງຮອບດ້ານ ໂດຍສະເພາະທາງດ້ານການດໍາເນີນທຸລະກິດໃຫ້ມີຄວາມເຂັ້ມແຂງ ແລະ ທັນສະໄໝ ແລະ ຮັບປະກັນໃນການດໍາເນີນທຸລະກິດ ຂອງບໍລິສັດ ລາວໂທ ລະຄົມມະນາຄົມ ມະຫາຊົນ ໄດ້ດໍາເນີນໄປຢ່າງຖືກຕ້ອງຕາມລະບຽບກົດໝາຍມີຄວາມໂປ່ງໃສສາມາດກວດສອບໄດ້, ມີປະສິດທິຜົນ ແລະ ສອດຄ່ອງກັບມະຕິຂອງກົມການເມືອງສູນກາງພັກ, ວ່າດ້ວຍລະບຽບການຄຸ້ມຄອງພະນັກງານ.