10/25/2019 3:21:43 PM | ກ່ຽວກັບ ລາວ ໂທລະຄົມ

ຄະນະຜູ້ບໍລິຫານ ລາວ ໂທລະຄົມ ເຂົ້າຮ່ວມກອງປະຊຸມລັດຖະມົນຕີ ໄອຊີທີ ອາຊຽນ ຄັ້ງທີ 19

ໃນໂອກາດທີ່ ສປປ ລາວ ກໍຄື ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຮັບກຽດເປັນເຈົ້າພາບຈັດກອງປະຊຸມລັດຖະມົນຕີ ໄອຊີທີ ອາຊຽນ ຄັ້ງທີ 19 (The 19th ASEAN Telecommunications and Information Technology Ministers Meeting –TELMIN) ເຊິ່ງໄດ້ໄຂຂື້ນຢ່າງເປັນທາງການໃນລະຫວ່າງວັນທີ 24-25 ຕຸລາ 2019 ນີ້ ທີ່ ໂຮງແຮມ ແລນມາກ ນະຄອນຫຼວງວຽງຈັນ. ໃນໂອກາດສໍາຄັນດັ່ງກ່າວນີ້ ຄະນະຜູ້ບໍລິຫານ ລາວ ໂທລະຄົມ ເຊິ່ງນໍາໂດຍ ທ່ານ ຖາວອນ ສົມສະກຸນ ຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ພ້ອມດ້ວຍຄະນະ ກໍໄດ້ເປັນກຽດເຂົ້າຮ່ວມກອງປະຊຸມດັ່ງກ່າວໃນຄັ້ງນີ້ດ້ວຍ.

ກອງປະຊຸມ ໃນຄັ້ງນີ້ ຈັດຂື້ນພາຍໃຕ້ ຄໍາຂັວນ “ ສ້າງການເຊື່ອມຈອດທີ່ທັນສະໄໝ ເພື່ອການຫັນເປັນດີຈີຕອນ ຂອງອາຊຽນ ” (Smart Connectivity for ASEAN Digital Transformation) ໃຫ້ກຽດກ່າວເປີດກອງປະຊຸມໂດຍ ພະນະທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ ແລະ ເປັນປະທານກອງປະຊຸມໂດຍ ທ່ານ ປອ ທັນສະໄໝ ກົມມະສິດ, ລັດຖະມົນຕີກະຊວງ ປທສ ຮ່ວມກັບ ທ່ານ ໂກບິນ ສິງດີໂອ (HE. Gobind Singh Deo), ລັດຖະມົນຕີ ກະຊວງການສື່ສານ ແລະ ສື່ມວນຊົນ, ປະເທດ ມາເລເຊຍ ມີບັນດາລັດຖະມົນຕີ ສະມາຊິກ ອາຊຽນ 10 ປະເທດ, ເລຂາທິການໃຫຍ່ອາຊຽນ ແລະ ປະເທດຄູ່ຮ່ວມເຈລະຈາ (ສປ ຈີນ, ຍີ່ປຸ່ນ, ສ.ເກົາຫຼີ, ອິນເດຍ, ເອີລົບ, ອາເມລິກາ, ສະຫະພາບໂທລະຄົມມະນາຄົມສາກົນ (ITU) ແລະ ມີບັນດາລັດຖະມົນຕີ, ຫົວໜ້າຫ້ອງການ ພ້ອມດ້ວຍວິຊາການທີ່ຮັບຜິດຊອບກ່ຽວກັບວຽກງານ ໄອຊີທີ ຈາກບັນດາປະເທດອາຊຽນ ເຂົ້າຮ່ວມ.

ໃນງານດັ່ງກ່າວ ລາວ ໂທລະຄົມ ຍັງໄດ້ມີການຈັດວາງສະແດງ ເຕັກໂນໂລຊີ 5G (Lao Telecom 5G Showcase)ເຊັ່ນ: ການທົດລອງ 5G Speed Test, ເຕັກໂນໂລຊີ Smart Home, Smart Farm, ການວັດຄ່າ PM 2.5 ໃນນະຄອນຫຼວງວຽງຈັນ (Real-Time Air pollution in Vientiane). ໃນໂອກາດດຽວກັນກໍໄດ້ເປັນກຽດຕ້ອນຮັບ ພະນະທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ທັງເປັນລັດຖະມົນຕີ ກະຊວງແຜນການ ແລະ ການລົງທຶນ ເຊິ່ງທ່ານໄດ້ໃຫ້ກຽດ ມາຢ້ຽມຊົມ Booth ວາງສະແດງ ຂອງ ລາວ ໂທລະຄົມ ແລະ ທ່ານຍັງເປັນກຽດສໍາພັດ, ກົດປຸ່ມ Test speed ຄວາມໄວຂອງ ເຕັກໂນໂລຊີ 5G ຂອງ ລາວ ໂທລະຄົມ ອີກດ້ວຍ. ພິເສດໃນງານທີ່ມີຄວາມໝາຍຄວາມສໍາຄັນໃນຄັ້ງນີ້ ລາວ ໂທລະຄົມ ຍັງໄດ້ປະກອບສ່ວນສົ່ງພະນັກງານວິຊາການຂອງຕົນຈໍານວນ 11 ທ່ານເຂົ້າຮ່ວມຮັບໃຊ້ໃນກອງປະຊຸມຄັ້ງນີ້ອີກດ້ວຍ. ລາຍລະອຽດຜົນຂອງກອງປະຊຸມ ສາມາດເຂົ້າ ຕິດຕາມໄດ້ທີ http://www.aseantelmin2019.gov.la/