10/11/2019 4:52:24 PM | ກ່ຽວກັບ ລາວ ໂທລະຄົມ

ກອງປະຊຸມໃຫຍ່ຄັ້ງທີ III ຂອງສະຫະພັນກຳມະບານ ກະຊວງ ປທສ

ໃນວັນທີ 10 ຕຸລາ 2019, ເວລາ 08:00 ໂມງ, ສະຫະພັນກຳມະບານ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ໄດ້ເປີດກອງປະຊຸມໃຫຍ່ຄັ້ງທີ III ຂື້ນຢ່າງເປັນທາງການ ຢູ່ຫ້ອງປະຊຸມ ສູນຮ່ວມມືສາກົນ ລາວ-ຍີ່ປຸ່ນ ICTC ນະຄອນຫຼວງວຽງຈັນ, ໂດຍການເປັນປະທານຂອງ ສະຫາຍ ຄໍາພູ ດວງຖະໜອມປະທານ ສະຫະພັນກໍາມະບານ ກະຊວງ ປທສ ແລະ ໃຫ້ກຽດເຂົ້າຮ່ວມໂດຍ ສະຫາຍ ປ້ານ ນ້ອຍມະນີ ປະທານສູນກາງສະຫະພັນກຳມະບານລາວ, ສະຫາຍ ທອງໃສ ຊານໄຊຍະ ຮອງເລຂາຄະນະພັກ ກະຊວງ ປທສ, ເລຂາຄະນະຊາວໜຸ່ມ ແລະ ປະທານ ສະຫະພັນ ແມ່ຍິງ ກະຊວງ ປທສ ເຊິ່ງມີບັນດາຄະນະບໍລິຫານງານສະຫະພັນກຳມະບານ ກະຊວງ,

ຄະນະກໍາມະບານຮາກຖານ, ຄະນະໜ່ວຍ ພ້ອມດ້ວຍ ສະມາຊິກກໍາມະບານຈາກບັນດາກົມ/ທຽບເທົ່າ, ບັນດາບໍລິສັດ ລັດວິສາຫະກິດ ທີ່ຂື້ນກັບ ກະຊວງ ປທສ ແລະ ແຂກທີ່ຖືກເຊີນເຂົ້າຮ່ວມທັງໝົດ ຈຳນວນ 300 ກວ່າ ສະຫາຍ.

ຈຸດປະສົງຂອງກອງປະຊຸມ ໃນຄັ້ງນີ້ ແມ່ນເພື່ອສະຫຼຸບການປະຕິບັດວຽກງານກຳມະບານໃນໄລຍະ 05 ປີ ຜ່ານມາ ( ຕັ້ງແຕ່ປີ 2015-2019) ແລະ ວາງທິດທາງແຜນການ 05 ປີໃນຕໍ່ໜ້າ (2020-2024),

ກອງປະຊຸມໄດ້ຮັບຟັງ ບົດລາຍງານການເມືອງ ແລະ ບົດສຳຫຼວດການນຳພາຂອງຄະນະບໍລິຫານງານສະຫະພັນກຳມະບານກະຊວງ ເຊິ່ງເນື້ອໃນໄດ້ສັງເກດຕີລາຄາສູງ ຕໍ່ບັນດາຜົນສຳເລັດ ແລະ ຜົນງານໃນການຈັດຕັ້ງປະຕິບັດວຽກງານ ທີ່ຍາດມາໄດ້ ໃນໄລຍະ 5 ປີຜ່ານມາ (ແຕ່ປີ 2015 ຮອດປີ 2019) ພ້ອມກັນນັ້ນ, ກໍ່ໄດ້ຍົກໃຫ້ເຫັນສະພາບໂດຍລວມທີ່ມີທັງດ້ານດີ, ດ້ານອ່ອນ ແລະ ຂໍ້ຄົງຄ້າງ ທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ. ບົດລາຍງາຍການເມືອງໄດ້ກໍານົດຄາດໝາຍຊູ້ຊົນ, ທິດທາງ ແຜນການ 5 ປີຕໍ່ໜ້າ (ແຕ່ປີ 2020 ຮອດປີ 2024.

ສະຫະພັນກໍາມະບານກະຊວງ ປທສ ປະກອບມີ 06 ຮາກຖານ 48 ໜ່ວຍ 95 ຈຸ, ມີສະມາຊິກທັງໝົດ 2,429 ສະຫາຍ, ຍິງ 1,010 ສະຫາຍ ໃນນັ້ນ, ສະມາຊິກສັງກັດຢູ່ຂົງເຂດລັດບໍລິຫານ ມີ 479 ສະຫາຍ, ຍິງ 189 ສະຫາຍ ແລະ ຢູ່ຂົງເຂດລັດວິສາຫະກິດມີ 1,950 ສະຫາຍ, ຍິງ 821 ສະຫາຍ, ຂະຫຍາຍສະມາຊິກກໍາມະບານໄດ້ຈໍານວນ 1,137 ສະຫາຍ.ໃນໄລຍະ 05 ປີຜ່ານມາ ສະຫະພັນກໍາມະບານ ກະຊວງ ປທສ ໄດ້ມີຜົນງານຫຼາຍດ້ານ, ນອກຈາກຜົນສຳເລັດທາງດ້ານວິຊາສະເພາະແລ້ວ ຍັງໄດ້ເອົາໃຈໃສ່ສ້າງຂະບວນການປະຕິບັດຂໍ້ແຂ່ງຂັນ 5 ເປັນເຈົ້າຂອງ ສກລ ວາງອອກ ເຊິ່ງຮາກຖານກໍາມະບານລາວໂທລະຄົມ ເປັນຕົວແບບໄດ້ຮັບນາມມະຍົດເປັນຮາກຖານ 5 ເປັນເຈົ້າ. ຢູ່ບັນດາຮາກຖານໄດ້ມີກອງທຶນຊ່ວຍເຫຼືອເຊີ່ງກັນ ແລະ ກັນ, ໄດ້ມີການເຊັນສັນຍາແຮງງານລວມໝູ່ ແລະ ໄດ້ເອົາໃຈໃສ່ ປົກປ້ອງສິດຜົນປະໂຫຍດອັນຊອບທຳຂອງຜູ້ອອກແຮງງານ.

ກອງປະຊຸມໃຫຍ່ ໄດ້ດໍາເນີນການປ່ອນບັດເລືອກຕັ້ງເອົາຄະນະບໍລິຫານງານສະຫະພັນກໍາມະບານ ກະຊວງ ຊຸດໃໝ່ ໂດຍມີຜູ້ແທນເຂົ້າຮ່ວມສະໝັກຮັບເລືອກຕັ້ງຈຳນວນ 15 ສະຫາຍ, ໃນນັ້ນ, ໄດ້ຄັດເລືອກເອົາ 11 ສະຫາຍ ເຊິ່ງກອງປະຊຸມຄັ້ງປະຖົມມະລຶກ ກໍ່ໄດ້ເປັນເອກະພາບກັນ ແລະ ຮັບຮອງເອົາຢ່າງສົມບູນ ເລືອກເອົາ ສະຫາຍ ສຸດໃຈ ພີມມະສີ ເປັນປະທານ, ສະຫາຍ ຄໍາໄມ ແພງວົງສາ ເປັນຮອງປະທານຜູ້ທີ1, ປະທານກວດກາ, ສະຫາຍ ຄໍາໃບ ພົມຮັກສາ ເປັນຮອງປະທານຜູ້ທີ່2, ແລະ ມີ ກຳມະການ 09 ສະຫາຍ.

ໃນຕອນທ້າຍຂອງກອງປະຊຸມ ສະຫາຍ ປ້ານ ນ້ອຍມະນີ ກໍາມະການສູນກາງພັກ, ປະທານສູນກາງສະຫະພັນກຳມະບານລາວ ໄດ້ໂອ້ລົມ ທີ່ມີຄວາມໝາຍຄວາມສໍາຄັນ, ໜັກແໜ້ນ ແລະ ເຕັມໄປດ້ວຍບົດຮຽນທີ່ລໍ້າຄ່າ ແລະ ທິດຊີ້ນຳໃນການຈັດຕັ້ງປະຕິບັດກອງປະຊຸມໃຫຍ່ ຄໍາໂອ້ລົມດັ່ງກ່າວສະແດງເຖິງຄວາມເປັນຫ່ວງເປັນໄຍ ທັງເປັນການມອບໝາຍໜ້າທີ່, ຄວາມຮັບຜິດຊອບ ແລະ ເປັນບ່ອນອີງ ໃຫ້ແກ່ຄະນະບໍລິຫານງານສະຫະພັນກຳມະບານຊຸດໃໝ່ ເພື່ອຊີ້ນໍາ ນໍາພາ ຂະບວນການວຽກງານກຳມະບານ ກ້າວໄປຢ່າງບໍ່ຢຸດຢັ້ງ, ຊຶ່ງສະຫາຍຍັງໄດ້ຮຽກຮ້ອງໃຫ້ສະມາຊິກກຳມະບານ ຈົ່ງເອົາໃຈໃສ່ເພີ່ມທະວີກໍາແໜ້ນທິດທາງ, ນະໂຍບາຍ ອັນລວມຂອງພັກ-ລັດ ແຕ່ລະໄລຍະ, ກໍາ ແໜ້ນມະຕິກອງປະຊຸມອົງຄະນະພັກ ກະຊວງ ປທສ ເວົ້າລວມ, ເວົ້າສະເພາະ ກໍ່ຄື ມະຕິກອງປະຊຸມໃຫ່ຍກຳມະບານ ທົ່ວປະເທດຄັ້ງທີ VII, ພ້ອມກັນ ຜັນຂະຫຍາຍ ແລະ ຈັດຕັ້ງປະຕິບັດໃຫ້ໄດ້ຮັບຜົນປະສໍາເລັດສູງສຸດ.