10/8/2019 5:26:00 PM | ກ່ຽວກັບ ລາວ ໂທລະຄົມ

ລາວ ໂທລະຄົມ ເປີດທົດລອງນໍາໃຊ້ ລະບົບ 5G

ໃນວັນທີ: 08 ຕຸລາ 2019 ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ເປີດທົດລອງນໍາໃຊ້ ລະບົບ 5G ເປັນຄັ້ງທໍາອິດໃນ ສປປ ລາວ ເຕັກໂນໂລຊີ 5G ຫຼື ການສື່ສານໃນຍຸກທີ 5 (Fifth Generation) ຖືກພັດທະນາຂື້ນໃຫ້ມີປະສິດທິພາບສູງກວ່າ 4G ເພື່ອໃຫ້ສາມາດຕອບສະໜອງຄວາມຕ້ອງການຂອງຜູ້ຊົມໃຊ້ທີ່ປ່ຽນແປງໄປເລື້ອຍໆ, ຄຸນສົມບັດພິເສດຫຼັກໆຂອງເຕັກໂນໂລຊີ5G ທີ່ວ່ານີ້ມີຄື:

ຄວາມໄວ: ຄວາມໄວໃນການຮັບ-ສົ່ງຂໍ້ມູນທີ່ໄວກວ່າ 4G ເຖີງ 20 ເທົ່າ ຕົວຢ່າງ: ເມື່ອໂຫຼດໜັງທີ່ມີຄວາມຍາວ 2 ຊົ່ວໂມງ 4G ຈະໃຊ້ເວລາປະມານ 6-7 ນາທີ ໃນຄະນະທີ່ 5G ຈະໃຊ້ເວລາພຽງ 3-4 ວິນາທີ, ການເບິ່ງໜັງທີ່ມີຄວາມລະອຽດສູງລະດັບ HD 4K ຈະບໍ່ເປັນອຸປະສັກອີກຕໍ່ໄປ, ສາມາດປົດລ໋ອກຄຸນສົມບັດສູງສຸດຂອງ AR (Augmented Reality) ແລະ VR ( Virtual Reality) ກັບປະສົບການທີ່ສົມຈິງທີ່ເກີດຈາກການໃຊ້ຂໍ້ມູນຈໍານວນຫຼາຍໃນການປະມວນຜົນ ເຊິ່ງ 5G ຈະຕອບໂຈດການສື່ສານຜ່ານ AR ແລະ VR ໄດ້ຢ່າງສົມບູນແບບ.

ຄວາມສາມາດຮອງຮັບການເຊື່ອມຕໍ່: ຈໍານວນການເຊື່ອມຕໍ່ທີ່ສາມາດຮອງຮັບອຸປະກອນໄດ້ຫຼາຍກວ່າ 4G 10 ເທົ່າ ຫຼື ເທົ່າກັບ 1,000,000 ອຸປະກອນ/sq.km ດ້ວຍລະບົບ 5G ຈະເປີດໂລກ IOT (Internet of Things)ໄດ້ຢ່າງແທ້ຈິງ ແລະ ຈະເປັນພື້ນຖານເພື່ອຮອງຮັບການພັດທະນາເຕັກໂນໂລຊີ Smart Home, Smart City, Smart Transportation ,Smart life, Smart health ແລະ ອຶ່ນໆໂດຍສັ່ງການຜ່ານມືຖືຂອງຄົນເຮົາໄດ້ ຫຼື ອຸປະ ກອນແຕ່ລະຊະນິດສາມາດສື່ສານກັນເອງໄດ້, ຄວບຄຸມກັນໄດ້ ແລະ ເຮັດວຽກປະສານກັນໄດ້ຢ່າງອັດຕະໂນມັດ.

ເວລາໃນການຕອບສະໜອງ/ໂຕ້ຕອບ: ສັ້ນລົງ ເຖີງ 1 ມິນລີວິນາທີ (1 ms) ດ້ວຍຄຸນສົມບັດພິເສດດັ່ງ ກ່າວ 5G ຈະສາມາດຕອບໂຈດ ໃນສ່ວນຂອງກຸ່ມຄົນທີ່ມັກຫຼີ້ນເກມເຊິ່ງຕ້ອງການຄວາມໄວໃນການໂຕ້ຕອບສູງ ຫຼື ເວົ້າອີກຢ່າງຄືຖ້າ Latency ຍິ່ງຕໍ່າແມ່ນຍີ່ງດີ, ຕອບໂຈດການຂັບຂີ່ແບບບໍ່ມີຄົນຂັບທີ່ມີຄວາມປອດໄພສູງ ແລະ ນໍາໃຊ້ໃນທາງການແພດເຊັ່ນ: ການຜ່າຕັດທາງໄກ ແລະ ອຶ່ນໆ.

ເມື່ອເບິ່ງຢ້ອນຄືນກັບໄປໃນອາດີດຈົນເຖີງປະຈຸບັນເຮົາຈະເຫັນວ່າ ການສື່ສານແບບໄຮ້ສາຍໄດ້ຖືກພັດທະນາໄປຢ່າງໄວວາ ແລະ ເຮັດໄດ້ຫຼາຍຢ່າງຂື້ນໄປເລື້ອຍໆ. ໃນນາມ ລາວ ໂທລະຄົມ ທີ່ເປັນໜຶ່ງໃນຜູ້ໃຫ້ບໍລິການດ້ານສື່ສານໂທລະຄົມມະນາຄົມ ກໍບໍ່ໄດ້ລົດລະໃນການພັດທະນາຕົນເອງ ເພື່ອນໍາເອົາເຕັກໂນໂລຊີໃໝ່ໆ ທີ່ທັນສະໄໝ ແລະ ກ້າວໜ້າມາໃຫ້ບໍລິການແກ່ສັງຄົມລາວຕະຫຼອດມາ, ການທົດລອງນໍາໃຊ້ໃນຄັ້ງນີ້ຖືເປັນຂີດໝາຍອັນສໍາຄັນຂອງວຽກງານການສື່ສານ ໂທລະຄົມມະນາຄົມ ຂອງລາວ ເວົ້າລວມ, ເວົ້າສະເພາະກໍຄື ລາວ ໂທລະຄົມ ແລະ ຜູ້ຊົມໃຊ້ໃນລາວ ຈະໄດ້ສໍາພັດປະສົບການໃໝ່ທາງດ້ານການສື່ສານລະດັບໂລກ ແລະ ເຊື່ອໝັ້ນວ່າອີກບໍ່ດົນໃນອານາຄົດອັນໃກ້ໆນີ້ ລາວ ໂທລະຄົມ ຈະໃຫ້ໄດ້ເປີດໃຫ້ບໍລິການ ລະບົບ 5G ຢ່າງເຕັມຮູບແບບຢ່າງແນ່ນອນ.

ເພື່ອເປັນການຜັນຂະຫຍາຍ ແນວທາງຂອງພັກ,ນະໂຍບາຍຂອງລັດກ່ຽວກັບການຫັນບັນດາທຸລະກິດທີ່ມີທ່າແຮງເປັນທັນສະໄໝ ແລະ ສອດຄ້ອງກັບແຜນຍຸດທະສາດ 5 ປີ (2016-2020) ຂອງ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ເວົ້າລວມ, ເວົ້າສະເພາະ ກໍຄືຍຸດທະສາດ ພັດທະນາອຸດສາຫະກໍາ ໄອຊີທີ ຂອງກະຊວງ ປທສ, ກາຍເປັນເຄື່ອງມືທີ່ສໍາຄັນ ໃນການຂັບເຄື່ອນການພັດທະນາເສດຖະກິດ-ສັງຄົມໃຫ້ເຂັ້ມແຂງຍືນຍົງ ແລະ ເປັນຈຸດເຊື່ອມໂຍງ ກັບພາກພື້ນ ແລະ ສາກົນ ເທື່ອລະກ້າວ. ເພື່ອເຮັດໃຫ້ບັນລຸແນວທາງນະໂຍບາຍ ແລະ ຍຸດທະສາດດັ່ງກ່າວ ລລທ ໄດ້ເອົາໃຈໃສ່ພັດ ທະນາວຽກງານ ແລະ ທຸລະກິດຂອງຕົນໃຫ້ດີທີ່ສຸດຕະຫຼອດມາ. ໂດຍສະເພາະການເປີດທົດລອງນໍາໃຊ້ 5G ໃນມື້ນີ້ ຖືໄດ້ວ່າເປັນອີກບາດກ້າວໜຶ່ງໃນຄວາມພະຍາຍາມຂອງ ລາວ ໂທລະຄົມໃນການນຳເອົາ ເຕັກນິກວິທະຍາສາດ ເຕັກໂນໂລຊີໃໝ່ທີ່ກ້າວໜ້າ ແລະ ທັນສະໄໝໄດ້ມາດຕະ ຖານທຽບເທົ່າກັບສາກົນ ຕອບສະໜອງຄວາມຕ້ອງການຂອງສັງຄົມ ບໍ່ວ່າຢູ່ໃນຊີວິດປະຈໍາວັນ ກໍຄືການໜູນໃຊ້ເຂົ້າໃນຂົງເຂດເສດຖະກິດ ເພື່ອເຮັດໃຫ້ສັງຄົມລາວກ້າວໄປສູ່ສັງຄົມທີ່ທັນຍຸກທັນສະໄໝໃນຍຸກແຫ່ງ Digital Life ເທື່ອລະກ້າວ.ພ້ອມດຽວກັນກໍເປັນການ ສົ່ງເສີມການພັດ ທະນາທຸລະກິດ ໂທລະຄົມມະນາຄົມ ໃຫ້ທຽບທັນ ແລະ ສາມາດເຊື່ອມໂຍງກັບບັນດາປະເທດໃນຂົງເຂດພາກພື້ນ ແລະ ສາກົນ.

ບໍລິສັດ ລາວ ໂທລະຄົມມະນາຄົມ ມະຫາຊົນ ເປັນບໍລິສັດທໍາອິດ ທີ່ດໍາເນີນທຸລະກິດໃຫ້ບໍລິການທາງດ້ານສື່ສານໂທລະຄົມມະນາ ຄົມແບບຄົບວົງຈອນໃນ ສປປ ລາວ ນັບແຕ່ ປີ 1996 ເປັນຕົ້ນມາ ຈົນເຖີງປະຈຸບັນເປັນວາລາຍາວນານກວ່າ 23 ປີ, ຕະຫຼອດໄລຍະເວລາທີ່ຜ່ານມາ ລາວ ໂທລະຄົມ ຍາມໃດກໍໄດ້ຍຶດໝັ້ນໃນວິໄສທັດຂອງຕົນຢ່າງໜັກແໜ້ນຄື: ຢຶດໝັ້ນໃນແນວທາງຄວາມຮັບຜິດຊອບສູງຕໍ່ສັງຄົມ ເປັນແນວທາງຫລັກໃນການນຳໃຊ້ເທັກໂນໂລຢີທີ່ເຫມາະສົມ ເພື່ອພັດທະນາການໃຫ້ບໍລິການທີ່ມີຄຸນນະພາບ ເພື່ອຄວາມປະທັບໃຈຂອງຜູ້ໃຊ້ບໍລິການ ເປັນອັນດັບ 1. ແລະ ເຄື່ອນໄຫວພາຍໃຕ້ພາລະບົດບາດຂອງຕົນຢ່າງຕັ້ງໜ້າຄື: ເປັນຜູ້ໃຫ້ບໍລິການໂທລະຄົມມະນາຄົມ ທີ່ມີມາດຕະຖານທຽບເທົ່າກັບສາກົນ ໂດຍໄດ້ມີການພັດທະນາການໃຫ້ບໍລິການຮອບດ້ານ ແລະ ໃຫ້ຄວາມສໍາຄັນຢ່າງສູງຕໍ່ປະເທດຊາດ ແລະ ສັງຄົມ.