8/1/2020 11:25:15 AM | ກ່ຽວກັບ ລາວ ໂທລະຄົມ

ລາວ ໂທລະຄົມ ເປີດກອງປະຊຸມ ຜູ້ຕາງໜ້າ ຜູ້ຖືຮຸ້ນ ລລທ ສະໄໝວິສາມັນຄັ້ງທີ I ປະຈຳປີ 2020

ໃນຕອນເຊົ້າ ຂອງ ວັນທີ 30 ກໍລະກົດ 2020 ທີ່ຜ່ານມາ ຢູ່ຫ້ອງປະຊຸມ ຊັ້ນ 3 ຫ້ອງ 305 ສໍານັກງານໃຫຍ່ ລາວ ໂທລະຄົມ ນະຄອນຫຼວງວຽງຈັນ ໄດ້ເປີດກອງປະຊຸມ ຜູ້ຕາງໜ້າຜູ້ຖືຮຸ້ນ ລລທ ສະໄໝວິສາມັນຄັ້ງທີ I ປະຈຳປີ 2020 ພາຍໃຕ້ການເປັນປະທານຂອງ ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງ ການເງິນ, ທັງເປັນປະທານກອງປະຊຸມຜູ້ຕາງໜ້າຜູ້ຖືຮຸ້ນ ລລທ, ທີ່ ສປປ ລາວ ປະກອບມີ ຝ່າຍລັດຖະບານ ສປປ ລາວ ແລະ ຜູ້ຖືຮຸ້ນຝ່າຍຕ່າງປະເທດ (Shenington) ທັງ 2 ຝ່າຍ ແລະ ບັນດາຄະນະອຳນວຍການໃຫຍ່, ການປະຊຸມແມ່ນຜ່ານລະບົບ Online ( Zoom) ແຂກຖືກເຊີນເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ພິຈາລະນາ ແລະ ຮັບຮອງບັນຫາສຳຄັນດັ່ງລຸ່ມນີ້: - ຮັບຟັງການລາຍງານຜົນການດຳເນີນທຸລະກິດປະຈຳ 6 ເດືອນຕົ້ນປີ 2020 ແລະ ແຜນການ 6 ເດືອນ ທ້າຍປີ 2020 ຂອງ ກຸ່ມ ບໍລິສັດ ລາວ ໂທລະຄົມມະນາຄົມ ມະຫາຊົນ, ກອງປະຊຸມໄດ້ສະແດງຄວາມຊົມເຊີຍຕໍ່ກັບຜົນສຳເລັດທີ່ຍາດມາໄດ້ຂອງ ກຸ່ມ ບໍລິສັດ ລາວ ໂທລະຄົມມະນາຄົມ ມະຫາຊົນ ທ່າມກາງສະພາບການແພ່ລະບາດຂອງພະຍາດ Covid 19 ແລະ ຄວາມຫຍຸ້ງຍາກຫລາຍດ້ານ ຂອງ ການດຳເນີນງານໃນ 6 ເດືອນຕົ້ນປີ 2020 ຜ່ານມາ.

- ໄດ້ຮັບຮອງ ແລະ ອະນຸມັດຕົວຄູນເງິນໂບນັດ 6 ເດືອນຕົ້ນປີ 2020 ໃຫ້ຜູ້ບໍລິຫານ ແລະ ພະນັກງານ ກຸ່ມບໍລິສັດ ລາວ ໂທລະຄົມມະນາຄົມ ມະຫາຊົນ ທົ່ວປະເທດ. - ໄດ້ພິຈາລະນາເຫັນດີຮັບຮອງການແຕ່ງຕັ້ງຄະນະອໍານວຍການບໍລິສັດ T Plus ຈໍາກັດ ຊຸດໃໝ່. - ໄດ້ພິຈາລະນາຮັບຮອງເອົາຄວາມຄືບໜ້າ ການດໍາເນີນງານ 6 ເດືອນຕົ້ນປີ 2020 ແລະ ແຜນການດໍາເນີນທຸລະກິດຂອງ ບໍລິສັດ ລາວ ໂມບາຍ ມັນນີ ຈໍາກັດຜູ້ດຽວ (lao mobile money) ໃນ 6 ເດືອນ ທ້າຍປີ 2020.

ນອກຈາກນັ້ນບັນດາຜູ້ຕາງໜ້າຜູ້ຖືຮຸ້ນທັງສອງຝ່າຍຍັງໄດ້ໃຫ້ທິດແນະນຳ,ຊີ້ນຳຫຼາຍບັນຫາຕໍ່ທິດທາງ ແລະ ແຜນການສູ້ຊົນໃນປີ 2020 ເພື່ອໃຫ້ຜູ້ບໍລິຫານ ແລະ ພະນັກງານ ລາວ ໂທລະຄົມ ຍາດໄດ້ຜົນສໍາເລັດໃໝ່ ແລະ ຍິ່ງໃຫຍ່ກວ່າເກົ່າ.