9/13/2019 5:45:12 PM | ກ່ຽວກັບ ລາວ ໂທລະຄົມ

ສະຫາຍ ປອ ທັນສະໄໝ ກົມມະສິດ ໂອ້ລົມຕໍ່ ກອງປະຊຸມຄະນະພັກຮາກຖານ ລລທ ຄັ້ງທີ V.

ສະຫາຍ ປອ ທັນສະໄໝ ກົມມະສິດ ເລຂາຄະນະພັກກະຊວງ, ລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໄດ້ໃຫ້ກຽດເຂົ້າຮ່ວມ ກອງປະຊຸມຄະນະພັກຮາກຖານ ບໍລິສັດ ລາວໂທລະຄົມມະນາຄົມ ມະຫາຊົນ (ລລທ), ໃນຕອນເຊົ້າຂອງວັນທີ 10 ກັນຍານີ້, ທີ່ຫ້ອງປະຊຸມໃຫຍ່ສໍານັກງານ ລລທ. ພາຍໃຕ້ການເປັນປະທານ ຂອງສະຫາຍ ຖາວອນ ສົມສະກຸນ ຄະນະພັກກະຊວງ ປທສ, ເລຂາຄະນະພັກຮາກຖານ ລລທ ມີບັນດາເລຂາໜ່ວຍພັກ ແລະ ຄະນະພັກຮາກຖານທີ່ ຂຶ້ນກັບ ອົງຄະນະພັກກະຊວງ ປທສ ແລະ ຂຶ້ນກັບຮາກຖານພັກ ລລທ ພ້ອມດ້ວຍແຂກທີ່ຖືກເຊີນເຂົ້າຮ່ວມຢ່າງພ້ອມພຽງ,

ສະຫາຍ ຖາວອນ ສົມສະກຸນ ໄດ້ສະຫຼຸບຕີລາຄາຄືນແຜນການເຄື່ອນໄຫວວຽກງານ, ການຊີ້ນໍາ-ນໍາພາຂອງ ຄະນະພັກຮາກຖານ ລລທ ໃນໄລຍະຜ່ານມາ (2014-2018) ແລະ ວາງທິດທາງແຜນການທີ່ຈະຕ້ອງສຸມໃສ່ໃນຕໍ່ໜ້າ (2019-2023). ໃນໄລຍະຜ່ານມາ ຄະນະພັກຮາກຖານ ລລທ ໄດ້ເອົາໃຈໃສ່ ນໍາພາສະມາຊິກພັກ-ພະນັກງານ ປະຕິບັດໜ້າທີ່ວຽກງານວິຊາສະເພາະ ທີ່ຖືກມອບໝາຍດ້ວຍຄວາມຕັ້ງໜ້າ ແລະ ມີຄວາມຮັບຜິດຊອບສູງ ຊຶ່ງໄດ້ສະແດງອອກຈາກຜົນສຳເລັດອັນພົ້ນເດັ່ນໃນຫຼາຍໆວຽກງານ ເຊັ່ນ: ວຽກງານຮັກສາຄວາມປອດໄພ ພາຍໃນບໍລິສັດ ໂດຍຫັນເອົາ ໄອຊີທີ ທີ່ທັນສະໄໝ ມານໍາໃຊ້ເຂົ້າໃນລະບົບປ້ອງກັນເຊັ່ນ: ລະບົບກ້ອງວົງຈອນປິດ, ລະບົບເຕືອນໄພ, ການນໍາລະຫັດຜ່ານເຂົ້າ-ອອກປະຕູ, ການຈໍ້າໂປ້ມືໃນການຄຸ້ມຄອງພະນັກງານ. ການຈັດຕັ້ງປະຕິບັດວຽກງານການຜະລິດທຸລະກິດ ແລະ ວິຊາສະເພາະ, ເອົາໃຈໃສ່ບໍາລຸງ, ກໍ່ສ້າງພະນັກງານເປັນລະບົບຄົບຊຸດ, ຮັບປະກັນໃຫ້ພະນັກງານມີຄວາມຮູ້ ຄວາມສາມາດທາງດ້ານເຕັກນິກວິຊາການ, ການບໍລິຫານທຸລະກິດ ແລະ ທິດສະດີການເມືອງການປົກຄອງ ເຮັດໃຫ້ການຈັດຕັ້ງປະຕິບັດ ໜ້າທີ່ການເມືອງໃນໄລຍະໃໝ່ມີຄວາມຄ່ອງຕົວ ແລະ ມີຜົນສໍາເລັດໄປໄດ້ດ້ວຍດີ. ປະຈຸບັນຮາກຖານພັກ ລລທ ປະກອບມີ: 9 ໜ່ວຍພັກ, ສະມາຊິກພັກ 294 ສະຫາຍ, ຍິງ 83 ສະຫາຍ, ສໍາຮອງ 20 ສະຫາຍ, ຍິງ 7 ສະຫາຍ. ຕະຫຼອດໄລຍະ 05 ປີ ຄະນະພັກ, ສະມາຊິກພັກແຕ່ລະສະຫາຍ ໄດ້ສຸມໃສ່ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ດ້ວຍຄວາມຮັບຜິດຊອບສູງ ແລະ ມີຜົນສໍາເລັດຕາມທິດທາງທີ່ວາງໃວ້.

ໃນໂອກາດດຽວກັນ, ກອງປະຊຸມຍັງໄດ້ຮັບຮອງເອົາ ບົດລາຍງານການເມືອງ ແລະ ທິດທາງແຜນການທີ່ຈະສຸ້ຊົນໃນຕໍ່ໜ້າ ແລະ ບົດສໍາຫຼວດການນໍາພາລວມຂອງຄະນະພັກຮາກຖານ ໃນໄລຍະຜ່ານມາ. ພ້ອມນີ້, ກໍ່ໄດ້ມີການປ່ອນບັດຄັດເລືອກເອົາຄະນະພັກຮາກຖານ ລລທ ຊຸດໃໝ່ ແລະ ໄດ້ເປີດກອງປະຊຸມຄັ້ງປະຖົມມະລຶກ ໂດຍຜົນກອງປະຊຸມໄດ້ຕົກລົງຮັບຮອງເອົາຄະນະພັກຮາກຖານ ລລທ ຊຸດໃໝ່ ຈໍານວນ 09 ສະຫາຍ ຄື: 1 ສະຫາຍ ສຸພົນ ຈັນທະວີໄຊ ເປັນເລຂາ, 2 ສະຫາຍ ລັດຖະປັນຍາ ຂຽວວົງພະຈັນ ເປັນຮອງເລຂາ,ທັງເປັນປະທານກວດກາພັກ ແລະ ອີກ 7 ສະຫາຍເປັນກຳມະການຄະນະພັກຮາກຖານ ລລທ ໃນການສືບຕໍ່ ນໍາພາ ສະມາຊິກພັກ ຈັດຕັ້ງປະຕິບັດວຽກງານ ໃຫ້ໄດ້ຮັບຜົນສໍາເລັດຢ່າງສະຫງ່າງາມ.

ໃນຕອນທ້າຍ ສະຫາຍ ປອ ທັນສະໄໝ ກົມມະສິດ ໄດ້ໃຫ້ທິດຊີ້ນໍາ ແລະ ໂອ້ລົມຕໍ່ກອງປະຊຸມ ຊຶ່ງທ່ານໄດ້ເນັ່ນໜັກໃຫ້ສະມາຊິກພັກທຸກສະຫາຍເອົາໃຈໃສ່ຄົ້ນຄວ້າເຊື່ອມຊືມແນວທາງ, ນະໂຍບາຍ, ກົດລະບຽບພັກ ແລະ ລະບຽບການຕ່າງໆຂອງລັດ, ກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ ທາງດ້ານການເມືອງ-ແນວຄິດ, ການຈັດຕັ້ງ, ແບບແຜນວິທີການນໍາພາ ຊຸກຍູ້, ຕິດຕາມ, ກວດກາບັນດາໜ່ວຍພັກ ແລະ ກໍ່ສ້າງມະຫາຊົນເພື່ອຂະຫຍາຍເຂົ້າເປັນສະມາຊິກພັກ. ສຶກສາອົບຮົມການເມືອງແນວຄິດໃຫ້ສະມາຊິກພັກ, ພະນັກງານມະຫາຊົນ ທີ່ຢູ່ໃນຄວາມຮັບຜິດຊອບຂອງຕົນ, ຕິດຕາມກວດກາການເຄື່ອນໄຫວຂອງບັນດາໜ່ວຍພັກ, ສະມາຊິກພັກທີ່ຂຶ້ນກັບ ຢ່າງເປັນປົກກະຕິ ເພື່ອເສີມຂະຫຍາຍດ້ານຕັ້ງໜ້າ ແລະ ແກ້ໄຂດ້ານອ່ອນໃຫ້ທັນເວລາ. ພ້ອນນັ້ນ ສະຫາຍຍັງໄດ້ເນັ່ນຕື່ມ ໃຫ້ບັນດາສະຫາຍຄະນະພັກຮາກຖານທີ່ໄດ້ຮັບການເລືອກຕັ້ງຈົ່ງສຸມສະຕິປັນຍາ, ກໍາລັງວັງຊາ, ຄວາມສາມັກຄີເປັນຈິດໜຶ່ງໃຈດຽວ ເພື່ອແບກຫາບພາລະກິດອັນສູງສົ່ງ ແລະ ໜັກໜ່ວງທີ່ກອງປະຊຸມໄດ້ມອບໝາຍ ໃຫ້ປະສົບຜົນສໍາເລັດເປັນຢ່າງດີ.