7/8/2019 8:51:29 AM | ກ່ຽວກັບ ລາວ ໂທລະຄົມ

ລາວ ໂທລະຄົມ ຮ່ວມເປີດຮ້ານວາງສະແດງສິນຄ້າ ໃນງານ ເຕັກໂນໂລຊີ ສື່ສານຂໍ້ມູນຂ່າວສານ ( LAO ICT EXPO 2019)

ໃນລະຫວ່າງ ວັນທີ 25-30 ມັງກອນ 2019 ທີ່ຜ່ານມາ ທີ່ ໂຮງແຮມດອນຈັນພາເລດ ລາວ ໂທລະຄົມ ໄດ້ເຂົ້າຮ່ວມເປີດຮ້ານວາງສະແດງສິນຄ້າ ໃນງານເຕັກໂນໂລຊີ ສື່ສານ ຂໍ້ມູນຂ່າວສານ ຫຼື LAO ICT EXPO 2019 ເຊຶ່ງໃຫ້ກຽດກ່າວເປີດງານໂດຍ: ທ່ານ ປອ ທັນສະໄໝ ກົມມະສິດ ລັດຖະມົນຕີ ກະຊວງ ປທສ ແລະ ໃຫ້ກຽດເຂົ້າຮ່ວມໃນຄັ້ງນີ້ ໂດຍ ທ່ານ ທອງລຸນ ສີສຸລິດ ນາຍົກລັດຖະມົນຕີ ສປປລາວ ນອກຈາກນັ້ນຍັງມີບັນດາແຂກທີ່ຖືກເຊີນ ຈາກບັນດາກະຊວງ, ອົງກອນທຽບເທົ່າ, ສະຖາບັນການສຶກສາ ແລະ ບໍລິສັດຕ່າງໆ ເຂົ້າຮ່ວມຢ່າງພ້ອມ ພຽງ.

ງານວາງສະແດງຄັ້ງນີ້ ໄດ້ມີບັນດາບໍລິສັດໄອຊີທີ ແຖວໜ້າຈາກພາຍໃນ ແລະ ຕ່າງປະເທດ ເຂົ້າຮ່ວມວາງສະແດງ ໄດ້ມີການສະແດງຫຼາກຫຼາຍ ຜະລິດຕະພັນ ເຕັກໂນໂລຊີ ສື່ສານຂໍ້ມູນຂ່າວສານ ບໍ່ວ່າຈະເປັນ ດ້ານ ໂທລະຄົມມະນາຄົມ, ດ້ານຄອມພິວເຕີ ຮາດແວ ແລະ ຊອບແວ, ເຕັກໂນໂລຊີ ລະບົບຄວາມປອດໄພ, ລະບົບໂປ ແກຣມຮັບໃຊ້ ແລະ ສົ່ງເສີມການນຳໃຊ້ ໄອຊີທີ ການບໍລິການ ແລະ ສະຕາດອັບ ( Startup ) , ການຄ້າ,ການເງິນ, ການຜະລິດ, ກະສິກຳ, ການສຶກສາ ແລະ ອື່ນໆ ໃນນັ້ນກໍ່ມີບັນດາກອງປະຊຸມ ແລະ ສຳມະນາທີ່ໜ້າສົນໃຈອີກດ້ວຍ.

ໃນນາມກະຊວງເປັນເຈົ້າພາບ ຂອງການຈັດງານວາງສະແດງໃນຄັ້ງນີ້ ກໍ່ເພື່ອໃຫ້ທຸກພາກສ່ວນໃນສັງຄົມ ໄດ້ສຳພັດຕົວຈິງ ກັບ ການພັດທະນາ ເຕັກໂນໂລຊີສື່ສານ ຂໍ້ມູນຂ່າວສານຢູ່ ສປປ ລາວ ແລ້ວ ນອກນັ້ນຍັງມີການນຳເອົາວັດຕະກຳໃໝ່ອອກມາວາງສະແດງນຳອີກດ້ວຍ. ສະນັ້ນງານວາງສະແດງຄັ້ງນີ້ ຈຶ່ງເປັນເວທີ ທີ່ສຳຄັນເພື່ອສ້າງກາລະໂອກາດ ໃຫ້ຜູ້ປະກອບການ, ຜູ້ຜະລິດ, ຜູ້ບໍລິການ, ຜູ້ຊົມໃຊ້ ແລະ ຜູ້ຄຸ້ມຄອງເຕັກໂນໂລຊີ ສື່ສານຂໍ້ມູນຂ່າວສານ ໄດ້ພົບປະແລກປ່ຽນບົດຮຽນຄວາມຮູ້ ຄວາມເຂົ້າໃຈ ແລະ ສ້າງການພົວພັນຮ່ວມມືທາງດ້ານການຄ້າ ແລະ ການພັດທະນາຮ່ວມກັນ, ການພັດທະນາ ໄອຊີທີ ຢູ່ ສປປ ລາວ ກໍ່ມີການຂະຫຍາຍຕົວຢ່າງແຂງແຮງ ເຫັນໄດ້ຈາກຈຳນວນຜູ້ບໍລິການ ແລະ ຜູ້ຊົມໃຊ້ບໍລິການ ເພີ່ມຂື້ນຢ່າງຕໍ່ເນື່ອງເຊັ່ນ: ອັດຕາຜູ້ຊົມໃຊ້ໂທລະສັບມືຖື ແລະ ຂະຫຍາຍບໍລິມາດການເຊື່ອມໂຍງເຄືອຂ່າຍອິນເຕີເນັດ ຂອງ ບັນດາບໍລິສັດນັບມື້ນັບຫລາຍຂື້ນ.