3/9/2017 12:00:00 AM | ກ່ຽວກັບ ລາວ ໂທລະຄົມ

ບໍລິສັດ ລັດວິສາຫະກິດລາວ ໂທລະຄົມມະນາຄົມ ໄດ້ຈັດພິທີມອບໃບຢັ້ງຢືນໜ່ວຍພັກເຂັ້ມແຂງ-ຮູ້ນຳພາຮອບດ້ານ, ມອບບັດໃຫ້ສະມາຊິກພັກສົມບູນ

ໃນຕອນເຊົ້າ ຂອງວັນທີ 9 / 03 / 2017 ບໍລິສັດລັດ ວິສາຫະກິດລາວ ໂທລະຄົມມະນາຄົມ ໄດ້ຈັດພິທີມອບໃບຢັ້ງຢືນໜ່ວຍພັກເຂັ້ມແຂງ-ຮູ້ນຳພາຮອບດ້ານ, ມອບບັດໃຫ້ສະມາຊິກພັກສົມບູນ ຊຸດທີ 2, ມອບຫຼຽນໄຊ, ໃບຍ້ອງຍໍຜົນງານ ຮັບໃຊ້ກອງປະຊຸມສຸດຍອດອາຊຽນຄັ້ງທີ 28 ແລະ 29, ທີ່ລາວເຮົາໄດ້ຮັບກຽດເປັນເຈົ້າພາບ ໂດຍການເປັນປະທານ ຂອງ ສະຫາຍ ຖາວອນ ສົມສະກຸນ ຄະນະພັກກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ, ເລຂາຄະນະພັກຮາກຖານ, ຜູ້ອຳນວຍການໃຫຍ່ ບໍລິສັດລັດ ວິສາຫະກິດລາວ ໂທລະຄົມມະນາຄົມ, ມີບັນດາຄະນະພັກຮາກຖານ, ຄະນະໜ່ວຍພັກ, ສະມາຊິກພັກສົມບູນ, ສະມາຊິກພັກສຳຮອງ ເຂົ້າຮ່ວມ ຈຳນວນ 274 ສະຫາຍ, ຍິງ 78 ສະຫາຍ. ໃນພິທີ, ສະຫາຍ ຖາວອນ ສົມສະກຸນ ຄະນະພັກກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ, ເລຂາຄະນະພັກຮາກຖານ, ຜູ້ອຳນວຍການໃຫຍ່ ບໍລິສັດລັດ ວິສາຫະກິດລາວ ໂທລະຄົມມະນາຄົມ ໄດ້ຕີລາຄາສູງຕໍ່ການນຳພາ-ຊີ້ນຳ ແລະ ປະຕິບັດໜ້າທີ່ວຽກງານຂອງພະນັກງານສະມາຊິກພັກທີ່ຂື້ນກັບຄະນະພັກຮາກຖານ ລລທ ຈຳ ນວນໜຶ່ງດັ່ງນີ້: 1.ສຳເລັດການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ປະຈຳປີ 2016, ຊຶ່ງອົງຄະນະພັກກະຊວງໄປ ສະນີ, ໂທລະຄົມມະນາຄົມ ແລະ ການສື່ສານ ໄດ້ຮັບຮອງ ໜ່ວຍພັກທີ່ຂື້ນກັບ ຄະນະພັກຮາກຖານ ລາວໂທລະຄົມ ຈຳນວນ 04 ໜ່ວຍພັກໃຫ້ເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ ຄິດເປັນ 44% ຂອງໜ່ວຍພັກທັງໝົດ 9 ໜ່ວຍພັກ, ສະເພາະປີ 2017 ແມ່ນມອບໃຫ້ແຕ່ລະໜ່ວຍພັກຈະຕ້ອງອອກແຮງສູ້ຊົນບຸກບືນສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານຂອງຕົນໃຫ້ໄດ້ທຸກໆໜ່ວຍພັກ. 2.ສຳເລັດການສະເໜີອອກບັດ-ມອບບັດໃຫ້ສະມາຊິກພັກສົມບູນ ເປັນຊຸດທີ 2, ຊຶ່ງໄດ້ຮັບການອະນຸ ມັດອອກບັດໃຫ້ສະມາຊິກພັກສົມບູນ ຈຳນວນ 66 ສະຫາຍ, ຍິງ 26 ສະຫາຍ, ເພີ່ມຈາກຊຸດທີ 1 ໃນປີ 2014 ທີ່ໄດ້ມອບບັດໃຫ້ສະມາຊິກພັກສົມບູນໄປແລ້ວ ຈຳນວນ 128 ສະຫາຍ, ຍິງ 21 ສະຫາຍ. 3.ສຳເລັດໃນການປະກອບສ່ວນຮັບໃຊ້ກອງປະຊຸມສຸດຍອດອາຊຽນ ຄັ້ງທີ 28 ແລະ 29 ທີ່ ສປປ ລາວ ເປັນເຈົ້າພາບ ໂດຍບໍລິສັດລັດ ວິສາຫະກິດລາວ ໂທລະຄົມມະນາຄົມໄດ້ຮັບການຍ້ອງຍໍຊົມເຊີຍຜົນງານ ຈຳນວນໜຶ່ງດັ່ງນີ້: - ໄດ້ຮັບຫຼຽນໄຊແຮງງານ ຊັ້ນ II ລວມໝູ່ ຈຳນວນ 1 ໜ່ວຍ. - ໄດ້ຮັບຫຼຽນໄຊແຮງງານ ຊັ້ນ II ບຸກຄົນ ຈຳນວນ 11 ທ່ານ. - ໄດ້ຮັບຫຼຽນໄຊແຮງງານ ຊັ້ນ III ບຸກຄົນ ຈຳນວນ 14 ທ່ານ. - ໄດ້ຮັບຫຼຽນກາແຮງງານ ຈຳນວນ 41 ທ່ານ. - ໃບຍ້ອງຍໍລັດຖະບານ ຈຳນວນ 44 ທ່ານ. ສູດທ້າຍປະທານກອງປະຊຸມກໍ່ໄດ້ໃຫ້ການຍ້ອງຍໍຊົມເຊີຍຜົນງານທີ່ບັນດາສະຫາຍສະມາຊິກພັກ, ພະນັກງານຍາດມາໄດ້ ໃນໄລຍະຜ່ານມາ ແລະ ສະຫາຍຍັງເນັ້ນໃຫ້ ສະມາຊິກພັກ, ພະນັກງານ ສືບຕໍ່ສ້າງຜົນງານໃຫ້ຍິງໃຫຍ່ກວ່າເກົ່າໃນຕໍ່ໜ້າ ເພື່ອບັນລຸຈຸດປະສົງເປົ້າໝາຍຕາມແຜນການທີ່ ລລທ ກຳນົດໄວ້. ກອງປະຊຸມໄດ້ດຳເນີນໄປດ້ວຍບັນຍາກາດຟົດຟື້ນ ແລະ ມີເນື້ອໃນເລິກເຊີ່ງ, ຊຶ່ງໄດ້ປິດລົງໃນມື້ດຽວກັນ.