4/27/2019 6:27:44 PM | ກ່ຽວກັບ ລາວ ໂທລະຄົມ

ລາວ ໂທລະຄົມ ຮ່ວມມື ກັບ ທະນາຄານກະສິກອນໄທ ເປີດໂຕບໍລິການໃໝ່ ເອົາໃຈຜູ້ໃຊ້ມືຖືຕື່ມເງິນຜ່ານ App QR KBank

ໃນຕອນເຊົ້າວັນທີ 25 ເມສາ 2019 ຢູ່ທີ່ ທະນາຄານກະສິກອນໄທ ສໍານັກງານໃຫຍ່ຖະໜົນລ້ານຊ້າງ ນະຄອນຫຼວງວຽງຈັນ. ໄດ້ມີພິທີຖະແຫຼງຂ່າວການຮ່ວມມື ລະຫວ່າງ ບໍລິສັດ ລາວ ໂທລະຄົມມະນາຄົມ ມະຫາຊົນ ແລະ ທະນາຄານກະສິກອນໄທ ເພື່ອເປີດໂຕບໍລິການໃໝ່ ເອົາໃຈຜູ້ໃຊ້ມືຖື ຕື່ມເງິນຄ່າໂທ ແລະ ຄ່າອິນເຕີເນັດ ເຄືອຂ່າຍ ລາວ ໂທລະຄົມ ຜ່ານ QR KBank Application ກະເປົາເງິນເທິງມືຖື ເພື່ອຍົກລະດັບການໃຫ້ບໍລິການຂອງທັງສອງຝ່າຍ ເຮັດໃຫ້ລູກຄ້າສາມາດຕື່ມເງິນຄ່າໂທ ແລະ ຄ່າອິນເຕີເນັດ ໄດ້ທຸກທີ່ທຸກເວລາ ເລີ່ມໃຊ້ໄດ້ຕັ້ງແຕ່ວັນທີ່ 1 ເມສາ 2019 ເປັນຕົ້ນໄປ.

ເຂົ້າຮ່ວມໃນພິທີມີ ທ່ານ ສຸລິສັກ ທໍານຸວົງ ຮັກສາການຫົວໜ້າກົມຄຸ້ມຄອງລະບົບຊໍາລະສະສາງ ທະນາຄານແຫ່ງ ສປປ ລາວ , ທ່ານ ປິຍະວັດ ຈະຣິຍະເສດຖະພົງ ຮອງຜູ້ອໍານວຍການໃຫຍ່ ລາວ ໂທລະຄົມ ພ້ອມຄະນະ, ທ່ານ ພັດທະນະພົງ ຕັນສົມບູນ ປະທານສະພາບໍລິຫານ ທະນາຄານກະສິກອນໄທ ພ້ອມດ້ວຍຄະນະ ມີສື່ມວນຊົນຈາກຫຼາຍພາກສ່ວນກໍ່ໄດ້ເຂົ້າຮ່ວມໃນພິທີຄັ້ງນີ້ດ້ວຍ

ທ່ານ ພັດທະນະພົງ ຕັນສົມບູນ ປະທານສະພາບໍລິຫານ ທະນາຄານກະສິກອນໄທ ກ່າວວ່າ: ພວກເຮົາເຫັນໂອກາດໃນການໃຫ້ບໍລິການຜ່ານຊ່ອງທາງດິຈິຕອລ ຈຶ່ງໄດ້ເປີດໂຕ ແລະ ທົດລອງໃຊ້ງານ“QR KBank” ແອັບພລິເຄຊັ່ນກະເປົ໋າເງິນເທິງມືຖືທີ່ບໍ່ຕ້ອງຜູກກັບບັນຊີທະນາຄານເມື່ອເດືອນ ທັນວາ 2018 ຜ່ານມາ ຢູ່ຕະຫຼາດຂົວດິນ ເມືອງສີສັດຕະນາກ ເຊິ່ງການໃຊ້ສອຍຕ່າງໆຜ່ານລະບົບ QR Code ກໍ່ຖືວ່າໄດ້ຜົນການຕອບຮັບເປັນຢ່າງດີມີຈໍານວນການໃຊ້ຫຼາຍກວ່າ 73 ພັນເທື່ອ ຄິດເປັນມູນຄ່າ 54,000 ລ້ານກີບ. ສະນັ້ນ, ເພື່ອຕອບໂຈດການໃຊ້ງານທີ່ຫຼາຍຂຶ້ນຈຶ່ງໄດ້ຮ່ວມມືກັບ ລາວ ໂທລະຄົມ ພັດທະນາລະບົບ ແລະ ເປີດໂຕລະບົບຕື່ມເງິນມືຖືເຄືອຂ່າຍລາວໂທລະຄົມ ເພື່ອອໍານວຍຄວາມສະດວກແກ່ລູກຄ້າໂດຍຈະເລີ່ມໃຫ້ບໍລິການໃນນະຄອນຫຼວງວຽງຈັນເປັນອັນດັບທໍາອິດ.

ທ່ານ ປີຍະວັດ ຈະຣິຍະເສດຖະພົງ ຮອງຜູ້ອໍານວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ເປີດເຜີຍວ່າ: ປັດຈຸບັນປະຊາກອນລາວຫຼາຍກວ່າ 81% ໃຊ້ໂທລະສັບມືຖື ແລະ ການເຂົ້າເຖິງອິນເຕີເນັດຜ່ານໂທລະສັບເພີ່ມຂຶ້ນປີລະ 15% ເຊິ່ງການເປີດໂຕແອັບພລິເຄຊັ່ນໃໝ່ນີ້ຈະເປັນການຍົກລະດັບການບໍລິການຂອງ ລາວ ໂທລະຄົມເພີ່ມຂຶ້ນ ຕອບໂຈດຄວາມຕ້ອງການຂອງລູກຄ້າໃນຍຸກການເງິນດິຈິຕອລ.

ໂອກາດນີ້, ທ່ານ ສຸລິສັກ ທໍານຸວົງ ຮັກສາການຫົວໜ້າກົມຄຸ້ມຄອງລະບົບຊໍາລະສະສາງ ທະນາຄານ ແຫ່ງ ສປປ ລາວ ໃຫ້ຮູ້ຕື່ມວ່າ: ລັດຖະບານມີນະໂຍບາຍໃຫ້ພາກເອກະຊົນນໍາເທັກໂນໂລຢີດິຈິຕອລເພື່ອໃຫ້ບໍລິການທາງດ້ານການເງິນ ແລະ ການຊໍາລະເງິນທີ່ທັນສະໄໝ ເຊິ່ງການຮ່ວມມືກັນລະຫວ່າງ ທະນາຄານກະສິກອນໄທ ກັບ ລາວ ໂທລະຄົມ ໃນຄັ້ງນີ້ກໍ່ຖືວ່າເປັນການຊຸກຍູ້ໃຫ້ສັງຄົມກ້າວສູ່ການເງິນດິຈິຕອລຢ່າງແທ້ຈິງ.

ປະທານສະພາບໍລິຫານ ທະນາຄານກະສິກອນໄທ ຍັງກ່າວຕື່ມວ່າ: QR KBank ສາມາດດາວໂຫຼດໄດ້ທັງລະບົບ IOS ແລະ ແອນດຣອຍ ຄາດວ່າໃນປີ 2019 ຈະມີຜູ້ໃຊ້ງານຫຼາຍກວ່າ 1 ແສນ 20 ພັນຄົນ ຈະມີການນໍາໃຊ້ເກີດຂຶ້ນ 3 ລ້ານລາຍການ ຄິດເປັນມູນຄ່າ 88 ຕື້ 500 ລ້ານກີບ ພ້ອມທັງມີແຜນຂະຫຍາຍຈຸດບໍລິການ ແລະ ຕົວແທນຈໍາໜ່າຍທົ່ວນະຄອນຫຼວງ 120 ຈຸດ ແລະ ຍັງຈະໃຫ້ຄວບຄຸມທົ່ວປະເທດໃນອະນາຄົດ