4/27/2019 6:18:40 PM | ກ່ຽວກັບ ລາວ ໂທລະຄົມ

ລາວ ໂທລະຄົມ ຈັດພິທີບາສີສູ່ຂັວນອວຍພອນປີໃໝ່ ລາວ ພສ 2562 ທີ່ ສໍານັກງານໃຫຍ່ ລາວ ໂທລະຄົມ ສາຍລົມ

ເນື່ອງໃນໂອກາດບຸນກຸດສົງການປີໃໝ່ ລາວ ( ປີກຸນ ) ພສ 2562 ໃນຕອນເຊົ້າ ວັນທີ 11 ເມສາ 2019 ທີ່ ສໍານັກງານໃຫຍ່ ລາວ ໂທລະຄົມ ສາຍລົມ ໄດ້ຈັດມີທີ ບາສີສູ່ຂັວນອວຍພອນ ປີໃໝ່ລາວຂື້ນ ເຊິ່ງໃຫ້ກຽດ ເປັນ ປະທານເປີດງານໂດຍ: ທ່ານ ຖາວອນ ສົມສະກຸນ ຜູ້ອຳນວຍ ການໃຫຍ່ ລາວ ໂທລະຄົມ ແລະ ມີແຂກຖືກເຊີນເຂົ້າຮ່ວມ ຈາກກະຊວງໄປສະນີ-ໂທລະຄົມ ມະນາ ຄົມ ແລະ ການສື່ສານ, ຮ້ານ ຕົວແທນຈໍາໜ່າຍສິນຄ້າ ລລທ, ຜູ້ສະໜອງ, ແຂກລູກຄ້າອົງກອນ, ຄະນະຜູ້ບໍລິຫານ ແລະ ພະນັກ ງານອ້ອມຂ້າງ ລລທ ສູນກາງເຂົ້າຮ່ວມຢ່າງພ້ອມພຽງ, ບັນຍາກາດ ພາຍໃນ ງານເຕັມ ໄປດ້ວຍ ຄວາມເບີກບານມ່ວນຊື່ນ.

ຈຸດປະສົງໃນການຈັດງານລ້ຽງສະຫຼອງປີໃໝ່ລາວນີ້ ແມ່ນເພື່ອສ້າງຄວາມສາມັກຄີ ຮັກແພງ ລະຫວ່າງຜູ້ບໍລິຫານ ແລະ ພະນັກງານພາຍໃນບໍລິສັດ ເຊິ່ງ ລາວ ໂທລະຄົມ ພວກເຮົາໄດ້ຈັດຂື້ນ ທຸກໆປີ ແລະ ເປັນການປະກອບສ່ວນ ອະນຸລັກຮີດຄອງປະເພນີອັນດີງາມ ທີ່ສຶບທອດກັນມາແຕ່ ບູຮານນະການ ໃຫ້ຢູ່ຄຽງຄູ່ຊາດລາວ ຕະຫຼອດໄປ.