3/28/2019 9:11:09 AM | ກ່ຽວກັບ ລາວ ໂທລະຄົມ

ລາວ ໂທລະຄົມ ຝຶກອົບຮົມ ວຽກງານສະກັດກັ້ນ ແລະ ຕ້ານອັກຄີໄພ

ໃນວັນທີ 21 ມີນາ 2019 ທີ່ຜ່ານມາ ຢູ່ທີ່ຫ້ອງປະຊຸມໃຫຍ່ ລາວ ໂທລະຄົມ ນະຄອນຫຼວງວຽງຈັນ ໄດ້ໄຂພິທີຝຶກອົບຮົມພາຍໃຕ້ຫົວຂໍ້: ວຽກງານສະກັດກັ້ນ ແລະ ຕ້ານອັກຄີໄພ ຂຶ້ນໂດຍການຮ່ວມມືກັນລະຫວ່າງ ລາວ ໂທລະຄົມ ແລະ ກົມຕຳຫຼວດສະກັດກັ້ນຕ້ານອັກຄີໄພ, ໃຫ້ກຽດກ່າວເປີດພິທີໃນຄັ້ງນີ້ໂດຍ ແມ່ນ ທ່ານ ຈິດປະສົງ ໜູແກ້ວໄກສອນ ຮອງຜູ້ອຳນວຍການໃຫຍ່ ລາວ ໂທລະຄົມ ເຂົ້າຮ່ວມໃນພິທີມີ ທ່ານ ພັຕ ສອນເພັດ ແດງຊື່ນ ຮອງຫົວໜ້າພະແນກໂຄສະນາຄວາມປອດໄພ, ກົມຕຳຫຼວດສະກັດກັ້ນຕ້ານອັກຄີໄພ ພ້ອມດ້ວຍທີມງານ ແລະ ມີນັກສຳມະນາກອນອ້ອມຂ້າງ ລລທ ສູນກາງເຂົ້າຮ່ວມ 103 ທ່ານ.

ຈຸດປະສົງໃນການຝຶກອົບຮົມໃນຄັ້ງນີ້ ແມ່ນເພື່ອເປັນການຖ່າຍທອດຄວາມຮູ້, ຄວາມເຂົ້າໃຈ ກ່ຽວກັບວຽກງານສະກັດກັ້ນຕ້ານອັກຄີໄພ ໃຫ້ກັບຜູ້ເຂົ້າຮ່ວມຝຶກອົບຮົມ, ໄດ້ນຳໄປປະຕິບັດ ແລະ ໝູນໃຊ້ໃນການດໍາລົງຊີວິດປະຈໍາວັນ ໃຫ້ມີຄວາມປອດໄພ ໂດຍສະເພາະແມ່ນ ການປ້ອງກັນບໍ່ໃຫ້ເກີດອັກຄີໄພ, ວິທີການແກ້ໄຂບັນຫາເມື່ອເວລາພົບກັບເຫດການສຸກເສີນກ່ຽວກັບເຫດການອັກຄີໄພເກີດຂຶ້ນ. ເຊິ່ງຫົວຂໍ້ທີ່ນໍາມາຝຶກອົບຮົມໃນຄັ້ງນີ້ມີຄື:

1. ຄວາມຮູ້ພື້ນຖານ ກ່ຽວກັບວຽກງານສະກັດກັ້ນ ແລະ ຕ້ານອັກຄີໄພ

2. ແນະນຳອຸປະກອນມອດໄຟ

3. ແນະນຳການໜີໄຟສຸກເສີນ

4. ແນະນຳການປະຖົມພະຍາບານເບື້ອງຕົ້ນ

5. ສາທິດການມອດໄຟໄໝ້ນໍ້າມັນ ແລະ ອາຍແກັດ

ໃນບັ້ນຝຶກອົບຮົມຄັ້ງນີ້ຜູ້ເຂົ້າຮ່ວມໄດ້ຮຽນຮູ້ທັງພາກທິດສະດີ ແລະ ພາກປະຕິບັດຕົວຈິງ ໄປພ້ອມໆກັນ ເຊິ່ງໄດ້ສ້າງຄວາມສົນໃຈໃຫ້ກັບນັກສຳມະນາກອນທີ່ເຂົ້າຮ່ວມໃນຄັ້ງນີ້ໄດ້ເປັນຢ່າງດີ.