3/13/2019 9:48:53 AM | ກ່ຽວກັບ ລາວ ໂທລະຄົມ

ຄະນະບໍລິຫານງານຊາວໜຸ່ມ ປປລ ຮາກຖານ ບໍລິສັດລັດ ວິສາຫະກິດ ລາວ ໂທລະຄົມມະນາຄົມ ໄຂກອງປະຊຸມໃຫຍ່ຄັ້ງທີ V

ໃນຕອນບ່າຍວັນທີ່ 5 ມີນາ 2019 ຄະນະບໍລິຫານງານຊາວໜຸ່ມ ປປລ ຮາກຖານ ບໍລິສັດລັດ ວິສາຫະກິດ ລາວ ໂທລະຄົມ ມະນາຄົມ (ລລທ) ໄດ້ໄຂກອງປະຊຸມໃຫຍ່ຄັ້ງທີ V ຂອງຕົນຂື້ນ ພາຍໃຕ້ການເປັນປະທານຂອງ ສະຫາຍ ວິລະພອນ ວັງວິລະຈິດ ເລຂາຄະນະບໍລິຫານງານຊາວໜຸ່ມ ປປລ ຮາກຖານ ລລທ . ເຂົ້າຮ່ວມໃນພິທີມີ ສະຫາຍ ແກ້ວວິສຸກ ໂສລະພົມ ຄະນະພັກກະຊວງ ເລຂາຄະນະບໍລິຫານງານຊາວໜຸ່ມ ປປລ ກະຊວງຊວງໄປສະນີ-ໂທລະຄົມມະນາຄົມ ແລະ ການສື່ສານ(ປທສ), ສະຫາຍ ຖາວອນ ສົມສະກຸນ ຄະນະພັກກະຊວງ ເລຂາຄະນະພັກຮາກຖານ ລລທ, ມີຄະນະບໍລິຫານງານຊາວໜຸ່ມ ພ້ອມດ້ວຍ ສະມາຊິກຊາວໜຸ່ມ ປປລ ຮາກຖານ ລລທ ເຂົ້າຮ່ວມ ຈໍານວນ 300 ສະຫາຍ.

ຄະນະບໍລິຫານງານຊາວໜຸ່ມ ປປລ ຮາກຖານ ລລທ ແມ່ນອົງການຈັດຕັ້ງມະຫາຊົນໜຶ່ງທີ່ຢູ່ພາຍໃຕ້ການນໍາພາ-ຊີ້ນໍາໂດຍກົງຮອບດ້ານຂອງຄະນະບໍລິຫານງານຊາວໜຸ່ມ ປປລ ກະຊວງໄປສະນີ-ໂທລະຄົມມະນາຄົມ ແລະ ການສື່ສານ. ການຈັດຕັ້ງຂອງຄະນະບໍລິຫານງານຊາວໜຸ່ມ ລລທ ປະກອບມີ: ຄະນະ 09 ສະຫາຍ, ຍິງ 03 ສະຫາຍ, 09 ໜ່ວຍ, 27 ຈຸ ມີສະມາຊິກທັງໝົດ 1,112 ສະຫາຍ, ຍິງ 577 ສະຫາຍ.

ໃນກອງປະຊຸມ ສະຫາຍ ວິລະພອນ ວັງວິລະຈິດ ເລຂາຄະນະບໍລິຫານງານຊາວໜຸ່ມ ປປລ ຮາກຖານ ລລທ ໄດ້ຂື້ນຜ່ານບົດລາຍງານການເມືອງຕໍ່ທີ່ປະຊຸມເຊິ່ງທ່ານໄດ້ລາຍງານສະພາບລວມການຈັດຕັ້ງປະຕິບັດວຽກງານແຕ່ປີ 2013-2018 ,ຜົນສໍາເລັດຂອງການຈັດຕັ້ງວຽກງານໃນແຕ່ລະດ້ານ, ຕີລາຄາດ້ານດີ ແລະ ຂໍ້ຄົງຄ້າງ ທີ່ຕ້ອງໄດ້ຖອດຖອນບົດຮຽນເພື່ອປັບປຸງແກ້ໄຂ, ພ້ອມດຽວກັນນີ້ສະຫາຍຍັງໄດ້ນໍາສະເໜີທິດທາງແຜນການແຕ່ປີ 2019-2023 ແລະ ສະເໜີຜູ້ແທນປະກອບຄໍາຄິດເຫັນໃສ່ບົດລາຍງານດັ່ງກ່າວຕໍ່ຈາກນັ້ນ ສະຫາຍ ອາລຸນນະເດດ ບານຈິດ ຮອງເລຂາຄະນະບໍລິຫານງານຊາວໜຸ່ມ ລລທ ກໍໄດ້ຂື້ນຜ່ານບົດສໍາຫຼວດການນໍາພາຂອງ ຄະນະບໍລິຫານງານຊາວໜຸ່ມ ລລທ ຊຸດເກົ່າຫຼັງຈາກນັ້ນໄດ້ມີການປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມ ລລທ ຊຸດໃໝ່ເພື່ອສືບຕໍ່ປະຕິບັດໜ້າທີ່ທີ່ໄດ້ຮັບໝອບໝາຍຕາມທິດທາງ ແລະ ແຜນການທີ່ວາງໄວ້ໃນຊຸມປີຕໍ່ໄປ. ເຊິ່ງການເລືອກຕັ້ງຄັ້ງນີ້ມີຜູ້ສະໝັກ 12 ສະ ຫາຍ, ເລືອກເອົາ 09 ສະຫາຍ. ສະຫຼຸບຜົນການນັບຄະ ແນນສຽງ ໄດ້ຮັບຮອງເລືອກເອົາ ສະຫາຍ ເພັດສະຫວັນ ເຄີນວິໄລ ເປັນ ເລຂາຄະນະບໍລິຫານງານຊາວໜຸ່ມ ປປລ ຮາກຖານ ລລທ ຄົນໃໝ່ , ສະຫາຍ ອາລຸນນະເດດ ບານຈິດ ເປັນຮອງ ເລຂາ ທັງເປັນ ປະທານກວດກາ ແລະ ສະຫາຍ ສົມປາດຖະໜາ ຫຼ້າໄຄສີ ເປັນຮອງ ເລຂາ ແລະ ອີກ 6 ສະຫາຍ ເປັນຄະນະກຳມະການ ຊຸດໃໝ່.

ໃນຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມຂອງ ສະຫາຍ ແກ້ວວິສຸກ ໂສລະພົມ ຄະນະພັກກະຊວງ, ເລຂາຄະນະບໍລິຫານງານຊາວໜຸ່ມ ປປລ ກະຊວງ ປທສ ໂດຍສະຫາຍໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານການທີ່ ຮາກຖານຊາວໜຸ່ມ ລລທ ຍາດມາໄດ້ ໃນໄລຍະຜ່ານມາ ເຊິ່ງສະແດງອອກໃຫ້ເຫັນຜົນງານໃນຫຼາຍໆດ້ານ ພ້ອມດຽວກັນນີ້ສະຫາຍຍັງໄດ້ໃຫ້ທິດຊີ້ນໍາຕໍ່ຄະນະບໍລິຫານງານຊາວໜຸ່ມ ລລທ ຊຸດໃໝ່ຈົ່ງໄດ້ສືບຕໍ່ເອົາໃຈໃສ່ເຮັດໜ້າທີ ນໍາພາ-ຊີ້ນໍາ ວຽກງານການເມືອງແນວຄິດໃນຮາກຖານຊາວໜຸ່ມຂອງຕົນເວົ້າລວມ, ເວົ້າສະເພາະ ແມ່ນບັນດາສະມາຊິກແຕ່ລະສະຫາຍໃຫ້ເພີ່ມທະວີຄວາມສາມັກຄີ, ມີສະຕິຕື່ນຕົວເປັນເຈົ້າການເຝຶກຝົນຫຼໍ່ຫຼອມຕົນເອງຢ່າງຮອບດ້ານຕາມທິດທາງ ແລະ ແຜນການຂອງຄະນະບໍລິຫານງານສູນກາງຊາວໜຸ່ມ ປປລ ວາງໄວ້ ເປັນ ຕົ້ນແມ່ນການປະຕິບັດຂໍ້ແຂ່ງຂັນ 4 ບຸກ ໃຫ້ຕິດພັນຢ່າງສະໜິດແໜ້ນກັບວຽກງານວິຊາສະເພາະທີ່ຕົນຮັບຜິດຊອບຢ່າງເຂັ້ມງວດເພື່ອຍາດໃຫ້ໄດ້ຜົນງານອັນໃໝ່ທີ່ໃຫຍ່ຫຼວງກວ່າເກົ່າມາສູ່ຕົນເອງ ແລະ ສ່ວນລວມ, ພ້ອມກັນຍົກສູງນາມມະຍົດຂອງຊາວໜຸ່ມ ທີ່ ທ່ານປະທານ ໄກສອນ ພົມວິຫານ ໄດ້ຂະໜານນາມໃຫ້ໄວ້ວ່າ “ຊາວໜຸ່ມຈົ່ງກາຍເປັນດັ່ງນົກອິນຊີທີ່ບໍ່ຫວັ່ນກົວຕໍ່ພາຍຸລົມແດງ ຈົ່ງກາຍເປັນສິນຂອງຍຸກສະໄໝຂອງພວກເຮົາ”