3/6/2019 4:23:10 PM | ກ່ຽວກັບ ລາວ ໂທລະຄົມ

ສະຫະພັນກໍາມະບານຮາກຖານ ບໍລິສັດລັດ ວິສາຫະກິດ ລາວ ໂທລະຄົມມະນາຄົມ ໄຂກອງປະຊຸມໃຫຍ່ ຄັ້ງທີ V ຂອງຕົນ

ໃນຕອນເຊົ້າວັນທີ່ 1 ມີນາ 2019 ສະຫະພັນກໍາມະບານຮາກຖານ ບໍລິສັດລັດ ວິສາຫະກິດ ລາວ ໂທລະຄົມມະນາຄົມ (ລລທ) ໄດ້ໄຂກອງປະຊຸມໃຫຍ່ຄັ້ງທີ V ຂອງຕົນຂື້ນ ພາຍໃຕ້ການເປັນປະທານຂອງ ທ່ານ ສຸພົນຈັນທະວີໄຊ, ຄະນະພັກຮາກຖານ ລລທ, ຮອງປະທານສະຫະພັນກໍາ ມະບານກະຊວງ ໄປສະນີ-ໂທລະຄົມມະນາຄົມ ແລະ ການສື່ສານ, ຮອງຜູ້ອໍານວຍການໃຫຍ່ ລລທ ທັງເປັນປະທານສະຫະພັນກໍາມະບານ ຮາກຖານ ລລທ. ເຂົ້າຮ່ວມໃນພິທີມີ ທ່ານ ຄໍາພູ ດວງຖະໜອມ ຄະນະພັກກະຊວງ, ຫົວໜ້າກົມຈັດຕັ້ງ, ປະທານສະຫະພັນກໍາມະບານ ກະຊວງໄປສະ ນີ-ໂທລະຄົມມະນາຄົມ ແລະ ການສື່ສານ (ປທສ)ພ້ອມດ້ວຍຄະນະ, ມີຄະນະກໍາມະບານ ແລະ ສະມາຊິກກໍາມະບານຮາກຖານ ລລທ ເຂົ້າຮ່ວມ ຈໍານວນ 250 ສະຫາຍ.

ສະຫະພັນກໍາມະບານ ລລທ ແມ່ນອົງການຈັດຕັ້ງມະຫາຊົນໜຶ່ງທີ່ກວ້າງຂວາງ ມີພາລະບົດບາດເປັນເສນາທິການໃຫ້ຄະນະພັກ, ຄະນະອໍານວຍການໃຫຍ່ ລລທ ແລະ ຢູ່ພາຍໃຕ້ການນໍາພາ-ຊີ້ນໍາໂດຍກົງຮອບດ້ານຂອງຄະນະພັກຮາກຖານ ລລທ ມີໜ້າທີ່ຕົ້ນຕໍໃນການ ນໍາພາ-ຊີ້ນໍາ, ສຶກສາອົບຮົມການເມືອງ-ແນວຄິດ, ການຈັດຕັ້ງ, ວຽກງານພະນັກງານ ແລະ ປັບປຸງຂະຫຍາຍກໍາມະບານທີ່ຢູ່ພາຍໃຕ້ຂອບເຂດຄວາມຮັບຜິດຊອບຂອງ ສະຫະພັນກໍາມະບານ, ປັບປຸງ-ກໍ່ສ້າງ ເສີມຂະຫຍາຍບົດບາດຂອງ ສະຫະພັນກໍາມະບານ ໃນການປຸກລະດົມຂົນຂວາຍສະມາຊິກໃນການປະກອບສ່ວນເຂົ້າໃນໜ້າທີ່ວຽກງານຢ່າງມີປະສິດທິພາບພາຍໃຕ້ຄໍາຂວັນ “ສ້າງນິໃສ ມີວິໄນເອົາໃຈໃສ່ປະຕິບັດໂມງເວລາເຮັດວຽກ 8/5” ເພື່ອປະຕິບັດໜ້າທີ່ວຽກງານໃນການຂະຫຍາຍທຸລະກິດຂອງບໍລິສັດວາງອອກໃນແຕ່ລະໄລຍະໃຫ້ປາກົດຜົນເປັນຈິງ. ການຈັດຕັ້ງຂອງ ກໍາມະບານຮາກຖານ ບໍລິສັດລັດ ວິສາຫະກິດ ລາວ ໂທລະຄົມມະນາຄົມປະກອບມີ: ຄະນະກໍາມະບານ 09 ສະຫາຍ, ຍິງ 01 ສະຫາຍ, 09 ໜ່ວຍ, 25 ຈຸ ມີສະມາຊິກທັງໝົດ 1,304 ສະຫາຍ, ຍິງ 556 ສະຫາຍ.

ຜົນງານອັນພົ້ນເດັ່ນໃນຊຸມປີຜ່ານມາ ສະຫະພັນກໍາມະບານ ລລທ ໄດ້ດໍາເນີນຫຼາຍຂະບວນການເຊັ່ນ: ຮັບສະມາຊິກກໍາມະບານໃໝ່ໄດ້ທັງໝົດ 508 ສະຫາຍ, ບໍລິຈາກເລືອດ 143 ສະຫາຍ ສາມາດສ້າງຕັ້ງກອງທືນຊ່ວຍເຫຼືອເຊິ່ງກັນ ແລະ ກັນເປັນຕົ້ນແມ່ນສະຫະກອນສິນເຊື່ອ ແລະ ເງິນຝາກປະຢັດດ້ວຍທຶນຈົດທະບຽນທັງໝົດ 498 ກວ່າລ້ານກີບ ເພື່ອແກ້ໄຂຊີວິດການເປັນຢູ່ຂອງອ້າຍນ້ອງກໍາມະກອນ, ນອກນັ້ນຍັງໄດ້ເປັນເຈົ້າການປົກປ້ອງສິດ ແລະ ຜົນປະໂຫຍດຂອງພະນັກງານໂດຍສະເພາະວຽກງານສະຫວັດດີການສັງຄົມ ທຸກສະຫາຍແມ່ນໄດ້ເຂົ້າເປັນສະມາຊິກຂອງ ອົງການປະກັນສັງຄົມ, ຜົນງານດັ່ງກ່າວໄດ້ສະແດງອອກໃນການຕົກລົງຍ້ອງຍໍຂອງອົງການຈັດຕັ້ງກໍາມະບານລວມມີ: ໄດ້ຮັບການຕົກລົງຍ້ອງຍໍຈາກສູນກາງສະຫະພັນ ກໍາມະບານລາວ 9 ສະຫາຍ, ຈາກສະຫະພັນກໍາມະບານກະຊວງ ປທສ 661 ເທື່ອຄົນ, ຈາກສະຫະພັນກໍາມະບານຮາກຖານ ລລທ ລວມປະເພດ I, ປະເພດ II ແລະ ຊົມເຊີຍ ທັງໝົດ 2,951 ເທື່ອຄົນ . ທີ່ສໍາຄັນໃນປີ 2018 ສະຫະພັນກໍາມະບານຮາກຖານ ລລທ ໄດ້ຮັບນາມມະຍົດ ເປັນກໍາມະບານຮາກຖານ 5 ເປັນເຈົ້າ.

ໃນກອງປະຊຸມ ທ່ານ ສາຄອນ ພູນແສນອ້ວນ ຮອງປະທານ ສະຫະພັນກໍາມະບານຮາກຖານ ລລທ ໄດ້ຂື້ນຜ່ານບົດລາຍງານການເມືອງ ແລະ ບົດສໍາຫຼວດການນໍາພາຂອງຄະນະກໍາມະບານຊຸດເກົ່າ, ຕໍ່ມາໄດ້ເປີດໃຫ້ຜູ້ແທນ ແລະ ແຂກທີ່ເຂົ້າຮ່ວມກອງປະຊຸມປະກອບຄໍາຄິດຄໍາເຫັນໃສ່ບົດລາຍງານດັ່ງກ່າວ. ຫຼັງຈາກນັ້ນໄດ້ມີການບ່ອນບັດເລືອກຕັ້ງເອົາຄະນະກໍາມະບານ ລລທ ຊຸດໃໝ່ ເພື່ອສືບຕໍ່ເຮັດໜ້າທີ່ນໍາພາ-ຊີ້ນໍາ ກໍາມະບານຮາກຖານ ລລທ ຕໍ່ໄປ.ໃນຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມຂອງ ທ່ານ ຄໍາພູ ດວງຖະໜອມ ປະທານສະຫະພັນກໍາມະບານ ກະຊວງ ປທສ ໂດຍທ່ານໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານການ ນໍາພາ-ຊີ້ນໍາ ຂອງຄະນະກໍາມະບານ ລລທ ຊຸດເກົ່າທີ່ຍາດມາໄດ້ໃນໄລຍະຜ່ານມາ ເຊິ່ງສະແດງອອກໃຫ້ເຫັນຜົນງານໃນຫຼາຍໆດ້ານ ພ້ອມດຽວກັນນີ້ທ່ານຍັງໄດ້ໃຫ້ທິດຊີ້ນໍາຕໍ່ຄະນະກໍາມະບານ ລລທ ຊຸດໃໝ່ຈົ່ງໄດ້ສືບຕໍ່ເອົາໃຈໃສ່ ນໍາພາ-ຊີ້ນໍາ ຮາກຖານກໍາມະບານຂອງຕົນລວມໄປເຖີງສະມາຊິກແຕ່ລະສະຫາຍໃຫ້ເພີ່ມທະວີຄວາມສາມັກຄີ, ມີສະຕິຕື່ນຕົວເປັນເຈົ້າການເຝຶກຝົນຫຼໍ່ຫຼອມຕົນເອງຢ່າງຮອບດ້ານຕິດພັນຢ່າງສະໜິດແໜ້ນກັບການຈັດຕັ້ງປະຕິບັດວຽກງານກໍາມະບານກໍ່ຄືວຽກງານວິຊາສະເພາະທີ່ຕົນຮັບຜິດ ຊອບຢ່າງເຂັ້ມງວດເພື່ອຍາດໃຫ້ໄດ້ຜົນງານອັນໃໝ່ທີ່ໃຫຍ່ຫຼວງກວ່າເກົ່າມາສູ່ຕົນເອງ ແລະ ສ່ວນລວມ.

ຜົນການປ່ອນບັດຄັດເລືອກເອົາຄະນະ ກຳມະບານ ລລທ ຊຸດໃຫມ່ມີດັ່ງນີ້

1 . ສະຫາຍ ຄໍາໃບ ພົມຮັກສາ ເປັນປະທານ

2 . ສະຫາຍ ບຸນທອນ ພູນສະຫວັດ ເປັນຮອງປະທານ ທັງເປັນປະທານກວດກາ

3 . ສະຫາຍ ຄຳພຸດ ພິມວັນ ເປັນຮອງປະທານ

4 . ສະຫາຍ ສຸກັນ ຄູນປະເສີດ ເປັນກຳມະການ

5 . ສະຫາຍ ອຸທິບ ທິບປັນຍາ ເປັນກຳມະການ

6 . ສະຫາຍ ສີນະຄອນ ພິມມະຈັກ ເປັນກຳມະການ

7 . ສະຫາຍ ແສງເດືອນ ສີລາປານີ ເປັນກຳມະການ

8 . ສະຫາຍ ນ. ສົມສະໄໝ ໄຊອຸດົມ ເປັນກຳມະການ

9 . ສະຫາຍ ນ. ພູວຽງ ໄຊຍະສອນ ເປັນກຳມະການ