1/22/2019 11:11:51 AM | ກ່ຽວກັບ ລາວ ໂທລະຄົມ

ລາວ ໂທລະຄົມ ມອບເງິນ 700,000,000 ກີບ ໃຫ້ກະຊວງປ້ອງກັນປະເທດ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ

ໃນຕອນເຊົ້າວັນທີ 9 ມັງກອນ 2019 ທີ່ຫ້ອງຕ້ອນຮັບແຂກກະຊວງປ້ອງກັນປະເທດ ຜູ້ອໍານວຍການໃຫຍ່ ບໍລິສັດລັດ ວິສາຫະກິດ ລາວ ໂທລະຄົມມະນາຄົມ ພ້ອມດ້ວຍຄະນະໄດ້ເຂົ້າມອບເງິນອຸປະຖໍາມູນຄ່າ 700,000,000 ກີບ ໃຫ້ກະຊວງປ້ອງກັນປະເທດ ເຊິ່ງມອບໂດຍ ທ່ານ ຖາວອນ ສົມສະກຸນ ຜູ້ອໍານວຍການໃຫຍ່ ລາວ ໂທລະຄົມ ພ້ອມດ້ວຍຄະນະ ແລະ ຮັບໂດຍ ທ່ານ ພົນຕີ ແອສະໄໝ ເລືອງວັນໄຊ ຄະນະປະຈໍາພັກ ກະຊວງ, ຮອງລັດຖະມົນຕີກະຊວງປ້ອງກັນປະເທດພ້ອມດ້ວຍຄະນະ. ການມອບເງິນອຸປະຖໍາຂອງ ລາວ ໂທລະຄົມ ໃນຄັ້ງນີ້ກໍເພື່ອເປັນການສະແດງຄວາມຮູ້ບຸນຄຸນ ແລະ ຂໍ່ານັບຊົມເຊີຍຕໍ່ຜົນງານ ແລະ ໄຊຊະນະອັນຍິ່ງໃຫຍ່ຂອງກອງທັບປະຊາຊົນລາວວິລະຊົນ ທີ່ຍາດມາໄດ້ໃນພາລະກິດປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະຜ່ານມາເຖີງປະຈຸບັນເວົ້າລວມ, ເວົ້າສະເພາະ, ແມ່ນເພື່ອເປັນການປະກອບສ່ວນເຂົ້າໃນວຽກງານພິທີສະເຫຼີມ ສະຫຼອງວັນສ້າງຕັ້ງກອງທັບປະຊາຊົນຄົບຮອບ 70 ປີ ໃຫ້ມີບັນຍາກາດຟົດຟື້ນມ່ວນຊື່ນ. ໃນໂອກາດດຽວກັນນີ້ ທ່ານ ພົນຕີ ແອສະໄໝ ເລືອງວັນໄຊ ກໍໄດ້ສະແດງຄວາມຂອບໃຈ ແລະ ຕີລາຄາສູງຕໍ່ການປະກອບສ່ວນຂອງ ລາວ ໂທລະຄົມ ໃນຄັ້ງນີ້ພ້ອມກ່າວວ່າຈະນໍາໃຊ້ເງິນຈໍານວນດັ່ງກ່າວນີ້ເຂົ້າໃນໜ້າທີ່ວຽກງານໃຫ້ເກີດຜົນປະໂຫຍດສູງສຸດ.