12/21/2018 2:53:09 PM | ກ່ຽວກັບ ລາວ ໂທລະຄົມ

ຄະນະ​ຜູ້​ບໍລິຫານ ລາວ ​ໂທລະ​ຄົມ ລົງ​ພົບ​ປະ​ລູກ​ຄ້າ

​​ໃນວັນ​ທີ 12 ທັນວາ 2018 ​ທີ່ຜ່ານມາ ລາວ ​ໂທລະ​ຄົມ ສູນກາງ ໄດ້ຈັດກິດຈະກຳລົງຂອບໃຈລູກຄ້າຕາມຕະຫຼາດ ໃນ ນະຄອນຫຼວງວຽງຈັນ ເຂົ້າຮ່ວມກິດຈະກຳໃນຄັ້ງນີ້ມີ ຄະນະຜູ້ອຳນວຍການໃຫຍ່ພ້ອມດ້ວຍ​ ຄະນະຜູ້ບໍລິຫານ ແລະ ພະນັກງານ​ ອ້ອມຂ້າງ ລລທ ສູນກາງເຂົ້າຮ່ວມ .

ຈຸດປະສົງຂອງກິດຈະກຳໃນຄັ້ງນີ້ ແມ່ນເພື່ອເປັນການສະແດງຮູ້ບຸນຄຸນ ແລະ ຂອບໃຈລູກຄ້າ ເນື່ອງໃນໂອກາດສົ່ງທ້າຍປີເກົ່າຕ້ອນຮັບປີໃຫມ່ສາກົນ 2019 ທີ່ກໍາລັງຈະມາເຖິງໃນມໍ່ໆນີ້ ພ້ອມກັນນັ້ນ ກໍ່ເປັນການສ້າງຄວາມໃກ້ຊິດລະຫວ່າງ ລາວ ໂທລະຄົມ ກັບລູກຄ້າ ເພື່ອຮັບຟັງຄວາມຄິດເຫັນ ຂອງ ລູກຄ້າ ແລະ ນຳເອົາຄວາມຄິດເຫັນນັ້ນມາປັບປຸງ ແລະ ພັດທະນາການບໍລິການ ຂອງ ລລທ ໃຫ້ດີຂື້ນເລື້ອຍໆ ເພື່ອຕອບສະໜອງຄວາມສະດວກສະບາຍຂອງຜູ້ຊົມໃຊ້, ເຊິ່ງກິດຈະກຳໃນຄັ້ງນີ້ ຍັງໄດ້ມີການແຈກຢາຍປະຕິທິນປີໃຫມ່ 2019, ຈັບສະຫລາກມອບໂຊກ ແລະ ຂາຍສິນຄ້າໃນລາຄາພິເສດ ພ້ອມເຄື່ອງແຈກເຄື່ອງແຖມອີກຫຼາກຫຼາຍ. ເຮັດໃຫ້ບັນຍາກາດຂອງກິດຈະກໍາໃນເທື່ອນີ້ ເຕັມໄປດ້ວຍຄວາມອົບອຸ່ນ ແລະ ຂອບໃຈ ເຊິ່ງກັນ ແລະ ກັນ ( ຕະຫຼາດທີ່ລົງຈັດກິດຈະກໍາໃນຄັ້ງນີ້ມີ: ຕະຫຼາດຂົວດິນ, ຕະຫຼາດທົ່ງຂັນຄໍາ, ຕະຫຼາດຫົວຂົວ, ຕະຫຼາດໂນນຄໍ້,ຕະຫຼາດໂພນສະຫວ່າງ ແລະ ຕະຫຼາດເຂດດົງໂດກ )