12/7/2018 5:18:42 PM | ກ່ຽວກັບ ລາວ ໂທລະຄົມ

ບໍລິສັດລັດ ວິສາຫະກິດ ລາວ ໂທລະຄົມມະນາຄົມ ເຊັນສັນຍາໂຄງລ່າງ ແລະ ການບໍລິການ ດ້ານໂທລະຄົມມະນາຄົມ ກັບ ກຸ່ມບໍລິສັດພັດທະນາເຂດເສດຖະກິດສະເພາະ ບໍ່ເຕ່ນ ລາວ ຈໍາກັດ

ໃນຕອນບ່າຍຂອງວັນທີ: 06 ທັນວາ 2018 ຢູ່ທີ່ ສໍານັກງານໃຫຍ່ ບໍລິສັດລັດ ວິສາຫະກິດ ລາວ ໂທລະຄົມມະນາຄົມ ໄດ້ມີພີທີລົງນາມເຊັນສັນຍາຮ່ວມມືການໃຫ້ບໍລິການດ້ານໂທລະຄົມມະນາຄົມ ໃນເຂດເສດຖະກິດສະເພາະ ບໍ່ເຕ່ນແດນງາມ (ຄຂພສ) ແຂວງຫຼວງນໍ້າທາ ສປປ ລາວ ລະຫວ່າງ ບໍລິສັດລັດ ວິສາຫະກິດ ລາວ ໂທລະຄົມມະນາຄົມ (ລລທ),ແລະ ກຸ່ມບໍລິສັດພັດທະນາເຂດເສດຖະກິດສະເພາະ ບໍ່ເຕ່ນ ລາວ ຈຳກັດ (ຂສບ) ຂື້ນ ໂດຍການເຂົ້າຮ່ວມເປັນປະທານຂອງ ທ່ານ ທອງໃສ ຊານໄຊຍະ ຮອງລັດຖະມົນຕີ ກະຊວງ ໄປສະນີ-ໂທລະຄົມມະນາຄົມ ແລະ ການສື່ສານ (ປທສ), ທ່ານ ພົນຕີ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ເຂົ້າຮ່ວມໃນພິທີມີ ຫົວໜ້າກົມ,ຮອງກົມ, ຫົວໜ້າຫ້ອງການ ກະຊວງ ປທສ, ຫົວໜ້າພະແນກ ປທສ ແຂວງ, ຫົວໜ້າຫ້ອງການສົ່ງເສີມ ແລະ ຄຸ້ມຄອງ ເຂດເສດຖະກິດພິເສດ, ຫົວໜ້າຄະນະກໍາມະການຮ່ວມມື ລາວ-ຈີນ, ແຂກຮັບເຊີນພ້ອມດ້ວຍຄະນະຜູ້ບໍລິຫານທັງສອງບໍລິສັດ ແລະ ສື່ມວນຊົນກໍ່ໄດ້ເຂົ້າຮ່ວມເກັບກໍາຂ່າວໃນຄັ້ງນີ້ດ້ວຍ.

ການລົງນາມເຊັນສັນຍາສອງຝ່າຍໃນຄັ້ງນີ້ ຝ່າຍ ລາວ ໂທລະຄົມ ໂດຍແມ່ນ ທ່ານ ຈິດປະສົງ ໜູແກ້ວໄກສອນ ຮອງຜູ້ ອໍານວຍການໃຫ່ຍ ບໍລິສັດລັດ ວິສາຫະກິດ ລາວ ໂທລະຄົມມະນາຄົມ (ລລທ) ແລະ ທ່ານ ນາງ ຢາງຢ້າຫົງ ຮອງຜູ້ອໍານວຍການປະຈໍາການ ກຸ່ມບໍລິສັດພັດທະນາເຂດເສດຖະກິດສະເພາະ ບໍ່ເຕ່ນ ລາວ ຈຳກັດ (ຂສບ)

ຈຸດປະສົງຂອງການລົງນາມເຊັນສັນຍາໃນຄັ້ງນີ້ແມ່ນ ກຸ່ມບໍລິສັດພັດທະນາເຂດເສດຖະກິດສະເພາະ ບໍ່ເຕ່ນ ລາວ ຈຳກັດ (ຂສບ) ໄດ້ຄັດເລືອກໃຫ້ ບໍລິສັດລັດ ວິສາຫະກິດ ລາວ ໂທລະຄົມມະນາຄົມ ເປັນຜູ້ດໍາເນີນການພັດທະນາ ແລະ ສະໜອງການບໍລິການທາງດ້ານການສື່ສານໂທລະຄົມມະນາຄົມ ແບບຄົບວົງຈອນ ໃນເຂດເສດຖະກິດສະເພາະ ບໍ່ເຕ່ນແດນງາມ ບ້ານບໍ່ເຕ່ນ, ເມືອງຫຼວງນໍ້າທາ, ແຂວງຫລວງນ້ຳທາ ສປປ ລາວ ພາຍໃນກໍານົດເວລາ 5 ປີ. ເພື່ອເອື້ອອໍານວນຄວາມສະດວກທາງດ້ານພື້ນຖານໂຄງລ່າງການສື່ສານໂທລະຄົມມະນາຄົມ ທີ່ສະດວກສະບາຍ, ທັນສະໄໝ ແລະ ໄດ້ມາດຕະຖານ ໃຫ້ແກ່ການຈັດຕັ້ງປະຕິບັດແຜນງານການພັດທະນາຂອງ ກຸ່ມບໍລິສັດພັດທະນາເຂດເສດຖະກິດສະເພາະ ບໍ່ເຕ່ນ ລາວ ຈໍາກັດ ໃຫ້ບັນລຸຕາມຈຸດປະສົງທີ່ວາງໄວ້ໃນການຮ່ວມມືພັດທະນາ ໜຶ່ງແລວທາງໜຶ່ງເສດຖະກິດ ລະຫວ່າງສອງພັກ-ລັດ ລາວ ແລະ ຈີນ ໄດ້ລົງນາມກັນໄວ້.

ລາວ ໂທລະຄົມ ຄືຜູ້ນໍາໃນການໃຫ້ບໍລິການທາງດ້ານການສື່ສານໂທລະຄົມມະນາຄົມ ແບບຄົບວົງຈອນຜູ້ທໍາອິດໃນ ສປປ ລາວ ນັບຕັ້ງແຕ່ປີ 1996 ເປັນຕົ້ນມາ. ເຖິງປະຈຸບັນສາມາດຕອບສະໜອງການບໍລິການລູກຄ້າ ທັງລະບົບໃຊ້ສາຍ ແລະ ໄຮ້ສາຍ (Fixed & Mobile Telecommunication Services) ໄດ້ແລ້ວຫຼາຍກວ່າ 3,5 ລ້ານ ລູກຄ້າໃນຂອບເຂດທົ່ວປະເທດ. ໃນປີ 2011 ລາວ ໂທລະຄົມ ໄດ້ເປີດໃຫ້ບໍລິການ 4G ຢ່າງເປັນທາງການ ເຊິ່ງເປັນບໍລິສັດທໍາອິດໃນ ສປປ ລາວ ແລະ ເປັນປະເທດທີ່ 2 ໃນຂົງເຂດອາຊີຕາເວັນອອກສ່ຽງໃຕ້ ຫຼື ອາຊ່ຽນ ຮອງລົງມາຈາກ ປະເທດ ສິງກະໂປ.ເພື່ອຕອກຢໍ້າຄວາມເປັນຜູ້ນໍາທາງດ້ານການສື່ສານໂທລະຄົມມະນາຄົມ ໃນລາວ ໃນຕົ້ນປີ 2017 ລາວ ໂທລະຄົມ ໄດ້ເປີດໃຫ້ບໍລິການ 4,5G ໃນນະຄອນຫຼວງວຽງຈັນ ແລະ ຂະຫຍາຍການບໍລິການໄປສູ່ບັນດາແຂວງຕ່າງໆໃຫ້ຄວບຄຸມໃນຂອບເຂດທົ່ວປະເທດ.

ເຂດເສດຖະກິດສະເພາະ ບໍ່ເຕ່ນ ແມ່ນຫນຶ່ງໃນຫຼາຍເຂດເສດຖະກິດທີ່ໄດ້ກໍານົດໂດຍ ລັດຖະບານແຫ່ງ ສປປ ລາວ ຖືເປັນວຽກ ງານທີ່ສໍາຄັນ ເພື່ອຊ່ວຍພັດທະນາເສດຖະກິດຂອງປະເທດ ເພື່ອປະກອບສ່ວນສ້າງໃຫ້ເສດຖະກິດ-ສັງຄົມແຫ່ງຊາດຂະຫຍາຍຕົວໄວຍິ່ງຂື້ນ.