9/27/2018 4:03:39 PM | ກ່ຽວກັບ ລາວ ໂທລະຄົມ

ບໍລິສັດລັດ ວິສາຫະກິດ ລາວ ໂທລະຄົມ (ລລທ) ໄຂພິທີ ຮັບໃບຢັ້ງຢືນ ການສ້າງຂະບວນການແຂ່ງຂັນ 5 ເປັນເຈົ້າ ຂອງສະຫະພັນກໍາມະບານ ລລທ

ໃນຕອນເຊົ້າວັນທີ່ 21 ກັນຍາ 2018 ທີ່ຜ່ານມາ ສະຫະພັນກໍາມະບານຮາກຖານ ບໍລິສັດລັດ ວິສາຫະກິດ ລາວ ໂທລະຄົມມະນາຄົມ (ລລທ) ໄດ້ໄຂພິທີຮັບໃບຢັ້ງຢືນສ້າງຂະບວນການແຂ່ງຂັນ 5 ເປັນເຈົ້າ ທີ່ຫ້ອງປະຊຸມສໍານັກງານໃຫຍ່ ລລທ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ສຸພົນ ຈັນທະວີໄຊ, ຄະນະພັກຮາກຖານ ລລທ, ຮອງປະທານ ສະຫະພັນກໍາມະບານກະຊວງ ໄປສະນີ-ໂທລະຄົມມະນາຄົມ ແລະ ການສື່ສານ, ຮອງຜູ້ອໍານວຍການໃຫຍ່ ລລທ ທັງເປັນປະທານສະຫະພັນກໍາມະບານຮາກຖານ ລລທ ມີຄະນະສະຫະພັນກໍາມະບານ ແລະ ສະມາຊິກກໍາມະບານຮາກຖານ ລລທ ເຂົ້າຮ່ວມ ຈໍານວນ 200 ກວ່າ ສະຫາຍ.

ສະຫະພັນກໍາມະບານ ລລທ ແມ່ນອົງການຈັດຕັ້ງມະຫາຊົນໜຶ່ງທີ່ກວ້າງຂວາງ ມີພາລະບົດບາດເປັນເສນາທິການໃຫ້ຄະນະພັກ, ຄະນະອໍານວຍການໃຫຍ່ ລລທ ແລະ ຢູ່ພາຍໃຕ້ການຊີ້ນໍາ-ນໍາພາໂດຍກົງຮອບດ້ານຂອງ ຄະນະພັກຮາກຖານ ລລທ ມີໜ້າທີ່ຕົ້ນຕໍໃນການຊີ້ນໍາ-ນໍາພາ, ສຶກສາອົບຮົມການເມືອງ-ແນວຄິດ, ການຈັດຕັ້ງ, ວຽກງານພະນັກງານ ແລະ ປັບປຸງຂະຫຍາຍກໍາມະບານທີ່ຢູ່ພາຍໃຕ້ຂອບເຂດຄວາມຮັບຜິດຊອບຂອງ ສະຫະພັນກໍາມະບານ, ປັບປຸງ-ກໍ່ສ້າງ ເສີມຂະຫຍາຍບົດບາດຂອງສະຫະພັນກໍາມະບານ ໃນການປຸກລະດົມຂົນຂວາຍສະມາຊິກໃນການປະກອບສ່ວນເຂົ້າໃນໜ້າທີ່ວຽກງານຢ່າງມີປະສິດທິພາບພາຍໃຕ້ຄໍາຂວັນ “ສ້າງນິໃສ ມີວິໄນເອົາໃຈໃສ່ປະຕິບັດໂມງເວລາເຮັດວຽກ 8/5” ເພື່ອປະຕິບັດໜ້າທີ່ວຽກງານໃນການຂະຫຍາຍທຸລະກິດຂອງບໍລິສັດວາງອອກໃນແຕ່ລະໄລຍະໃຫ້ປາກົດຜົນເປັນຈິງ. ການຈັດຕັ້ງຂອງ ສະຫະພັນກໍາມະບານຮາກຖານ ບໍລິສັດລັດ ວິສາຫະກິດ ລາວ ໂທລະຄົມມະນາຄົມປະກອບມີ: ຄະນະສະຫະພັນກໍາມະບານ 09 ສະຫາຍ, ຍິງ 01 ສະຫາຍ, 09 ໜ່ວຍ, 25 ຈຸ ມີສະມາຊິກທັງໝົດ 1,306 ສະຫາຍ, ຍິງ 556 ສະຫາຍ.

ໃນກອງປະຊຸມ ທ່ານ ສາຄອນ ພູນແສນອ້ວນ ຮອງປະທານ ກໍາມະບານຮາກຖານ ລລທ ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປະຈໍາປີ 2017-2018 ແລະ ທິດທາງແຜນການປະຈໍາປີ 2018-2019 ຂອງ ບໍລິສັດລັດ ວິສາຫະກິດ ລາວ ໂທລະຄົມ. ຫຼັງຈາກນັ້ນໄດ້ມອບໃບຢັ້ງຢືນ 5 ເປັນເຈົ້າໃຫ້ ສະຫະພັນກໍາມະບານ ຮາກຖານ ລລທ ເຊິ່ງໃຫ້ກຽດມອບໂດຍ ທ່ານ ຄໍາພູ ດວງຖະໜອມ, ຄະນະພັກກະຊວງ, ຫົວໜ້າກົມຈັດຕັ້ງ, ປະທານສະຫະພັນກໍາມະບານ ກະຊວງໄປສະນີ-ໂທລະຄົມມະນາຄົມ ແລະ ການສື່ສານ (ປທສ) ຕໍ່ຈາກນັ້ນໄດ້ມອບໃບຢັ້ງຢືນ 5 ເປັນເຈົ້າໃຫ້ຫົວໜ້າໜ່ວຍກໍາມະບານ 09 ໜ່ວຍ ຂອງ ລລທ ເຊິ່ງມອບໂດຍ ທ່ານ ສຸພົນ ຈັນທະວີໄຊ ປະທານສະຫະພັນ ກໍາມະບານ ລລທ. ໃນຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມຂອງ ທ່ານ ຄໍາພູ ດວງຖະໜອມ ປະທານສະຫະພັນກໍາມະບານ ກະຊວງ ປທສ ໂດຍທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ສະມາຊິກກໍາມະບານ ລລທ ຍາດມາໄດ້ ເຊິ່ງສະແດງອອກໃຫ້ເຫັນ ແຕ່ລະສະຫາຍໄດ້ຮັບການຍ້ອງຍໍ ແລະ ທ່ານຍັງໄດ້ເນັ້ນໃຫ້ສະມາຊິກກໍາມະບານແຕ່ລະສະຫາຍເພີ່ມທະວີຄວາມສາມັກຄີ, ມີສະຕິຕື່ນຕົວເປັນເຈົ້າການເຝຶກຝົນຫຼໍ່ຫຼອມຕົນເອງຢ່າງຮອບດ້ານຕິດພັນຢ່າງສະນິດແໜ້ນກັບການຈັດຕັ້ງປະຕິບັດວຽກງານກໍາມະບານກໍ່ຄືວຽກງານວິຊາສະເພາະທີ່ຕົນຮັບຜິດຊອບຢ່າງເຂັ້ມງວດ.