9/17/2018 4:09:18 PM | ກ່ຽວກັບ ລາວ ໂທລະຄົມ

ບໍລິສັດລັດ ວິສາຫະກິດ ລາວ ໂທລະຄົມມະນາຄົມ ປີດຊຸດຝຶກອົບຮົມ ວຽກງານກວດກາລັດ ປະຈໍາປີ 2018, ( 3 - 7 / 9 / 2018 )

ໃນລະຫວ່າງ ວັນທີ 3-7/09/2018 ທີ່ສຳນັກງານໃຫຍ່ ລາວ ໂທລະຄົມ ໄດ້ຈັດພິທີຝຶກອົບຮົມ ວຽກງານກວດກາລັດ ປະຈໍາປີ 2018 ຂື້ນຢ່າງເປັນທາງການ, ເປັນກຽດເຂົ້າຮ່ວມພິທີດັ່ງກ່າວມີ: ທ່ານ ວັນຄໍາ ໄຊວົງສັກ ຄະນະພັກ ຄະນະກວດກາ ສູນກາງພັກ, ຫົວໜ້າກົມຄົ້ນຄ້ວາ ແລະ ວາລະສານກວດກາ ແລະ ທ່ານ ຈິດປະສົງ ໜູແກ້ວໄກສອນ ຄະນະພັກຮາກຖານ ຮອງຜູ້ອຳນວຍການໃຫຍ່ ລາວໂທລະຄົມ ແລະ ນັກຝຶກອົບຮົມທີ່ເປັນ ພະນັກງານຫຼັກແຫຼ່ງ ຈາກບັນດາພະແນກການອ້ອມຂ້າງ ລລທ ສູນກາງ ແລະ ສາຂາແຂວງທົ່ວປະເທດ, ກະຊວງ ປທສ ຈຳນວນ 4 ສະຫາຍ ແລະ ບໍລິສັດລັດ ວິສາຫະກິດໄປສະນີລາວ ຈຳນວນ 01 ສະຫາຍ ລວມເປັນຈຳນວນ 48 ສະຫາຍ, ໃນນັ້ນມີເພດຍີງ 11 ສະຫາຍ ແລະ ຂາດ 01 ສະຫາຍ ແຂວງຫົວພັນ ເນື່ອງຈາກວ່າຖືກຜົນກະທົບຈາກໄພນໍ້າຖ້ວມ.

ຊຸດຝຶກອົບຮົມຄັ້ງນີ້ໄດ້ດຳເນີນແຕ່ວັນທີ 3 - 7 ກັນຍາ 2018, ຕະຫຼອດໄລຍະ 5 ວັນຜ່ານມາ ບັນດານັກຝຶກອົບຮົມໄດ້ຮັບຟັງ:

- ມະຕິ ຂອງ ຄະນະບໍລິຫານງານສູນກາງພັກສະບັບເລກທີ 022/ຄບສພ, ລົງວັນທີ 13ມັງກອນ2017ວ່າດ້ວຍການເພີ່ມທະວີວຽກງານກວດກາ. ແລະ ຮ່ຳຮຽນ7ບົດຮຽນທີ່ສໍາຄັນດັ່ງນີ້:

- ບົດທີ 6 : ບາງບັນຫາພື້ນຖານກ່ຽວກັບຈິດຕະສາດໃນວຽກງານກວດກາ.

- ບົດທີ 8 : ຄວາມຮູ້ພື້ນຖານກ່ຽວກັບວຽກງານກວດກາລັດ.

- ບົດທີ 9 : ຄວາມຮູ້ພື້ນຖານກ່ຽວກັບການສະກັດກັ້ນ ແລະ ຕ້ານການສໍ້ລາດບັງຫຼວງ.

- ບົດທີ 10 : ວຽກງານຄົ້ນຄົ້ວາແກ້ໄຂຄໍາຮ້ອງ-ຄຳສະເໜີ.

- ບົດທີ 11 : ຄວາມຮູ້ພື້ນຖານກ່ຽວກັບວຽກງານການຕິດຕາມ, ກວດກາໂຄງການລົງທຶນ ຂອງລັດເລີ້ມແຕ່ຫົວທີ. - ບົດທີ 12 : ຄວາມຮູ້ພື້ນຖານກ່ຽວກັບວຽກງານສືບສວນ-ສອບສວນ. - ບົດທີ 13 : ການແກ້ໄຂຜົນການກວດກາ ແລະ ການຕິດຕາມການຈັດຕັ້ງການປະຕິບັດຜົນການກວດກາ.

ຈຸດປະສົງຂອງການຝຶກອົບຮົມໃນຄັ້ງນີ້ ກໍ່ເພື່ອຍົກລະດັບຄວາມຮັບຮູ້ ຄວາມສາມາດ ທາງດ້ານ ວຽກງານກວດກາ, ເຊື່ອມຊຶມ ແລະກຳແໜ້ນແນວທາງນະໂຍບາຍຂອງພັກ-ລັດເພື່ອມາໝູນໃຊ້ເຂົ້າໃນການ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກກໍ່ຄືມະຕິກອງປະຊຸມໃຫຍ່ຄັ້ງທີ IVຂອງຄະນະພັກຮາກຖານ ລາວໂທລະຄົມໃຫ້ປາກົດຜົນເປັນຈິງ, ສ້າງບາດກ້າວບຸກທະລຸທາງດ້ານຈິນຕະນາການ ແລະ ການພັດທະນາຊັບພະຍາກອນມະນຸດ ໃຫ້ກັບຖັນແຖວສະມາຊິກພັກ-ພະນັກງານເພື່ອເພີ່ມຄວາມອາດສາມາດໃຫ້ລາວໂທລະຄົມ ແຂ່ງຂັນໃນເງື່ອນໄຂຂອງການເຊື່ອມໂຍງສາກົນປະກອບສ່ວນໃນການສ້າງສາ ແລະ ພັດທະນາປະເທດຊາດໃຫ້ຫຼຸດພົ້ນ ອອກຈາກປະເທດດ້ອຍພັດທະນາ.

ໃນໂອກາດດຽວກັນ ທ່ານ ຈິດປະສົງ ໜູແກ້ວໄກສອນ ຄະນະພັກຮາກຖານ,ຮອງຜູ້ອຳນວຍການໃຫຍ່ ລາວໂທລະຄົມ ໄດ້ໃຫ້ກຽດມອບໃບຢັ້ງຢືນ ແລະ ຕີລາຄາສູງຕໍ່ຄວາມພະຍາຍາມຂອງຄະນະພັກຮາກຖານ ລລທ ທີ່ໄດ້ສ້າງເງື່ອນໄຂ ອຳນວຍຄວາມສະດວກ ໃນການຈັດຝຶກອົບຮົມຄັ້ງນີ້; ບັນດາຄູອາຈານ ແລະ ນັກຝຶກອົບຮົມ ໄດ້ສຸມສະຕິປັນຍາໃນການສິດສອນ ແລະ ຄົ້ນຄວ້າຮ່ຳຮຽນເຊີ່ງສາມາດຍາດໄດ້ຜົນສຳເລັດໃນຄັ້ງນີ້ ພ້ອມນັ້ນທ່ານຍັງໄດ້ເນັ້ນໜັກໃຫ້ນັກຝຶກອົບຮົມຈົ່ງນຳເອົາບົດຮຽນທີ່ຄູ-ອາຈານໄດ້ຖ່າຍທອດໃຫ້ໄປໝູນໃຊ້ເຂົ້າໃນວຽກງານຕົວຈິງໃຫ້ມີປະສິດທິຜົນສູງ.