1/30/2020 4:07:42 PM | ກິດຈະກຳ

ລາວ ໂທລະຄົມ - ທີພຣາດ ຮ່ວມອວຍພອນປີໃຫມ່ ຈີນ ແລະ ຫວຽດນາມ

ໃນວັນທີ 28 ມັງກອນ 2020 ຜ່ານມາ ບໍລິສັດ ລາວ ໂທລະຄົມມະນາຄົມ ມະຫາຊົນ ( ລລທ ) ຮ່ວມກັບ ບໍລິສັດ ທີພຣາດ (TPLUS) ໄດ້ເປີດຂະບວນຄາລະວານເຊີດສິງໂຕຂື້້ນ ທີ່ສູນບໍລິການລູກຄ້າ ລລທ (ສໍານັກງານໃຫຍ່) ໂດຍໃຫ້ກຽດເຂົ້າຮ່ວມ ຂອງ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ ລລທ ພ້ອມດ້ວຍຄະນະອຳນວຍການ, ຜູ້ບໍລິຫານ ແລະ ພະນັກງານທັງສອງຝ່າຍເຂົ້າຮ່ວມ.

ຈຸດປະສົງເພື່ອເປັນການອວຍພອນ ຮ້ານຕົວແທນຈໍາໜ່າຍ ແລະ ລູກຄ້າ ໃນໂອກາດບຸນປີໃໝ່ຂອງພີ່ນ້ອງຊາວຈີນ ແລະ ຫວຽດນາມ ທີ່ໜູນວຽນມາເຖີງອີກວາລະໜຶ່ງ ເພື່ອນໍາເອົາຄວາມເປັນສິລິມົງຄຸນ, ໂຊກລາບ ແລະ ຄວາມສໍາເລັດ ໃນປີ 2020 ສູ່ຕົວແທນຈໍາໜ່າຍ, ລູກຄ້າ ແລະ ຂອງທັງສອງບໍລິສັດ.

ກິດຈະກໍາໃນພາກເຊົ້າໄດ້ເລີ່ີມຕົ້ນທີ່ ສູນບໍລິການລູກຄ້າ (ສາຍລົມ) ແລະ ໄດ້ເຄື່ອນຍ້າຍໄປບັນດາຮ້ານຕົວແທນຈໍາໜ່າຍຕ່າງໆ ເຊັ່ນ: ຮ້ານບ໋ອດໂຟນ, ຮ້ານ ຊີມລາວ ໂຟນ, ຮ້ານ ວີເອັນ ໂຟນ. ສ່ວນໃນພາກບ່າຍເລີ່ມຕົ້ນທີ່ ສູນບໍລິການ ທີພຣາດ (ກົງກັນຂ້າມຕະຫຼາດເຊົ້າມໍ) ຕໍ່ຈາກນັ້ນໄດ້ເຄື່ອນຍ້າຍຂະບວນໄປທີ່ແຄມຂອງ (ສວນເຈົ້າອານຸວົງ)ເພື່ອແຈກຢາຍອັງເປົາໃຫ້ກັບລູກຄ້າ ແລະ ພໍ່ຄ້າຊາວຂາຍໃນສະຖານທີ່ດັ່ງກ່າວ ເຮັດໃຫ້ກິດຈະກໍາໃນຄັ້ງນີ້ເຕັມໄປດ້ວຍຄວາມຟົດຟື້ນມ່ວນຊື່ນ ແລະ ອົບອຸ່ນ ເຊິ່ງໄດ້ຮັບການຕອບຮັບຈາກສັງຄົມຢ່າງລົ້ນເຫຼືອ. “ ໂຊກດີປີໃໝ່ ຈີນ-ຫວຽດນາມ ເຮັງໆໆໆ ລວຍໆໆໆ ”