12/4/2019 8:08:17 AM | ກິດຈະກຳ

ລາວ ໂທລະຄົມ ຮ່ວມ ສ້າງຂະບວນການລະນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ

ໃນຕອນບ່າຍ ຂອງ ວັນທີ 22 ພະຈິກ 2019 ຜ່ານມາ ທີ່ ເດີ່ນພະທາດຫຼວງວຽງຈັນ, ລາວ ໂທລະຄົມ ໄດ້ເຂົ້າຮ່ວມປະກອບສ່ວນນຳຄະນະກຳມາທິການ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄກມດ) ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດກິດຈະກໍາອອກກຳລັງກາຍຮ່ວມກັນຂອງພະນັກງານ-ລັດຖະກອນ (ເຕັ້ນແອໂລບິກ) ເພື່ອລະນຶກວັນສາກົນລຶບລ້າງຄວາມຮຸນ ແຮງຕໍ່ແມ່ຍິງ 25 ພະຈິກຂຶ້ນ.

ເຊິ່ງໄດ້ຮັບກຽດເປັນປະທານກ່າວເປີດງານໂດຍ ທ່ານ ບຸນສະເຫຼີມໄຊ ເຄນນາວົງ ຄະນະປະຈຳພັກ, ຮອງລັດ ຖະມົນຕີ ກະຊວງ ປທສ, ມີບັນດາທ່ານ ຄະນະ ຄກມດ ກະຊວງ ປທສ, ຄະນະກົມ/ທຽບເທົ່າ, ຄະນະອຳນວຍການ, ບໍລິສັດ ລາວ ໂທລະຄົມມະນາຄົມ ມະຫາຊົນ, ບໍລິສັດ ລັດວິສາຫະກິດ ແລະ ພະນັກງານອ້ອມຂ້າງກະຊວງ ປທສ ເຂົ້າຮ່ວມ.

ທ່ານ ບຸນສະເຫຼີມໄຊ ເຄນນາວົງ ໄດ້ກ່າວວ່າ: ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ເປັນບັນຫາທີ່ເກີດຂຶ້ນ ດົນນານມາແລ້ວ ໃນທົ່ວໂລກ. ປັດຈຸບັນ ກໍເປັນປະກົດການຫຍໍ້ທໍ້ອັນໜຶ່ງໃນສັງຄົມ ແລະ ສົ່ງຜົນກະທົບທາງ ລົບຕໍ່ການພັດ ທະນາເສດຖະ ກິດ-ສັງຄົມ ເວົ້າລວມ, ເວົ້າສະເພາະ ແມ່ນກະທົບຕໍ່ຮ່າງກາຍ, ຈິດໃຈ, ຕະຫຼອດເຖິງຊັບສິນຂອງ ແມ່ຍິງ ແລະ ເດັກຍິງ. ການໃຊ້ຄວາມຮຸນແຮງ ແມ່ນມີຫຼາຍ ສາເຫດ ແຕ່ສາເຫດຕົ້ນຕໍ ແມ່ນຍ້ອນຮີດຄອງປະເພນີທີ່ເກົ່າແກ່ຫຼ້າຫຼັງ, ການເຊື່ອຖືແບບງົມງວາຍ, ຄວາມທຸກຍາກຂາດເຂີນ, ລະດັບການສຶກ ສາຕ່ຳ ແລະ ສິ່ງຫຍໍ້ທໍ້ອື່ນໆທີ່ມີຕໍ່ແມ່ຍິງໃນສັງຄົມ ຊຶ່ງປະກອບມີຫຼາຍຮູບແບບເຊັ່ນ: ການບັງຄັບໃຫ້ແຕ່ງງານແຕ່ອາຍຸຍັງນ້ອຍ, ການຄ້າມະນຸດ, ການບັງຄັບຮ່ວມເພດ ແລະ ການຂົ່ມຂືນທຳຊຳເລົາ ທີ່ສາມາດເກີດຂຶ້ນກັບແມ່ຍິງທຸກໆໄວ ໂດຍບັນຫາດັ່ງກ່າວເປັນສິ່ງທີ່ກີດຂວາງຢ່າງໜັກໜ່ວງ ໃນການພັດທະນາຄວາມສາມາດຂອງຊັບພະຍາກອນມະນຸດ. ຍ້ອນເຫັນໄດ້ຄວາມສຳຄັນ ຕໍ່ບັນຫາດັ່ງກ່າວ, ອົງການສະຫະປະຊາຊາດ ຈຶ່ງໄດ້ ຮັບຮອງເອົາຖະແຫຼງການວ່າດ້ວຍການລຶບລ້າງຄວາມຮຸນແຮງຕໍ່ແມ່ຍິງ ຢູ່ກອງປະຊຸມສະມັດຊາໃຫຍ່ອົງການສະຫະປະ ຊາຊາດໃນ ປີ 1993 ແລະ ກຳນົດເອົາວັນທີ 25 ພະຈິກ ຂອງທຸກໆປີ ເປັນການລະນຶກວັນສາກົນເພື່ອລຶບລ້າງຄວາມຮຸນ ແຮງຕໍ່ແມ່ຍິງໃນທົ່ວໂລກ. ສຳລັບ ກະຊວງ ປທສ ຂອງ ພວກເຮົາແລ້ວ, ຄະນະພັກ ຄະນະນຳຍາມໃດກໍໃຫ້ຄວາມສຳຄັນ ຕໍ່ກັບບັນຫາດັ່ງກ່າວ ໂດຍໄດ້ເອົາໃຈໃສ່ໃນການສົ່ງເສີມຄວາມສະເໝີພາບຍິງ-ຊາຍ, ລຶບລ້າງທຸກຮູບການໃນການຈຳແນກຕໍ່ ແມ່ຍິງຕະຫຼອດມາ, ເຊິ່ງໄດ້ສະແດງອອກ ຢ່າງຈະແຈ້ງຢູ່ ໃນທິດທາງ, ແຜນການວຽກງານສົ່ງເສີມຄວາມກ້າວໜ້າຂອງແມ່ຍິງ ແລະ ແມ່-ເດັກ 2016-2020 ຂອງ ຂະແໜງການ ປທສ ແລະ ເອົາໃຈໃສ່ສ້າງບັນ ດານິຕິກໍາ ທີ່ກ່ຽວຂ້ອງ ແລະ ດຳເນີນການໂຄນະນາເຜີຍແຜ່ ນັບແຕ່ຂັ້ນສູນກາງລົງຮອດທ້ອງຖິ່ນ ເຊັ່ນ: ກົດໝາຍວ່າດ້ວຍ ການຕ້ານ ແລະ ສະກັດກັ້ນອາຊະຍາ ກໍາທາງລະບົບຄອມພິວເຕີ ສະບັບເລກທີ 61/ສພຊ, ລົງວັນທີ 15 ກໍລະກົດ 2015; ກົດໝາຍວ່າ ດ້ວຍການປົກປ້ອງຂໍ້ ມູນເອເລັກໂຕຣນິກ ສະບັບເລກທີ 25/ສພຊ, ລົງວັນທີ 12 ພຶດສະພາ 2017; ດໍາລັດ ວ່າດ້ວຍ ການຄຸ້ມຄອງ ຂໍ້ມູນຂ່າວ ສານ ຜ່ານອິນເຕີເນັດ ສະບັບເລກທີ 327/ລບ, ລົງວັນທີ 16 ກັນຍາ 2014. ເພື່ອຄຸ້ມ ຄອງ ແລະ ຄວບຄຸມຜົນກະທໍາ ຜິດທາງລະບົບຄອມ ພິວເຕີລວມທັງຕິດຕາມ, ກວດກາ, ການນໍາໃຊ້ຂໍ້ມູນ-ຂ່າວສານ ແລະ ສື່ສັງຄົມອອນລາຍທີ່ເປັນໄພ ຄຸກຄາມ ແລະ ເປັນອັນຕະລາຍຕໍ່ສັງຄົມ.

ພ້ອມກັນນັ້ນ ໃນຕອນເຊົ້າຂອງວັນດຽວກັນຍັງໄດ້ຈັດກິດຈະກໍາເພື່ອສັງຄົມ (ເກັບຂີ້ເຫຍື້ອ) ເພື່ອຄວາມສະອາດງາມຕາ, ແລະ ເປັນການອອກແຮງງານຮ່ວມກັນຂອງພະນັກງານ-ລັດຖະກອນ ອ້ອມຂ້າງກະຊວງ ປທສ, ທັງເປັນການລະນຶກວັນສາກົນລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ. ຊຶ່ງກິດຈະກຳດັ່ງກ່າວໄດ້ຈັດຂຶ້ນ ທີ່ ເສັ້ນທາງແຄມຂອງ (ນັບແຕ່ ອານຸສາວະລີ ເຈົ້າອານຸວົງ ເຖິງ ສາມແຍກປາກປ່າສັກ).