4/10/2020 8:17:22 PM | ຊ່ວຍເຫຼືອສັງຄົມ

ລາວ ໂທລະຄົມ ມອບເຄື່ອງອຸປະຖໍາໃຫ້ ກົມສື່ມວນຊົນ

ໃນວັນທີ 10 ເມສາ 2020 ທີ່ ກົມສື່ມວນຊົນ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ມີພິທີມອບເຄື່ອງອຸປະຖໍາຈາກ ບໍລິສັດ ລາວ ໂທລະຄົມມະນາຄົມ ມະຫາຊົນ ໃຫ້ກັບ ກົມສື່ມວນຊົນ ຂື້ນ. ເປັນກຽດມອບໂດຍ ທ່ານ ສຸພົນ ຈັນທະວີໄຊ ທ່ານຜູ້ອໍານວຍການໃຫຍ່ ພ້ອມດ້ວຍຄະນະ ແລະ ຮັບໂດຍ ທ່ານ ສົມສະຫວາດ ພົງສາ ຮອງຫົວໜ້າກົມສື່ມວນຊົນ ພ້ອມດ້ວຍຄະນະ. ເຄື່ອງທີ່ນໍາມາມອບໃນຄັ້ງນີ້ປະກອບມີ ໜ້າກາກອານາໄມຈໍານວນ 2,000 ແຜ່ນ, Sim Net ພ້ອມ Data ໃນລະບົບຈໍານວນ 39 ນໍ້າເບີ ລວມມູນຄ່າທັງໝົດ 15,000,000 ກີບ.

ຈຸດປະສົງ ເພື່ອເປັນການປະກອບສ່ວນຊຸກຍູ້ການເຄື່ອນໄຫວປະຕິບັດໜ້າທີ່ວຽກງານໂຄສະນາ-ປະຊາສໍາພັນ ຂອງຄະນະສະເພາະກິດໜ່ວຍງານໂຄສະນາ ໃນໄລຍະປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ນີ້. ລາວ ໂທລະຄົມ ເຂົ້າໃຈດີວ່າ ຂະແໜງການສື່ມວນຊົນກໍແມ່ນຂະແໜງການໜຶ່ງທີ່ເຮັດວຽກຢ່າງໜັກຄຽງຄູ່ກັບຂະແໜງການອຶ່ນໆນັບແຕ່ມື້ເລີ່ມມີການລະບາດຂອງພະຍາດ COVID-19 ເປັນຕົ້ນມາ ເພື່ອເຮັດໜ້າທີ່ໂຄສະນາ-ປະຊາສໍາພັນໃຫ້ຄວາມຮູ້ກັບພໍ່ແມ່ປະຊາຊົນລາວບັນດາເຜົ່າ ກ່ຽວກັບຜົນຮ້າຍ, ວິທີການປ້ອງກັນ, ຄວບຄຸມ ແລະ ໄກ້ໄຂການລະບາດຂອງພະຍາດດັ່ງກ່າວ ພ້ອມທັງອັບເດດລາຍງານສະພາບການຜູ້ຕິດເຊື້ອ ໃນ ສປປ ລາວ ແລະ ທົ່ວໂລກໃນແຕ່ລະວັນໃຫ້ສັງຄົມຮັບຊາບເປັນແຕ່ລະໄລຍະ. ລາວ ໂທລະຄົມ ຂໍເປັນອີກໜຶ່ງກໍາລັງໃຈໃຫ້ຂະແໜງການສື່ມວນຊົນຂອງພວກເຮົາໃນການປະຕິບັດໜ້າທີ່ໄປພ້ອມກັບຂະແໜງການອຶ່ນໆເພື່ອພ້ອມກັນຜ່ານຜ່າວິກິດການໃນຄັ້ງນີ້ໄປໃຫ້ໄດ້ໂດຍໄວ. “ ລາວ ໂທລະຄົມ ໂທລະຄົມຂອງຄົນລາວ ເພື່ອສັງຄົມລາວ ”