2/27/2020 10:58:41 AM | ຊ່ວຍເຫຼືອສັງຄົມ

ລາວ ໂທລະຄົມ ມອບລາງວັນອັດສີດໃຫ້ນັກກິລາຊີເກມ ມູນຄ່າ 197,000,000 ກີບ

ໃນຕອນບ່າຍ ວັນທີ 24 ກຸມພາ 2020 ທີ່ຫ້ອງປະຊຸມຄະນະກຳມະການໂອແລມປິກແຫ່ງຊາດລາວ ໄດ້ຈັດພິທີສະຫຼຸບຜົນສຳເລັດ ຂອງຄະ ນະນັກກິລາລາວທີ່ເຂົ້າຮ່ວມງານມະຫາກໍາກິລາຊີເກມ ຄັ້ງທີ 30 ທີ່ປະເທດຟີລີປິນ ພ້ອມມອບເງິນລາງວັນໃຫ້ແກ່ຄະນະນັກກິລາລາວ ພາຍໃຕ້ການ ເປັນປະທານໂດຍ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສືກສາທິການ ແລະ ກິລາ, ປະທານຄະນະກຳມະການ ກິລາໂອແລມ ປິກແຫ່ງຊາດລາວ. ໃນໂອກາດດັ່ງກ່າວ ລາວ ໂທລະຄົມ ໄດ້ມອບເງິນລາງວັນອັດສີດໃຫ້ແກ່ນັກກິລາ ທີ່ສາມາດຄວ້າໄດ້ຫຼຽນລາງວັນ ແລະ ສ້າງ ຊື່ສຽງໃຫ້ກັບປະເທດຊາດ ໃນງານມະຫາກໍາກິລາຄັ້ງນີ້ ໃຫ້ກຽດມອບລາງວັນໂດຍ ທ່ານ ລັດຖະປັນຍາ ຂຽວວົງພະຈັນ ຮອງຜູ້ອຳນວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ລາຍລະອຽດດັ່ງນີ້: ຫຼຽນຄຳ 1 ຫຼຽນ=10,000,000 ກີບ, ຫຼຽນເງິນ 5 ຫຼຽນ=30,000,000 ກີບ, ຫຼຽນທອງແດງ 29 ຫຼຽນ = 87,000,000 ກີບ ລວມເງິນລາງວັນອັດສີດຫຼຽນລາງວັນເປັນມູນຄ່າ 127,000,000 ກີບ. ເບີງາມ M-Phone ພ້ອມມູນຄ່າໂທ ແລະ Data ໃຊ້ງານ ເປັນເວລາ 6 ເດືອນ ມູນຄ່າ 70,000,000 ກີບ. ລວມເປັນເງິນທັງໝົດທີ່ມອບໃນຄັ້ງນີ້ 197,000,000 ກີບ. ລາວ ໂທລະຄົມ ຮູ້ສືກພູມໃຈທີ່ໄດ້ເປັນສ່ວນໜຶ່ງໃນການສະໜັບສະໜູນກິລາລາວມາໂດຍຕະຫຼອດ ແລະ ເຊື່ອແນ່ວ່າລາງ ວັນທີ່ມອບໃນຄັ້ງນີ້ ຈະຊ່ວຍສ້າງຂວັນກໍາລັງໃຈໃຫ້ແກ່ນັກກິລາ ພ້ອມດ້ວຍຄະນະນໍາ ແລະ ຄູຝຶກບໍ່ຫຼາຍກໍນ້ອຍ ເພື່ອເຮັດໃຫ້ນັກກິລາລາວ ຂອງ ພວກເຮົາມີຄວາມບຸກ ບືນຕັ້ງໃຈຝຶກຝົນກຽມພ້ອມລົງແຂ່ງຂັນໃນລາຍການຕ່າງໆທຸກລະດັບທັງໃນພາກພື້້ນ ແລະ ສາກົນ ເພື່ອຍາດເອົາຜົນງານ ແລະ ຊື່ສຽງ ມາສູ່ປະເທດ ຊາດ.