11/1/2019 5:25:19 PM | ຊ່ວຍເຫຼືອສັງຄົມ

ພະນັກງານ ລາວ ໂທລະຄົມ ສາຂາ ແຂວງຫຼວງພະບາງ ຮ່ວມໃຈ ບໍລິຈາກເຄື່ອງ ອຸປະກອນການສຶກສາ ໃຫ້ແກ່ ນ້ອງໆ ນັກຮຽນ

ໃນວັນທີ 24 ຕຸລາ 2019 ທີ່ຜ່ານມາ ພະນັກງານ ລາວ ໂທລະຄົມ ສາຂາ ແຂວງຫຼວງພະບາງ ໄດ້ເດີນທາງໄປມອບເຄື່່ອງອຸປະກອນກິລາ,ການຮຽນ, ການສອນ ແລະ ເຄື່ອງນຸ່ງຮົ່ມ ໃຫ້ແກ່ ນ້ອງໆ ນັກຮຽນ ທີ່ຢູ່ ໂຮງຮຽນປະຖົມສຶກສາ ບ້ານນາງິ້ວ ກຸ່ມໂພນທອງ, ແຂວງຫຼວງພະບາງ ລວມມູນຄ່າທັງໝົດ 5,350,000 ກິບ ຕາງໜ້າພະນັກງານ ເປັນກຽດມອບເຄື່ອງບໍລິຈາກ ໃນຄັ້ງນີ້ໂດຍ: ທ່ານ ໜໍ່ເງິນ ວິລະວົງສາ ອໍານວຍການ ລລທ ສາຂາ ແຂວງຫຼວງພະບາງ ແລະ ຕາງໜ້າ ໃຫ້ນ້ອງໆ ນັກຮຽນທີ່ທຸກຍາກ ກ່າວຮັບໂດຍ ທ່ານ ສົມພອນ ວິໄລສຸກ ອໍານວຍການ ໂຮງຮຽນປະຖົມສຶກສາ ແລະ ເຂົ້າຮ່ວມເປັນສັກຂີພະຍານມີ ອໍານາດການປົກຄອງບ້ານ ພ້ອມດ້ວຍ ນ້ອງໆ ນັກຮຽນພາຍໃນໂຮງຮຽນ ເຂົ້າຮ່ວມຢ່າງພ້ອມພຽງ.

ຈຸດປະສົງໃນການບໍລິຈາກໃນຄັ້ງນີ້ ກໍເພື່ອເປັນການຊ່ວຍເຫຼືອໂຮງຮຽນທີ່ຂາດເຂີນ ດ້ານອຸປະກອນກິລາ, ການຮຽນ,ການສອນ ແລະ ເຄື່ອງນຸ່ງຮົ່ມ ເຊຶ່ງເປັນສ່ວນໜຶ່ງທີ່ສຳຄັນ ທີ່ຈະຊ່ວຍເຫຼືອໃຫ້ນ້ອງໆນັກຮຽນ ທີ່ ຂາດເຂີນອຸປະກອນດັ່ງກ່າວ ແລະ ປະສົບໄພໜາວໃນຄັ້ງນີ້ ໄດ້ຮັບອາຍອຸ່ນຈາກ ສິ່ງດີໆ ທີ່ ພະນັກງານ ລາວ ໂທລະຄົມ ສາຂາແຂວງຫຼວງພະບາງ ມອບໃຫ້ ເພາະວ່າເດັກນ້ອຍກໍຄືໜໍ່ແໜງຂອງປະເທດຊາດ ທີ່ ເຮົາທຸກຄົນຄວນເລັ່ງເຫັນຄວາມສຳຄັນ ທີ່ຈະຊ່ວຍເຫຼືອ ແລະ ບໍ່ຄວນເບິ່ງຂ້າມ. ( ລາວ ໂທລະຄົມ ໂທລະຄົມ ຂອງ ຄົນລາວ ເພື່ອສັງຄົມລາວ )