img

ລາວ ໂທລະຄົມ ເຂົ້າວາງພວງມາລາເພື່ອໄວ້ອາໄລເຖີງ ທ່ານ ພົນເອກ ສີສະຫວາດ ແກ້ວບຸນພັນ

ໃນວັນທີ 14 ພຶດສະພາ 2020 ທີ່ສະໂມສອນກົມໃຫຍ່ການເມືອງກອງທັບ ກະຊວງປ້ອງກັນປະເທດ, ຄະນະພັກ ຄະນະອໍານວຍການໃຫຍ່ ພ້ອມດ້ວຍ 3 ອົງການຈັດຕັ້ງ ບໍລິສັດ ລາວ ໂທລະຄົມມະນາຄົມ ມະຫາຊົນ ເຊິ່ງນໍາໂດຍ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່. ໄດ້ເຂົ້າພິທີວາງພວງມາລາເພື່ອໄວ້ອາໄລຕໍ່ການເສຍຊີວິດຂອງ ທ່ານ ພົນເອກ ສີສະຫວາດ ແກ້ວບຸນພັນ ອະດີດກໍາມະການສູນກາງພັກ 8 ສະໄໝ, ເລຂາທິການສູນກາງພັກ ສະໄໝທີ III, IV, ກົມການເມືອງສູນກາງພັກ 4 ສະໄໝ, ອະດີດ ນາຍົກລັດຖະມົນຕີ, ຮອງປະທານປະເທດ, ປະທານສູນກາງແນວລາວສ້າງຊາດ, ອະດີດການນໍາສູງສຸດຂອງຫຼາຍອົງການຈັດຕັ້ງພັກ-ລັດ ແລະ ກອງທັບປົດປ່ອຍປະຊາຊົນລາວ. |ການຈາກໄປຢ່າງບໍ່ມີວັນຫວນກັບມາຂອງ ທ່ານຄັ້ງນີ້ເປັນການສູນເສຍການນໍາສູງສຸດທີ່ເປັນຫຼັກແຫຼ່ງຂອງພັກຂອງກອງທັບ ແລະ ປະຊາຊົນລາວ. ທ່ານ ພົນເອກ ສີສະຫວາດ ແກ້ວບຸນພັນ ເປັນນັກປະຕິວັດອາວຸໂສຜູ້ກ້າຫານ ແລະ ດີເດັ່ນ ຂອງປະຊາຊົນລາວບັນດາເຜົ່າ ຕະຫຼອດຊີວິດເພິ່ນໄດ້ອຸທິດຕົນເພື່ອພາລະກິດຕໍ່ສູ້ປົດປ່ອຍຊາດ ,ປົກປັກຮັກສາ ແລະ ສ້າງສາພັດທະນາປະເທດຊາດຈົນສຸດກົກສຸດປາຍ. ໃນນາມຄະນະພັກ, ຄະນະອໍານວຍການໃຫຍ່ພ້ອມດ້ວຍພະນັກງານ ບໍລິສັດ ລາວ ໂທລະຄົມມະນາຄົມ ມະຫາຊົນ ຂໍສະແດງຄວາມອາໄລອາວອນຢ່າງສຸດຊື້ງ ແລະ ຂໍແບ່ງເບົາຄວາມທຸກໂສກມາຍັງຄອບຄົວ ແກ້ວບຸນພັນ ແລະ ຂໍຈາລຶກ, ຈົດຈໍາຄຸນງາມຄວາມດີ, ແບບແຜນວິທີການເຮັດວຽກ ແລະ ການດໍາລົງຊີວິດ ທີ່ເປັນແບບຢ່າງອັນລໍ້າຄ່າຂອງທ່ານຕະຫຼອດໄປ ຂໍໃຫ້ດວງວິນຍານຂອງທ່ານຈົ່ງໄປສູ່ສຸຂະຕິດ້ວຍເທີ້ນ

View: 395 | 5/15/2020 11:07:06 PM | ອື່ນໆ...

ຍ້ອນກັບ




Copyright © 2020 , All Rights Reserved | Version : 2.0